FOTOGRAFIA E UDHËTIMEVE

Kompleti optimal i Canon për fotografinë e udhëtimeve

Përgatituni për aventurë: pajisje fotografike udhëtimi për fillestarët, krijuesit dhe entuziastët.
Një person duke nxjerrë një fotografi me një kamerë dhe objektiv Canon në një plazh në perëndim të diellit.

Kanë ikur kohët kur fotografimi i udhëtimeve ishte diçka e thjeshtë sa blerja e një aparati njëpërdorimësh për pak foto të paqarta plazhi për një album familjar të bërë vetë.

Me rritjen shpërthyese të platformave sociale të shpërndarjes së fotografive e videove, si dhe përhapjen e albumeve në internet, tani bëjnë punë vetëm imazhet cilësore. Smartfonët janë fantastikë, por për të prodhuar fotografi dhe printime që lënë pa fjalë, ju nevojitet një kamerë e dedikuar – një kamerë që funksionon mirë gjatë gjithë vitit, pavarësisht nga kushtet me të cilat përballeni, ndërkohë që është sakaq mjaftueshëm e vogël për t'u futur në çantën tuaj të dorës. E njëjta gjë vlen dhe për objektivat, të cilët kanë nevojë për shkathtësi për të ndjekur ritmin e aventurës pa asnjë kompromis në cilësinë e imazhit.

Ka shumë gjëra që duhen marrë parasysh, por ne kemi përgatitur një udhëzues për pajisjet më të mira të fotografimit të udhëtimit. Pra, nëse jeni fillestar që mezi pret të hedhë hapat e parë, bloger udhëtimesh në zhvillim që kërkon të mahnitë ndjekësit apo krijues me një profil në rritje dhe i etur për ta shpënë përmbajtjen dhe çantën e kompletit tuaj në një nivel tjetër, mund të keni besimin se keni mjetet që ju nevojiten për të arritur suksesin.

Kamerat më të mira të udhëtimit për fotografë të rastësishëm dhe pushime familjare: Canon Zoemini S2 dhe Canon PowerShot ZOOM

Një Canon Zoemini S2 qëndron sipër një palë xhinsesh të palosura, rrethuar nga printime fotografish të vogla.

Canon Zoemini S2 përshtatet më së miri në xhepin tuaj, ndërsa ju ofron gjithçka që ju nevojitet për të bërë foto dhe autoportrete të mrekullueshme familjare kudo që të ndodheni.

Një familje në fshat tregon diçka mbi ta. Burri po përdor një Canon PowerShot ZOOM.

Një kamerë-monokël e përmbledhur në një trup të vogël, Canon PowerShot ZOOM vjen me një zmadhim të jashtëzakonshëm 800mm dhe strukturë intuitive të butonave, që të mund ta shkrepni aksionin edhe nga larg.

Pushimet familjare janë më shumë sesa thjesht një arratisje nga rutinat e përditshme. Ato janë kohë e çmuar e kaluar me njerëzit më të afërt me ne, ku janë krijuar disa nga kujtimet tona më të vyera.

Me sensorin e tij 8MP, Canon Zoemini S2 është një shok i shkëlqyer pushimesh që sjell momente të çmuara në jetë teksa i jetoni. Një kamerë dhe printer ultraportativ, Canon Zoemini S2, ju lejon të bëni autoportrete të shkëlqyeshme, duke përdorur pasqyrën e integruar dhe unazën e dritës për të përsosur pozën dhe ekspozimin tuaj. Më pas, mund të zgjidhni të printoni në vend në më pak se një minutë ose t'i ruani imazhet në një kartë Micro SD dhe t'i printoni më vonë.

Duke çiftuar Canon Zoemini S2 me programin Canon Mini Print, mund të kontrolloni gjithashtu kompozimin tuaj në kohë reale, të personalizoni imazhet përpara printimit dhe madje të printoni foto direkt nga smartfoni juaj.

PowerShot ZOOM ju afron edhe më shumë me aksionin, duke e bërë ideale për pushimet tuaja të ardhshme në safari. Me një gjatësi fokale maksimale prej 800mm, kjo kamerë monokël madhësie xhepi, me superzmadhim është mjeti i përsosur për kur keni nevojë për një rreze pak më të gjatë. Një sensor 12MP dhe fotostabilizimi me 4 boshte e bëjnë këtë stacion kompakt një opsion të shkëlqyer për të gjitha format e udhëtimit, si dhe për vrojtimin e shpendëve, aktivitete sportive dhe argëtim të përgjithshëm familjar.

Kamera më e mirë e udhëtimit për fillestarët dhe krijuesit e përmbajtjes: Canon EOS R10

Duar që mbajnë një Canon EOS R10, duke parë ekranin që paraqet një shatërvan dhe gjelbërim.

Ndërsa Canon EOS R10 peshon vetëm 429g, objektivi shoqërues i kompletit, Canon RF-S 18-45mm f4.5-6.3 IS STM, prej 130g, është po aq i vogël ndërsa vjen me një gamë zmadhimi dhe fotostabilizim universal. Kombinimi i të dyjave u jep fotografëve fillestarë dhe me përvojë një kombinim të fuqishëm, por gjithsesi të lehtë.

Canon EOS R10 është zgjedhja perfekte si për fotografët e rinj, ashtu edhe për fotografët me përvojë të udhëtimeve. Si një opsion ekonomik në EOS R System të Canon, EOS R10 mundëson mbërthyesen e nivelit profesional të objektivave RF, duke u ofruar fillestarëve një gamë të gjerë objektivash me fokusim të shpejtë dhe duke u dhënë shumë hapësirë ​​për t'u zhvilluar. Një specifikim mbresëlënës teknik sakaq e bën këtë kamerë të përshtatshme edhe për entuziastët dhe krijuesit e njohur të përmbajtjes, të cilët kanë nevojë për funksione që e ngrenë përmbajtjen e tyre në nivele të reja.

Me sensorin e tij 24.2MP APS-C, EOS R10 prodhon fotografi të pastra dhe video të përsosura 4K për videoblogime dhe histori me pamje profesionale. Dhe duke përdorur një sistem të avancuar vetëfokusimi, të aftë për të gjurmuar sytë, fytyrat, kafshët dhe automjetet, përmbajtja juaj do të jetë gjithmonë e mprehtë, edhe në dritë të ulët.

EOS R10 vjen gjithashtu me një ekran me prekje me kënd të ndryshueshëm për kompozim të suksesshëm pavarësisht nga këndi, dhe një blic të integruar për shkrepjen gjatë natës ose kur drita është e pakët. Dhe peshon vetëm 429g, saqë mbajtja me vete nuk do t'ju bëhet angari qyteteve gumëzhitëse apo maleve të thepisura.

Kamera më e mirë kuadërplotë për të apasionuarit pas fotografisë së udhëtimeve: Canon EOS RP

Një burrë me rroba banje qëndron ulur në një plazh shkëmbor, një dërrasë sërfi në prehër.

Me sensorin e tij kuadërplotë, konstruksionin kompakt dhe mundësinë për shkrepje të heshtur, Canon EOS RP është një zgjedhje intuitive për fotografët që duan të përjetojnë një kamerë të EOS R System. Shkrepur në Canon EOS RP me objektiv Canon RF 35mm F1.8 MACRO IS STM në 1/3200 sek, f/1.8 dhe ISO100. © Jitka Smelhausova

Për fotografët me shumë vula në pasaportën e tyre, të cilët kërkojnë ta çojnë përmbajtjen e tyre në nivele edhe më të larta, një kamerë kuadërplotë, si Canon EOS RP, mund të ndihmojë vërtet në nxitjen e krijimtarisë.

Sensorët e mëdhenj në kamerat kuadërplota janë më të ndjeshëm ndaj dritës sesa sensorët më të vegjël. Kjo do të thotë se mund të kapin një diapazon më të gjerë dinamik - shumë të dobishëm kur shkrepni në klimat me diell - dhe të nxjerrin më pak zhurmë në ISO të lartë. Ato gjithashtu japin kontroll shtesë mbi rrezen e qartësisë për rregullimin e imët të turbullirës dhe të efektit Bokeh, duke i përshtatur ato me portretet kulturore në rrugë dhe duke kapur dritat vezulluese të një peizazhi të qytetit gjatë natës.

Me regjistrimin e videos 4K, aksesin në gamën e objektivave RF profesionalë të Canon dhe vetëfokusimin inteligjent që do të prisni nga një kamerë EOS R System, EOS RP është ideale për krijuesit që dëshirojnë të prodhojnë përmbajtje të nivelit profesional. Ai gjithashtu peshon vetëm 485g dhe është rezistent ndaj ujit dhe pluhurit – ideal për aventura.

Kamera më e mirë kompakte për videoblogerët dhe blogerët e udhëtimeve: Canon PowerShot G7 X Mark III

Një burrë qëndron në një plazh me guralecë përballë një zjarri të vogël. Një Canon PowerShot G7 X Mark III është vendosur në një stativ me një mikrofon mbi një shkëmb përpara tij.

Me gamën e saj të gjerë fokale, të barasvlershme me 24-100mm në një kamerë kuadërplotë, çdo gjë nga videoblogimet dorazi deri te fotografitë e portreteve dhe të kafshëve të egra është e mundur me modelin ultraportativ Canon PowerShot G7 X Mark III.

Një grua duke qëndruar në një rrugë, duke i buzëqeshur kamerës, duke mbajtur lart një Canon PowerShot G7 X Mark III me një mikrofon dhe dorezë stativ të bashkangjitur.

Stativët janë aksesorë tepër të dobishëm kur udhëtoni, pasi japin stabilitet si për përmbajtjen e videos ashtu edhe për fotot. Canon Tripod Grip HG-100TBR është një stativ i lehtë, kompakt, i cili futet lehtësisht në një çantë shpine dhe shërben edhe si dorezë për videoblogime.

Kur ju pushton dëshira e udhëtimit, shpesh koha del sa për të rrëmbyer një çantë shpine dhe për t'u nisur. Në këto situata, ku hapësira ka më shumë rëndësi, PowerShot G7 X Mark III është partneri i përsosur i udhëtimit.

Duke arritur ekuilibrin përfundimtar të performancës dhe profilit, PowerShot G7 X Mark III përmban një sensor të madh imazhi të tipit 1.0, duke ofruar foto mbresëlënëse 20.1MP dhe video 4K brenda një trupi nën 11cm gjerësi dhe vetëm 300g peshë – kështu që nëse jeni pa hapësirë ​​në çantën tuaj të shpinës, thjesht mund ta futni në xhep. Mund të kaloni gjithashtu nga fotografitë në video dhe ta ndryshoni përsëri me një lëvizje të lehtë.

Me ekranin me anim 180° dhe aftësitë e transmetimit të drejtpërdrejtë, kjo kamerë është projektuar gjithashtu duke pasur parasysh videoblogimet, ndërsa apertura e saj e shndritshme maksimale prej f/1.8, AF me gjurmim fytyre dhe objektivat zmadhues me kënd të gjerë sigurojnë që ju dhe mjedisi juaj të jeni gjithmonë të ekspozuar saktë, në fokus dhe në kuadër.

Megjithatë, PowerShot G7 X Mark III nuk është vetëm për videoblogerët. Çmimi i tij i përballueshëm dhe gama e fuqishme e veçorive e bëjnë atë një nga kamerat më praktike për udhëtimet për fotografët fillestarë.

Gati për të nisur në një aventurë? Sigurohuni që të shkarkoni programin Canon Camera Connect në mënyrë që të mund të lidhni kamerën me smartfonin dhe të ndani fotot e udhëtimit direkt në kanalet tuaja sociale. Programi ju mundëson gjithashtu ta komandoni kamerën nga distanca për shkrepje pa lëkundje dhe video të qëndrueshme.

Objektivi më i mirë fiks me kënd të gjerë për fotografimin e udhëtimeve: Canon RF 35mm F1.8 MACRO IS STM

Një tas me patate dhe makarona me borzilok shkrepur nga sipër me një pirun, gjethe borziloku dhe shtypës e havan në kuadër.

Me 5 nivele fotostabilizimi për shkrepje dorazi pa turbullime dhe aftësinë makro 0.5x, Canon RF 35mm F1.8 MACRO IS STM është një zgjedhje e qartë për shkrepjen e gatimeve të shijshme të një restoranti të largët diku. Për më tepër, motori i tij i qetë me fokus STM e bën një objektiv fantastik për videoblogime dhe transmetime të drejtpërdrejta. Shkrepur në Canon EOS RP me objektiv Canon RF 35mm F1.8 MACRO IS STM në 1/125 sek, f/2.5 dhe ISO800. © Natasha Alipour-Faridani

Ka një arsye pse Canon RF 35mm F1.8 MACRO IS STM favorizohet nga fotografët e rrugës, fotografët e portreteve si dhe fotografët e udhëtimeve. Mjaftueshëm i gjerë për peizazhe të gjera të qytetit, pamje gjithëpërfshirëse të peizazhit dhe pamje nga afër, me një profil diskret, aperturë maksimale të shpejtë dhe zmadhim MACRO deri në 1:2, funksionon shkëlqyeshëm për një sërë zhanresh.

Megjithëse i projektuar për kamera kuadërplota, RF 35mm F1.8 MACRO IS STM mund të përdoret edhe në trupat APS-C, si Canon EOS R10, ku do të kapte një fushëpamje të barasvlershme me një objektiv 56mm në një trup modeli kuadërplotë.

Objektivi më i mirë fiks për fillestarë, për fotografimin e udhëtimeve dhe të rrugëve: Canon RF 50mm F1.8 STM

Një grua me buzëkuq kthen kokën për të parë nga kamera. Dritat vezulluese mund të shihen në sfond.

Me një veshje objektivi asferike, imazhet e shkrepura duke përdorur Canon RF 50mm F1.8 STM do të jenë të mprehta nga cepi në cep, ndërsa përmasat e tij të vogla e bëjnë një aksesor të çmuar në kompletin tuaj, pavarësisht nëse jeni fillestar i aventurës apo eksplorues me përvojë.

Një 'nifty fifty' si Canon RF 50mm F1.8 STM është dhe modeli i parë i përshtatshëm për fillestarët që duan të fillojnë të bëhen krijues me fotografinë e tyre të udhëtimit. Apertura e gjerë maksimale prej f/1.8 e këtij objektivi ju lejon të arrini një rreze qartësie tepër të cekët, për portrete të bukura që shprehin vërtet identitetet kulturore të njerëzve që takoni.

Ai gjithashtu thith shumë dritë, që do të thotë se do të jeni të përgatitur për çfarëdo skenari ndriçimi që ju nxjerrin përpara aventurat tuaja. Vendoseni këtë në një kamerë APS-C dhe do të keni ekuivalentin e një fushepamjeje 80mm në një kamerë kuadërplotë.

Objektivi optimal zmadhues universal për fotografinë e udhëtimit: Canon RF 24-105mm F4-7.1 IS STM

Një rrugë e ngushtë, dredha-dredha me shtëpi prej guri të zbehtë, me vazo balte të mbushura me barbarozë që varen nga muret.

Me një distancë minimale fokusimi prej vetëm 13cm duke përdorur makro me fokus qendror 0.5x, Canon RF 24-105mm F4-7.1 IS STM do t'ju lejojë të kapni detajet më të imëta. Nuk duhet të shqetësoheni as nëse lëkundjet e kamerës do t'ju prishin fotografitë, pasi ky objektiv përmban një fotostabilizues optik me 5 nivele. Shkrepur në Canon EOS RP me objektiv Canon RF 24-105mm F4-7.1 IS STM në 50mm, 1/320 sek, f/5 dhe ISO800.

Po udhëtoni lehtshëm dhe keni vend në çantën tuaj të shpinës vetëm për një objektiv? Modeli universal Canon RF 24-105mm F4-7.1 IS STM është një zgjedhje e shkëlqyer. Gama e tij fokale gjithëpërfshirëse ofron shkathtësi të jashtëzakonshme, të përshtatshme për çdo gjë, nga videoblogimet dorazi deri te portretet mahnitëse. Për më tepër e përmbledh këtë gamë mbresëlënëse me fotostabilizim me 5 nivele për shkrepje dorazi dhe në ndriçim të ulët, në një trup që shënon nën 9cm dhe peshon vetëm 395g. Në një sensor APS-C, diapazoni fokal i këtij objektivi është i barasvlershëm me 38.4-168mm në një kamerë kuadërplotë.

Për adhuruesit e aventurës, këto kamera, objektiva dhe aksesorë të përshtatshëm për çanta shpine janë vërtet shoqëruesit më të mirë, duke prodhuar imazhe dhe video mahnitëse pa kompromentuar lirinë tuaj për të udhëtuar. Për më shumë frymëzim për fotografitë e udhëtimeve, zbuloni se si ia doli profesionistja, Diana Millos, kur kaloi 48 orë në Seviljen e bukur me Canon EOS R10.


Shkruar nga Peter Wolinski

Produktet e lidhura

Artikuj të ngjashëm