MAKROFOTOGRAFIA

Përhumbuni në detaje: 4 teknika për të shkrepur makro në shtëpi

Shtëpia është përplot me shanse të lehta për realizimin e pozave krijuese nga afër. Frymëzohuni nga detajet në dhomën e ndenjjes, kuzhinë apo parvazin e dritares.
Një pozë plani të afërt bardhezi e një nëne që puth një foshnjë që fle të cilën e mban në sup.
Fotografia nga afër është një mënyrë e mirë për të qenë krijues me çfarë keni në shtëpi. Qofshin rrudhat në pëllëmbët e duarve të një foshnje, detajet komplekse në gjethet apo petalet e bimëve të shtëpisë apo flluskat e sapunit në lavamanin e kuzhinës, zbulimi i gjërave të vogla që mund të keni anashkaluar mund t'ju sjellë gëzim, frymëzim dhe perspektiva të panumërta për të fotografuar.

Argëtimi i planeve të afërta apo makrofotografia nuk ka kufij - mund të gjeni subjekte të shkëlqyera në çdo dhomë të shtëpisë suaj. Pavarësisht llojit të kamerës që keni në shtëpi, mund të afroheni diku dhe të eksploroni detajet mahnitëse. Një objektiv (apo komplet) zmadhues standard, apo edhe një kamerë kompakte mund të realizojë foto të bukura. Këtu gjashtë fotografë ndajnë disa nga gjërat e vogla, por tërheqëse që kanë fotografuar në shtëpi dhe zbulojnë se çfarë i ka frymëzuar për t'u hedhur një shikim nga afër.

1. Zmadhoni bebushin tuaj

Një plan i afërt i kokës së një foshnje që qëndron shtrirë me kurriz.

Këtu, fotografja Kate Gray e ka vendosur të sapolindurin në një shtrat pranë dritares për të shfrytëzuar burimin e dritës natyrale. "Kjo përbën një bazë të mirë për marrjen e këndeve të larta dhe të ulëta të shkrepjes, si dhe për ta mbajtur vetë foshnjën sa më komode," - shpjegon ajo. Shkrepur në Canon EOS 5D Mark III (tani pasuar nga Canon EOS 5D Mark IV) me objektiv EF 100mm f/2.8L Macro IS USM në 1/320 sek, f/2.8 dhe ISO 500. © Kate Gray Photography

"Ishin fotot që u kisha nxjerrë fëmijëve të mi kur ishin bebe që më frymëzoi të shkrepja nga afër edhe për familjet e tjera," - thotë fotografja e familjeve, Kate Gray. "E dija se pa ato foto as nuk do t'i mbaja mend gropëzat në gishtat topolakë të vajzës sime apo mënyrën si mblidhej lëkura rreth syve të djalit tim gjatë buzëqeshjeve të tija të para pa dhëmbë."

Ndërsa një makroobjektiv është ideal për pozat nga afër, mund dhe të arrini rezultate të mira me një objektiv zmadhues standard apo dhe fiks. Objektivi komplet Canon EF-S 18-55mm f/3.5-5.6 IS STM për shembull mund të fokusojë deri në 25cm, duke inkuadruar kështu më së miri edhe detajet më të vogla.

Shumica e makroobjektivave të dedikuar kanë gjatësi fokale telefoto që është ideale për izolimin e çdo elementi dhe nëse përdorni objektiv zmadhues, thjesht kujtohuni të rrisni zmadhimin. Pastaj vendoseni aperturën në f/5.6, ose më të shpejtë nëse ka dhe përdorni fotostabilizimin për të eliminuar rrezikun e dridhjes së kamerës. Së fundi, rregulloni kuadrin dhe afrohuni sa më shumë të jetë e mundur te subjekti. Do të humbisni fokusin nëse afroheni më shumë se distanca minimale e fokusit të objektivit, ndaj mund t'ju duhet të lëvizni disi para-mbrapa për ta gjetur saktë pozicionin.

2. Kapni kompleksitetin e natyrës

Një figurë tepër e zmadhuar e një floku dëbore në detaj kompleks mbi një material të zi me push.

"Duke shkrepur në f/8, i dhashë përparësi aperturës pasi më duhej të ishte e ngushtë duke futur më shumë nga floku i dëborës në fokus," - thotë fotografi Jamie Spensley. "Në vijim i balancova cilësimet për të qenë thuajse figurë e zezë në ndriçim natyral duke e caktuar ISO në 200 dhe shpejtësinë e shkrehje në 1/100 sek. Në vijim mora disa imazhe referencë në fuqi të ndryshme të blicit për të parë çfarë funksiononte më mirë për ta ekspozuar siç duhet figurën." Shkrepur në Canon EOS 80D me objektiv Canon EF 100mm f/2.8 Macro USM. © Jamie Spensley

Një pozë nga afër e bimës së lakërishtës me një pikë uji ngjitur.

"I kam vënë re gjithnjë gjërat e vogla, ndaj dhe makrofotografia u bë natyrshëm e preferuar për mua," - thotë fotografja Agi Wojcik. "Në pranverën e 2020 nisa t'i rris vetë barishtet dhe perimet dhe vura re sa të bukura dukeshin gjethet e gjelbra pasi i ujisja. Doja të kapja vezullimin e diellit në pikat e ujit, sepse e dija se nuk do të qëndronte për shumë kohë mbi gjetje." Shkrepur në Canon EOS RP me objektiv Canon RF 35mm F1.8 MACRO IS STM në 1/250 sek, f/8 dhe ISO 800. © Agi Wojcik

Makroja mund të nxjerrë në pah thesare të papara natyrore, nga motive si labirint në pjesën e pasme të gjetheje deri te kompleksiteti unik i një floku të përsosur dëbore. Dhe fotografimi nga afër ju jep shanset ta shkrepni bukurinë e natyrës kudo, duke përfshirë parvazin e dritares në një ditë të ftohtë dhe me shi.

Një xhaketë e zezë ishte sfondi i vetëm që iu desh Jamie Spensley-t për të nxjerrë në pah detajet mahnitëse të një floku të bardhë dëbore. Ai arriti atë ndriçimin e veçantë të zbutur duke përdoru një makrodifuzor. "Është një kon materiali të bardhë që përshtatet rreth pjesës së parme të objektivit tim. Pastaj ka një tunel materiali reflektues që i vendoset blicit për të ndihmuar dritën të futet në kon. Rezultati përfundimtar është një dritë tepër e butë, ideale për makrot."

Për mënyra të mëtejshme si të bëheni krijues me dritën kur shkrepni nga afër, objektivat EF-S 35mm f/2.8 Macro IS STM dhe EF-M 28mm f/3.5 Macro IS STM kanë të dy Macro Lite që u mundëson fotografëve të afrohen pa hedhur hije.

Fotografja Agi Wojcik përdori modalitetin Close-up Scene për të fotografuar lakërishtën në apartamentin e saj. "Kështu nuk më duhej të shqetësohesha për cilësimet dhe mund të përqendrohesha më mirë nëse fokusi ishte në nivelin e duhur. Përdora gjithashtu Spot AF dhe një opsion shumë praktik Magnification në modalitetin Live View. Pasi pashë sa mirë doli fotoja, u frymëzova të merrem me kamerën duke eksploruar subjekte të tjera përreth shtëpisë."

3. Gjeni të jashtëzakonshmen tek e zakonshmja

Një makrofotografi e një lapsi që vizaton një vizë në letër.

"E caktova ISO relativisht të ulët pasi kishte dritë të mjaftueshme," - thotë fotografi Lucas Piltz. "Apertura ishte në f/7.1, ndaj kishte zona të mëdha qartësie, ndërsa shpejtësia e shkrehjes ishte vënë në 1/100 sek." Shkrepur në Canon EOS 250D në 1/100 sek, f/7.1 dhe ISO 800. © Lucas Piltz

Për shumë artistë, lapsi i thjeshtë është fillimi i gjithçkaje, dhe duke e fotografuar nga afër fotografi Lucas Piltz ka gjetur një mënyrë për të festuar dhe përqafuar anën e tij krijuese.

Lucas-i zgjodhi të shkrepte një sekuencë fotosh për të arritur thellësi më të madhe qartësie se ç'do të kish qenë normalisht e mundur. "Përdora një stativ për të shmangur dridhjet," - thotë ai, - "dhe e fokusova manualisht pasi kam më shumë kontroll dhe mësoj më shumë ashtu. Fillova nga pjesa më përpara e fokusit dhe vazhdova me mbivendosje deri në fund." Me pamjen të inkuadruar, Lucas-i shkrepi 40 variante të lapsit të gjitha me pikë të ndryshme fokale, përpara se t'i bashkonte.

Kjo teknikë quhet mbivendosje fokusi dhe mund ta bëni duke bashkuar një grup pamjesh me pikë të ndryshme fokusi në programin Canon's Digital Photo Professional.

4. Gjeni një perspektivë abstrakte në gjërat e përditshme

Një makrofoto e vajit në ujë, që krijon pika rrethore, me ngjyrë vjollcë.

Andrea Hunt përdor përbërës të thjeshtë, si p.sh. vaj dhe ujë për të krijuar një pamje surreale në imazhet e saj abstrakte. Ndryshimi i sasisë së vajit dhe vendosja e sendeve të ndryshme me ngjyra nën tabakanë që mban uji ju jep motive të panumërta unike. Shkrepur në Canon EOS 7D Mark II me objektiv Canon EF 100mm f/2.8L Macro IS USM në 1/100 sek, f/10 dhe ISO 1250. © Andrea Hunt

Një foto nga afër e flluskave të lëngut të larjes me ngjyrë të verdhë.

Tibo Tuypens përqafon fuqinë e gjeometrisë për të ndezur imagjinatën e shikuesit. "I kam përdorur objektivat e mi Canon EOS 7D Mark II dhe EF-S 60mm f/2.8 Macro USM, lidhur me asgjë më shumë se një blic Speedlite," - thotë ai. "Mund të rri pa frikë në ISO 100 me shpejtësi shkrehësi prej 1/400 sek dhe aperturë prej f/2.8 për ta mbajtur sfondin të turbullt." © Tibo Tuypens

"Si punonjës shëndetësie me vrull të lartë pune, unë e përdor fotografinë si një mjet ndërgjegjësimi për të më mbajtur në hare dhe të relaksuar gjatë kohës sime të lirë," - shpjegon makrofotografja Andrea Hunt. "Makrofotografia zbulon detaje që shikohen rrallë dhe shumë krijimtari mund të arrihet nga brenda caqeve të shtëpisë dhe të oborrit tuaj."

Për të rikrijuar pozat surreale të Andrea-s do t'ju duhet një tavë qelqi, e ngritur mbi dysheme në secilin kënd dhe e mbushur me ujë. Në vijim shtoni vaj – gradualisht, që të mund të eksperimentoni me sasi të ndryshme. Për t'i shtuar vajit ngjyra që tërheqin shikimin, Andrea vendos një smartfon apo tabletë nën tavë me një ekran me ngjyra, por mund të përdorni dhe karton apo letër muri me ngjyrë.

Kur shkrepni pozë me vaj pluskues, është më e lehtë të fokusoheni manualisht dhe të shkrepni në modalitet Aperture priority (Av). "Shkrepja në f/10 më jep thellësi të mjaftueshme qartësie për të mbuluar një shtresë me vaj pa arritur fundin e enës së qelqit," - thotë Andrea.

Mund të përdorni të njëjtën teknikë për t'u dhënë hare punëve të shtëpisë. Fotografi Tibo Tuypens gjeti një lëng enëlarës që mund të prodhojë forma të bukura gjeometrike, thjesht duke shtuar pak pika në një shtresë të cekët uji në një tavë.

Për sfond, Tibo-s i pëlqen të përdorë letra me ngjyra. "Në vijim përdor një blic për të pasqyruar ngjyrat përmes ujit," - thotë ai. "Kjo funksionon mirë për kombinimin e ngjyrave dhe krijimin e gradacioneve."

Për të prodhuar flluska, thjesht kapni një pipë dhe fryjeni në ujë - pastaj filloni të shkrepni! "Çfarëdo të vendosni përpara objektivit tuaj, është gjithmonë një kënd lojërash me forma, tekstura dhe dritë të shpërhapur," - thotë Tibo.

Shkruar nga Phil Hall

Produktet e lidhura

Artikuj të ngjashëm

  • Makrofotografia abstrakte: shkrepja e flluskave të sapunit

    MAKROFOTOGRAFIA

    Makrofotografia abstrakte: shkrepja e flluskave të sapunit

    Mësoni si të shkrepni pamje të arrira abstrakte makrofotografie shumëngjyrëshe të flluskave të sapunit me këtë udhëzues të thjeshtë hap pas hapi.

  • Një plan i afërt i një merimange kërcyese të kafenjtë.

    MAKROFOTOGRAFIA

    Zbuloni botën e insekteve

    Zbuloni jetët e fshehta të krijesave të vogla me këshillën e Pierre Anquet.

  • get-inspired-macro-photography-tips-1-hub

    MAKROFOTOGRAFIA

    Këshilla për makrofotografinë

    Fotografia nga afër (ose makro) krijon një hapësirë të re për ju dhe aparatin tuaj EOS.

  • MAKROFOTOGRAFIA

    Shkrepja e luleve të pasqyruara në bulat e ujit

    Bëhuni krijues me makrofotografinë dhe mësoni si të shkrepni foto të bukura të luleve të pasqyruara në bulat e ujit.