Këshilla për makrofotografinë

Fotografitë nga afër të gjithçkaje, nga kandrrat deri te lulet, ushqimi dhe orenditë e shtëpisë mund të zbulojnë nivele mahnitëse detajesh. Me kamerën, objektivin dhe cilësimet e duhura, ju mund të nxirrni në pah detaje që janë të padukshme me sy të lirë. Zakonisht, një makroobjektiv ofron zmadhim nga 0,5x deri në 1,0x në distancën e tij minimale të fokusimit. Kjo mund të mos tingëllojë shumë mbresëlënëse, por zmadhimi 1,0x i riprodhon objektet e vogla në përmasa reale në sensorin e imazhit të kamerës. Ato do të jenë shumë të zmadhuara kur t’i shikoni në ekran apo kur të jenë të printuara, duke i dhënë kështu një perspektivë të re fotografisë suaj.

Çdo gjë mund t’ju shërbejë si subjekt në makrofotografi teksa zbuloni një botë të fshehur dhe i shihni ndryshe gjërat e përditshme. Shkrepjet nga një distancë shumë e afërt mund të jenë shumë argëtuese por janë dhe shumë sfiduese nga ana teknike. Lexoni më tej dhe zbuloni këshilla nga ekspertët se si të krijoni pamje spektakolare nga afër, si dhe kompletet më të mira të Canon për makrofotografi, edhe nëse keni buxhet të limituar.

• Teknikat e makrofotografisë
• Makrosubjekte të shkëlqyera
• Ndriçimi për makrofotografi
• Thellësia e fushës
• Kompozimi efikas
• Kamerat optimale për makrofotografi
• Objektivët optimalë për pamje nga afër
• Cilësimet optimale për shkrepjet makro
• Notat e fundit

Fokusimi mund të jetë i vështirë në shkrepjen nga afër dhe kërkon saktësi ekstreme, për shkak të rrezes tipike të ulët të qartësisë. Programi Canon Photo Companion përmban një funksion të dobishëm që llogarit pikat më të afërta dhe të largëta të fokusit, rrezen e qartësisë dhe distancën hiperfokale në varësi të kamerës suaj dhe cilësimeve përkatëse.

Për fotot e natyrës së qetë, si p.sh. makrofotografia e ushqimeve, është më e mirë ta montoni kamerën në stativ apo në ndonjë mbështetëse tjetër, që të jetë e fiksuar në vend dhe të mos ketë lëvizje apo turbullim. Për të garantuar moslëvizje të plotë, përdorni kronometrin dysekondësh të kamerës ose ndonjë telekomandë, që të mos ju duhet të prekni kamerën kur shkrepni.

Edhe kur përdorni stativ mund të shkaktohet dridhje nga prekja e kamerës menjëherë përpara ekspozimit dhe te DSLR-të nga lëvizja e pasqyrës së refleksit që kthehet lart. Një kombinim i mirë i cilësimeve të disponueshme në shumicën e modeleve DSLR të Canon është të përdorni kronometrin me vonesë dysekondëshe së bashku me modalitetin Mirror lockup. Pasqyra në vijim kthehet lart dy sekonda përpara shkrepjes së pozës, duke lejuar kohë të mjaftueshme për qetësimin nga dridhjet. Programi Canon Camera Connect është gjithashtu i dobishëm në këto raste, duke ju mundësuar komandimin e kamerës nga telefoni.

Me kamerën e siguruar në vend, vetëfokusimi mund të punojë mirë nëse përdorni Af njëpikësh dhe e drejtoni me precizion pikën me pjesën e subjektit që dëshironi të jetë më e mprehta. Fokusimi manual mund të funksionojë dhe më mirë. Kamerat pa pasqyrë të Canon, si EOS M dhe të gjitha kamerat EOS R System vijnë me opsion kulminimi të fokusit (duhet ta keni objektivin në modalitetin MF). Aktivizojeni këto dhe zonat brenda kuadrit të figurës do të tregohen në inkuadrues ose në ekranin e pasmë teksa hyjnë në fokus, duke ju lejuar ta akordoni me imtësi pozën. Përndryshe përdorni një pamje të zmadhuar paraprake të zonës së dëshiruar për të siguruar fokusim optimal manual. Mund të përdorni të njëjtën teknikë në ekranin e pasmë të modeleve Canon DSLR duke kaluar në modalitetin Live View.

Për makrofotografi efikase, duhet të mendoni për detajet. Insektet e kopshtit, merimangat dhe bletët janë subjekte të shkëlqyera, kurse natyra në përgjithësi ju ofron shumë përgjatë gjithë vitit. Keni gjithmonë shumë mundësi për shkrepje, që nga lulet në pranverë, tek bletët dhe fluturat në verë, gjethet e arta dhe kërpudhat në vjeshtë, flokët e dëborës dhe ngricat në dimër.

Në ambiente të brendshme, ju mund të bëheni krijues me makrofotografi të ushqimeve, ose me shkrepje nga shumë afër të objekteve si lapsat me ngjyra që kanë shumë detaje. Për më shumë frymëzim rreth subjekteve dhe mënyrave se si mund t’i fotografoni, hidhini një sy videos së mëposhtme nga Ian Wade mbi makrofotografinë në vjeshtë.

Për të nxjerrë në pah detajin, provoni të eksperimentoni me burime të ndryshme drite, duke lëvizur nga ndriçimi natyral i ambientit me një fletë kartoni apo letre të bardhë, deri te përdorimi i paneleve ndriçuese fotografike LED apo blicit të gjatë Speedlite.

Ndriçimi me intensitet shumë të ulët nuk përbën problem në përgjithësi nëse përdorni një trekëmbësh për makrofotografinë e luleve, pamjeve nga afër të ushqimit dhe subjekteve të tjera të natyrës së qetë, por ndriçimi i zbehtë mund të rezultojë në foto jodomethënëse. Për poza në ambiente të mbyllura, mund të shtoni dritë me një abazhur tryeze ose dhe të përdorni dritën natyrore nga dritarja. Llambat fotografike LED janë gjithashtu një opsion i mirë, ashtu si edhe llambat LED Macro Lite.

Një zgjidhje më e avancuar është përdorimi i blicit të gjatë ose i Speedlite. Përveç shtimit të ndriçimit, kohëzgjatja e shkurtër e blicit e fikson me efikasitet aksionin. Për kontroll optimal të planeve të afërta dhe një efekt pa hijezim në makrofotografi, modeli Canon Macro Ring Lite MR-14EX II është i pajtueshëm me shumicën e makroobjektivave Canon. Përndryshe, provoni të ndriçoni subjektin me një dritë të fortë nga një kënd i zhdrejtë. Kjo do të krijojë hije të thella duke sjellë një pamje tredimensionale.

Edhe me fokusimin më të saktë dhe një aperturë të ngushtë, ndonjëherë do të vini re se sërish nuk mund të arrini qartësi të mjaftueshme para-mbrapa. Edhe një herë, kjo ndodh për shkak të rrezes së qartësisë shumë të cekët kur shkrepni pamje nga afër. Disa kamera Canon, duke përfshirë Canon EOS R8 dhe EOS R6 Mark II, vijnë me një modalitet për grupimin e fokusit. Kjo është fantastike për shkrepjet në makro, pasi nxjerr një varg pozash duke kaluar automatikisht në një diapazon distancash fokusimi nga njëri kuadër në tjetrin. Vargu mund të bashkohet në vijim në një imazh të vetëm në stadin e modifikimit, duke rezultuar në rreze më të madhe qartësie.

Ju mund të përdorni rrezen e qartësisë që është zakonisht e ngushtë në avantazhin tuaj në makrofotografi. Zonat që janë përafërsisht më shumë se disa centimetra përpara ose pas planit të fokusit do të turbullohen shumë në imazh. Pra është e rëndësishme të mendoni për sfondin si dhe për objektin të cilin po fotografoni.

Sfondet me një ngjyrë dhe shkëlqim mjaft të njëtrajtshëm do të formojnë një sfond të thjeshtë që mund të ndihmojë në izolimin e subjektit kryesor dhe ta bëjë atë të dallohet në imazh. Sfondet me një shumëllojshmëri ngjyrash dhe tonalitetesh gjithashtu mund të funksionojnë mirë. Sido që të jetë, merrni në konsideratë ngjyrat e subjektit kryesor dhe të ambientit që e rrethon dhe mënyrën se si kombinohen së bashku për të përmirësuar imazhin e përgjithshëm.

Rregulli i të tretave është mjet klasik kompozimi. Mendoni sikur kuadri i imazhit tuaj të jetë i ndarë nga vija rrjete të barabarta - dy horizontale dhe dy vertikale, të cilat mund t'i shtoni në kamerë. Tani provoni të vendosni zonën kryesore të interesit mbi pikën ku kryqëzohen dy nga vijat. Kjo mund të krijojë ndikim maksimal vizual në imazh. Përndryshe, thyeni rregullat dhe pozicionojeni subjektin kryesor në qendër të kuadrit. Kjo mund të funksionojë mirë me objekte simetrike, të cilat janë në vetvete makrosubjekte të shkëlqyera.

Një këshillë e mirë kompozimi për lule, gjethe dhe subjekte të tjera pak më të mëdha, do të ishte të afroheshit në një zonë shumë të vogël të objektit në tërësi dhe të kryeni një shkrepje shumë të afërt e të detajuar.

Nuk keni nevojë për kamera dhe objektiva të shtrenjtë për shkrepjen e pamjeve nga afër. Kamera më e mirë për makrofotografi është ajo që keni në dorë. Shumë kamera përdorimi të shpejtë të nivelit fillestar kanë një modalitet shkrepjeje Macro që mundëson distanca fokusimi deri në 1 cm, ndërsa kamera kompakte Canon PowerShot G7 X Mark III ka një modalitet më të fuqishëm Macro.

Kamerat EOS që pranojnë objektiva të këmbyeshëm ju japin më shumë fleksibilitet për shkrepjet nga afër, pasi mund të vendosni objektivat idealë për rastin. Kamerat Canon EOS R50 dhe EOS R10 kanë gjithashtu ekrane me prekje me kënde të ndryshme, gjë që lehtëson shkrepjet nga kënde krijuese. Thjesht prekni në ekran pikën që lidhet me zonën e panoramës ku doni të ketë vetëfokusim. Ato kanë gjithashtu një opsion për pamje paraprake të zmadhuar dhe kulmim fokusi për fokusim manual tejet të saktë. Një tjetër avantazh i këtyre kamerave me format APS-C, krahasuar me trupat me kuadër të plotë, është se faktori i prerjes rrit në mënyrë efikase zmadhimin maksimal të një makrobjektivi 1,0x në 1,6x.

Për entuziastët që kërkojnë ta çojnë makrofotografinë e tyre krijuese një shkallë më tej, gama e kamerave me kuadër të plotë nga Canon është ideale. Për shembull, numri i lartë i MP i sensorëve me kuadër të plotë në kamerat EOS R8 dhe EOS R6 Mark II u mundëson atyre të ruajnë një cilësi të jashtëzakonshme imazhi në kushte me ndriçim të dobët për shkrepje të pastra dhe në vlera të larta ISO. Ashtu si EOS R50 dhe EOS R10, të dyja kanë të përfshirë një funksion për grupimin e fokusit i cili është goxha i dobishëm në makrofotografi.

Shumë nga objektivat që vijnë me kamerat Canon EOS kanë distanca mbresëlënëse minimale (MFD). Këtu përfshihet Canon RF 24-105mm F4-7.1 IS STM për kamerat EOS R System, që ka një MFD prej vetëm 13 cm.

Makroobjektivët e shkëlqyer përfshijnë Canon RF 35mm F1.8 MACRO IS STM dhe RF 85mm F2 MACRO IS STM. Ato ofrojnë zmadhim maksimal 0,5x dhe vijnë të kompletuar me fotostabilizues hibridë. Ato korrigjojnë zhvendosjen në planin vertikal dhe në atë horizontal si dhe dridhjet. Krahasuar me fotostabilizuesit e rregullt, fotostabilizuesit hibridë të Canon janë shumë më efikas në shkrepjet dorazi për pamje nga shumë afër.

Për një objektiv optimal, Canon RF 100mm F2.8L MACRO IS USM siguron një zmadhim 1,4x lider në kategorinë e vet si dhe vjen me një unazë kontrolli aberracioni sferik, që ju mundëson të rregulloni pamjen e efektit “Bokeh” në plan të parë dhe në sfond në zonat jashtë fokusit.

Modaliteti i shkrepjes Macro në shumë kamera të Canon punon më së miri, por për poza edhe më krijuese nga afër me kamerat e nivelit amator është më mirë ta merrni vetë në dorë kontrollin. Përdorimi i modaliteteve gjysmautomatike dhe manuale mund t'ju sjellë rezultate shumë më të larta.

Një sfidë e veçantë është se rrezja e qartësisë (distanca mes pikës më të afërt dhe të largët në një skenë që paraqitet me qartësi) bëhet shumë e vogël në fotografinë nga afër dhe absolutisht minimale në shkrepjen e plotë në makro. Për të maksimizuar rrezen e qartësisë, mund të kaloni në modalitet shkrepjeje Av (Aperture priority) dhe të vendosni një aperturë të ngushtë prej rreth f/16 deri në f/22. Përveç nëse ndriçimi është shumë i shndritshëm ama, kjo mund të kërkojë shpejtësi të ulëta shkrehjeje për të arritur ekspozimin e nevojshëm. Zakonisht kjo nuk përbën problem kur përdorni një trekëmbësh.

Makrofotografia e kandrrave kërkon një shpejtësi më të lartë shkrehjeje për fiksimin e lëvizjes. Kjo vlen dhe nëse ka subjekte të tjera të gjalla, për shembull në makrofotografinë e syrit. Një mënyrë për t'ia arritur kësaj kur përdoret një aperturë e ngushtë është të rrisni cilësimin ISO të kamerës. Megjithatë, kalimi në ISO më të lartë mund të sjellë humbje të detajeve të imëta dhe rritje të zhurmës në figurë – ku luajnë rol dhe kapacitetet e kamerave me kuadër të plotë si Canon EOS R8 dhe EOS R6 Mark II.

Shumica dërrmuese e fotove nga afër dhe makro përfitojnë së shumti nga një editim i lehtë. Nëse distanca minimale e fokusimit e objektivit tuaj ju kufizon në afrimin e mëtejshëm ndaj subjektit, mos u mërzisni. Prerja krijuese në stadin e editimit ju mundëson heqjen e periferisë së padëshiruar nga imazhi duke ruajtur vetëm zonën që dëshironi të ruani.

Asgjë nuk është gjithnjë perfekte. Kur shkrepni makrofotografi apo plane të afërta, niveli i tepërt i detajeve të imëta që do të shkrepni do t'ju theksojë edhe grimcat e pluhurit, njollat dhe cene të tjera. Funksioni i furçës korrigjuese apo klonuese në programin fotoeditimit mund t'i maskojë më së miri këto, duke kopjuar të dhënat e ndriçimit, ngjyrës dhe relievit nga pikselët fqinjë.

Versionet e fundit të Canon Digital Photo Professional (DPP) vijnë dhe me një funksion Depth Compositing. Ky automatizon procesin e konvertimit të një grupi fotosh të shkrepura me modalitetin për grupimin e fokusit të kamerave të EOS R System, që nuk e kanë opsionin e integruar në kamerë, duke i bashkuar në një imazh të vetëm. Është ideal për zgjerimin e rrezes së qartësisë në makrofotografi dhe planet e afërta.

Shpresojmë që këto këshilla e teknika të kenë treguar sa e lehtë është të hidhni hapat e parë në makrofotografi dhe t'ju ketë frymëzuar të nisni nga puna me detajet duke shkrepur planet tuaja të afërta.


Shkruar nga Matthew Richards