FOTOGRAFIA E BEBEVE

12 këshilla për fotografinë e bebeve që mund t'i përdorni sot

Ruani ato momente të çmuara dhe kapni zhvillimin e fëmijës tuaj me mënyrat tona të zgjuara për të bërë fotografinë e foshnjës dhe për të marrë rezultate të shkëlqyera.
Një bebe duke mbajtur një arush ulur në një jorgan me pulla në shtrat, duke buzëqeshur drejt e në kamerë. © Tomshkova Tatjana / Shutterstock

Fotografimi i bebeve është një kënaqësi që shumë prindër, anëtarë të familjes dhe shokë të dashur do të nxitojnë t'i shijojnë sapo të njihen me beben e sapoardhur dhe është e lehtë ta kuptosh se pse: bebet janë jashtëzakonisht të këndshme dhe, me rritjen e tyre, fillojnë të shkëlqejnë gjithmonë e më shumë veçori të personaliteteve të tyre. Pavarësisht nëse janë duke qeshur, kureshtarë, të menduar ose plot energji, fotografia është një nga mënyrat më të mira për të ndjekur dhe ruajtur këto zhvillime unike dhe të shpejta.

Çdo person mund ta realizojë një shkrepje të shpejtë, por këto teknika do t'ju ndihmojnë të realizoni imazhe të mrekullueshme që kapin vërtet momente të tilla të çmuara - gati për t'i ndarë me familjen dhe njerëzit e dashur kudo ku janë.

1. Zgjidhni kohën më të mirë

Një bebe me kapelë rozë dhe pulovër gri/kafe shtrirë anash mbi batanijen e kafenjtë duke parë dhe duke i buzëqeshur kamerës.

Sa më e lumtur të jetë bebja, aq më e mirë do të jetë fotografia që do të nxirrni, ndaj sigurohuni të zgjidhni kohën më të mirë për ta shkrepur atë çast dhe një kamerë praktike që të mos ju duhet të humbisni kohë duke luajtur me cilësimet. © Samuel Borges Photography / Shutterstock

Me përjashtim të porsalindurve, bebet janë krijesa që ndjekin zakonet e tyre. Thuajse çdo foshnje do të mësohet të bëjë gjëra të caktuara në kohë të caktuara të ditës. Do ta dini se kur foshnja juaj është në momentet e veta më të gëzuara, kështu që përpiquni të regjistroni gjatë këtyre momenteve. Për shembull, foshnja juaj mund të jetë më e qetë pikërisht pas të ushqyerit. Ose pikërisht pas një gjumi para drekës.

2. Regjistroni në nivelin e syve

Një foshnjë e veshur me bluzë rozë të çelët shtrirë anash mbi një batanije pushatore bezhë.

Shkoni më pranë nivelit të syrit të bebes për të nxjerrë një foto që tregon lidhjen e ngushtë mes jush dhe fëmijës. Sigurohuni që vetëfokusimi të vendoset në Single point apo Face + nëse ofrohet, që sytë e bebes të dalin të mprehtë në fokus. Shkrepur në Canon EOS R10 me objektiv Canon RF 50mm F1.8 STM në 1/100 sek, f/2.8 dhe ISO640. © Mark Fensome

Fotografitë klasike të porsalindurve përfshijnë fotografi nga afër të këmbëve dhe duarve të tyre të vogla, ose duke fjetur në supin e nënës dhe babait. Për fëmijët e kopshtit dhe më të mëdhenj, imazhet që përfshijnë lëvizje, që i tregojnë duke luajtur ose në kontekstin e jetës së tyre, janë kujtime të përjetshme. Rregulli i artë për këto lloj fotografish është të regjistroni në nivelin e syve të tyre për të siguruar një ndjesi intimiteti.

Është gjithmonë ide e mirë t'i planifikoni shkrepjet që dëshironi të bëni. Nuk e dini asnjëherë se për sa kohë do të zgjasë humori i mirë i foshnjës suaj, kështu që përgatituni t'i shmangni fotografitë që nuk kanë aq përparësi nëse nuk keni shumë kohë.

3. Konfiguroni kamerën para se të fotografoni

Gjyshi duke shkrepur një foto të nipit me Canon EOS R100 duke ngarë një biçikletë. Gjyshja qëndron pranë duke buzëqeshur.

Sigurohuni ta keni kamerën në dorë kur dini se fëmija apo nipi është duke mësuar diçka të re. Është e rëndësishme t'i kapni çastet që shfaqen një herë në jetë në cilësinë më të mirë të mundshme që t'ju pëlqejë t'i shikoni në të ardhmen. © Gary Morrisroe

Koha është thelbësore kur fotografoni bebet. Në momente qetësie, mund të shikoni se do të keni 10 minuta për të regjistruar. Sigurohuni që t'i keni gati pajisjet kur fillon kjo periudhë që të keni maksimumin e kohës me një bebe të gëzuar. Sigurisht, drita ndryshon dhe bebet lëvizin, kështu që është e pashmangshme që do të duhet t'i rregulloni parametrat kur vazhdoni më tej. Por përgatitja e elementeve bazë - si p.sh. objektivi, modaliteti i ekspozimit, modaliteti i motorit dhe aspekte të tjera thelbësore - siguron që të keni më shumë kohë për të shkrepur.

Me kamerat si Canon EOS R100, është e lehtë që thjesht t'i merrni në dorë e të shkrepni. Modalitetet e automatizuara dhe menytë e ekranet e drejtuara do t'ju ndihmojnë me cilësimet, që të mund të përqendroheni në atë që është e rëndësishme - çasti i çmuar që dëshironi të kapni dhe ruani për vite me radhë.

4. Punoni me dritën natyrale

Një vajzë zezake me një fjongo rozë në kokë i buzëqesh drejtpërdrejt kamerës. Drita natyrale që vjen nga një dritare anësore i shpërhapet njëtrajtshëm në fytyrë.

Nëse jeni duke marrë parasysh një reflektor, sigurohuni të provoni se cila ngjyrë është e duhura për tonalitetin e lëkurës së bebes suaj. Mund të shihni se ana e artë është në fakt më e këndshme se ajo e argjendtë. © pixheadphoto digitalsquilet / Shutterstock

Një fëmijë i ulur në një karrige me lëkundje duke parë nga dritarja përmes së cilës po vjen drita natyrale.

Ndonjëherë çastet më të mira për një foto vijnë ndërsa bëni diçka të zakonshme, si p.sh. përgatitjen e ushqimit për fëmijën tuaj në kuzhinë. Ndaj dhe është e rëndësishme ta keni kamerën gati për shkrepje. Shkrepur në Canon EOS R6 me objektiv Canon RF 85mm F2 MACRO IS STM në 1/400 sek, f/2.0 dhe ISO400. © Ilvy Njiokiktjien

Një mënyrë e bukur dhe intime për t'u dhënë shkëlqim fotografive të bebes suaj është të përdorni sa më shumë dritën natyrale. Një teknikë e thjeshtë është të përdorni një reflektor për të shpërndarë një pjesë të dritës nga dritarja. Nuk keni nevojë për një reflektor profesional fotografish, thjesht një fletë e bardhë ose një letër ose karton i madh i bardhë. Vendoseni fëmijën tuaj pranë një dritareje dhe merrni një shok ose një anëtar të familjes që ta mbajë reflektorin në kënd që drita nga dritarja të ndriçojë hijet në anë të fytyrës së bebes në anën e kundërt me dritaren.

Ndonjëherë është drita që e bën foton dhe ajo që ju mbetet është thjesht të kapni çastin. Sigurohuni që fokusi të jetë në syrin e bebes suaj dhe që kompozimi të duket mirë, dhe shtypni shpejt butonin e shkrehësit për të ruajtur kujtimin fluturak.

5. Përgatitni lentet

Një fëmijë i zhytur thellë në mendime duke parë në distancë me gishtin që duket sikur i prek dhëmbin e sapodalë.

Objektivat e gjatësisë fokale fikse, të njohur dhe si fiksë, janë idealë për portrete në ndriçim të ulët. Shkrepur në Canon EOS R6 me objektiv Canon RF 85mm F2 MACRO IS STM në 1/1600 sek, f/2.0 dhe ISO2500. © Ilvy Njiokiktjien

Një foto nga lart-poshtë në bardhezi që tregon fytyrën e bebes me sytë e mbyllur dhe qerpikët e gjatë.

Ndonjëherë ngjyrat mund të jenë shpërqendruese dhe detajet më të forta kur shkrepen në bardhezi. Mund të kontrolloni nëse fotografia që keni nxjerrë nga bebja duket më mirë në bardhezi brenda kamerës duke shkuar te Picture Styles ose mund ta ndryshoni në pasprocesim nëse shkrepni në format RAW. Shkrepur në Canon EOS R me objektiv Canon RF 35mm F1.8 MACRO IS STM në 1/160 sek, f/2.8 dhe ISO200. © Helen Bartlett

Lentet që përdorni do të varen nga lloji i fotografisë që dëshironi të realizoni. Për poza të përgjithshme, provoni një objektiv fiks si Canon RF 50mm F1.8 STM, i cili ia del me lehtësi me ambientet me ndriçim të ulët, si p.sh. dhomat e gjumit, ose një objektiv portretesh, si p.sh. Canon RF 85mm F2 MACRO IS STM, me shpejtësi të lartë vetëfokusimi që mund të jetë praktike për shkrepjen e lëvizjes si p.sh. ecjen barkas dhe gjatë ngrënies.

Nëse dëshironi të kapni plane të qarta nga afër të tipareve të vogla të bebes suaj - duart, gishtat dhe qepallat - atëherë makroobjektivat si Canon RF 85mm F2 MACRO IS STM, Canon RF 35mm F1.8 MACRO IS STM ose Canon RF 24mm F1.8 MACRO IS STM janë zgjedhje të shkëlqyera.

Në përgjithësi, objektivat me gjatësi fokale fikse, si p.sh. 50mm ose 85mm, janë fantastikë në ambiente të errëta pasi kapin sasi të bollshme drite, falë aperturës së tyre të madhe. Por mund të dëshironi të përdorni një lente me zmadhim për situatat kur foshnja juaj është aktive. Një objektiv zmadhues si Canon RF-S 18-150mm F3.5-6.3 IS STM ju lejon të vijoni me inkuadrimin ndërsa foshnja lëviz përreth dhe ju jep një shans më të lartë për ta nxjerrë pozën brenda një intervali të shkurtër.

6. Shsht! Regjistroni në heshtje

Një vajzë zezake e veshur me uniformë leshi të bardhë buzëqesh në gjumë.

Koha e gjumit e bebes është e çmuar, kështu që sigurohuni të mos e zgjoni me zërin e shkrehësit kur përpiqeni t'i kapni shprehjen e hareshme. Shkrepur në Canon EOS 5D Mark II (tani pasuar nga 5D Mark IV) dhe një Canon EF 24-70mm f/2.8L II USM © Mellz Photography Ltd

Foshnjat mund të shpërqendrohen si edhe të frikësohen me lehtësi nga tingujt e lartë si dhe shkrepjet e obturatorit. Kjo është kur do të jetë e dobishme të përdorni modalitetin e regjistrimit në heshtje ose në qetësi. Nëse keni kamerë EOS si Canon EOS R100, mund të zgjidhni modalitetin e heshtur nga brenda modaliteteve të skenës. Një opsion tjetër është mbulimi i zhurmës së obturaotir me një muzikë argëtuese ose qetësuese, në varësi të humorit të foshnjës që kërkoni.

7. Regjistroni në modalitetin e prioritetit të obturatorit

Një fëmijë zezak po ecën drejt kamerës me dorën lart sikur do të arrijë diçka.

Nëse fotografoni një fëmijë, sigurohuni që kamera të jetë e përgatitur për një subjekt në lëvizje duke e ndryshuar modalitetin në Tv. Shkrepur në Canon EOS R100 me një Canon RF 16mm F2.8 STM në 1/100 sek, f/3.5 dhe ISO1600 © Gary Morrisroe

Në modalitetin Tv (Shutter Priority), mund të caktoni shpejtësinë e shkrehësit që dëshironi dhe kamera llogarit aperturën më të mirë në përputhje me të. Ky modalitet ju jep lirinë të punoni me shpejtësi dhe krijimtari pa qenë e nevojshme të shqetësoheni për të bërë shumë rregullime në mes të fotografive. Për shembull, shpejtësia e obturatorit duhet të jetë mjaft e shpejtë për të shmangur turbullimin e lëvizjes, kështu që kur fotografoni një bebe aktive është mirë të filloni me 1/250 sekonda. Filloni nga aty dhe përshtateni në varësi të aktivitetit.

Zakonisht do të donit që e gjithë fytyra e bebes të ishte në fokus, ndaj është e rëndësishme të kontrolloni që rrezja e qartësisë të mos jetë shumë e ulët. Nëse e lini ISO në automatike, kjo do t'ju ndihmojë të arrini parametrat e dëshiruar për obturatorin dhe hapjen e diafragmës, por kini parasysh se sa më e ulët të jetë ISO, aq më e lartë do të jetë cilësia e imazhit.

8. Përdorni modalitetin e shkrepjes së vazhduar ose shkrepni video

Një video e shkrepur me Canon EOS R100 e një fëmije që mban duart lart dhe ecën drejt kamerës.

Për shumicën e fotografive, ndoshta shkrepni nga një kuadër. Por për portretet e bebeve, duhet të provoni ta kaloni modalitetin e motorit të kamerës në parametrin e regjistrimit të vazhdueshëm. Regjistrimi i vazhdueshëm (i njohur edhe si modaliteti në seri) është i dobishëm sidomos nëse foshnja është në lëvizje! Do t'ju ndihmojë të regjistroni të gjitha lëvizjet e befta të bebes dhe do t'ju japë shansin më të mirë të mundshëm për të kapur çastet ideale, pasi asnjë bebe nuk mund ta mbajë pozën që dëshironi për kohë të gjatë.

Edhe më mirë - bëni video! Kamerat si Canon EOS R100 kanë fotostabilizim dhe vetëfokusim fantastik që do t'ju ndihmojë ta mbani fytyrën të mprehtë ndërsa bebja hedh hapat e parë drejt jush. Momentet si këto meritojnë cilësinë më të mirë dhe nëse shkrepni në 4K mund dhe të nxirrni poza nga filmimet për t'i printuar për fotoalbumin e bebes suaj.

9. Eksperimentoni me pikat e fokusit

Një foshnjë e mbështjellë me një batanije blu shtrirë në një shtrat me këmbët e vogla rozë në fokus.

Ndryshoni cilësimin e kamerës në Scene mode Macro ose Close-up për të shkrepur foto të tipareve të adhurueshme të bebes suaj, si këmbët dhe duart e vogla me gjithçka tjetër që turbullohet në sfond. © James Patherson

Zakonisht në portrete do të kërkoni të fokusoni sytë e subjektit. Por me portretet e bebeve mund të krijoni disa imazhe tërheqëse duke e thyer këtë rregull herë pas here.

Për shkak se bebet janë kaq të vogla, pjesët e trupit si duart dhe këmbët e tyre mund të jenë subjekte interesante. Nëse kamera juaj ka një ekran me prekje, si Canon EOS R10, është thjesht çështje prekjeje në pjesën e ekranit ku shikoni gishtat e dorës ose të këmbës për të realizuar fokusimin. Përdorni i një hapjeje të madhe të diafragmës do të turbullojë çdo gjë tjetër në fotografi, duke e mbajtur fokusin mirë te tipari që dëshironi të fokusoni.

10. Krijoni përplasje të blicit

Një grua e re po nxjerr një foto me një kamerë dhe blic Speedlite duke treguar anash dhe lart një fëmije të ulur pranë tryezës të rrethuar nga familja.

Bëhuni më krijues me fotot e fëmijëve tuaj dhe eksperimentoni me një blic jashtë kamere për të shtuar më shumë dritë të drejtuar. © Tom Martin

Në situatat kur dëshironi të kontrolloni dritën me një blic, është e rëndësishme që të mos e drejtoni blicin te sytë e bebes, pasi drita nga blici mund të jetë shumë e ashpër për bebet e vogla si dhe më të rritura. Në vend të kësaj, përdorni një blic të jashtëm dhe përplaseni dritën në tavan ose në murin përballë. Nëse thjesht dëshironi të eksperimentoni me blicin, Speedlite EL-100 mund të përdoret dhe jashtë kamerës dhe është një opsion i mirë dhe ekonomik me të cilin mund të filloni. Nëse doni të investoni në një blic klasi më të lartë, atëherë Speedlite EL-5 është modeli i duhur.

11. Përdorni një trekëmbësh

Një gjyshe duke mbajtur nipin e saj në krahë dhe duke folur me të.

Nëse dëshironi ta përfshini veten në foto, përdorimi i stativit mund të jetë mënyra më e lehtë për ta bërë. Shkrepur në Canon EOS R100 me një Canon RF 35mm F1.8 MACRO IS STM në 1/320 sek, f/4.0 dhe ISO640 © Gary Morrisroe

Një portret i një familjeje me prindërit dhe 3 fëmijë, të gjithë të ulur në një divan me tullumbace që shkruajnë "Happy Birthday" në murin pas tyre.

Kur dëshironi ta nxirrni të gjithë familjen në një foto për këto raste të veçanta, stativi dhe funksionet e shkrepjes në distancë janë mënyra e duhur. Shkrepur në Canon EOS 800D (tani i pasuar nga EOS 850D) me objektiv Canon EF-S 18-55mm f/3.5-5.6 IS STM në 1/200 sek, f/5.6 dhe ISO400 © Tom Martin

Bebet mund të bëjnë lëvizje të papritura, kështu që një trekëmbësh mund të mos duket si një aksesor ideal, por ai ju lejon t'i keni duart të lira për pozën ose për të tërhequr vëmendjen e bebes dhe për të nxjerrë shprehjet që kërkoni.

Përdorimi i një trekëmbëshi ju lejon po ashtu të përfshiheni në një fotografi dhe të krijoni fotografi klasike të përjetshme me duart tuaja rreth duarve ose këmbëve të bebes, për shembull. Me kamerën e konfiguruar në një trekëmbësh, kalojeni modalitetin e motorit te kohëmatësi autoamtik. Shpesh do të keni opsionet për 2 dhe 10 sekonda. Zgjidhni opsionin 10 sekonda. Mund dhe të përdorni një stativ me telekomandë Bluetooth, si p.sh. Canon Tripod Grip HG-100TBR, për ta bërë më të lehtë shkrepjen e fotove në distancë. Në fillim nxirrni një fotografi provë të vetes suaj ose kërkojini partnerit tuaj ose një shoku që të qëndrojë aty ku synoni të qëndroni, në mënyrë që të rregulloni si duhet parametrat e fokusimit dhe ekspozimit. Ose thjesht hyni në pozicion dhe filloni të shkrepni për të përfituar sa më shumë nga çasti kur foshnja të jetë në humor të mirë.

12. Përdorni aplikacionet

Figura e një personi mban një kamerë Canon EOS R100 pranë një smartfoni, e njëjta pamje shfaqet në ekranin e kamerës dhe programin Canon Camera Connect në telefon.

Mund të përdorni programin Canon Camera Connect jo vetëm për të shkrepur në distancë nga pajisja juaj, por edhe për të transferuar fotot dhe videot për t'i ndarë me të shpejtë me familjen dhe shoqërinë.

Ka shumë programe të dobishme nga Canon që do ta bëjnë më të lehtë dhe më argëtuese shkrepjen, mësimin dhe ndarjen e fotografive.

Nëse keni një kamerë që mbështet Wi-Fi, mund të përdorni programin falas Canon Camera Connect për ta kontrolluar kamerën tuaj nga distanca nga pajisja juaj me Android ose iOS, duke shmangur gjasat e dridhjeve të kamerës. Me kamerën tuaj të montuar në një trekëmbësh, mund të merreni drejtpërdrejt me beben, të monitoroni pamjen e drejtpërdrejtë të kamerës suaj nga telefoni dhe ta aktivizoni obturatorin kur të jetë momenti vendimtar. Mund ta përdorni po ashtu aplikacionin për t'i importuar fotografitë tuaja drejtpërdrejt në telefon për t'i ndarë me lehtësi. Edhe disa kamera të nivelit fillestar, si p.sh. Canon EOS R100, mbështesin transferim automatik, që të mund t'i shqyrtoni dhe ndani fotot nga pajisja juaj portative, menjëherë pas shkrepjes! Shërbimet si p.sh. image.canon janë gjithashtu një alternativë e mirë për transferimin dhe ruajtjen e imazheve tuaja në renë kompjuterike për përpunim dhe shpërndarje të mëtejshme në një stad të mëvonshëm.

Programi Canon Photo Companion ofron këshilla dhe ushtrime të personalizuara që janë të përshtatura me modelin specifik të kamerës suaj. Gjithçka që duhet të bëni edhe të zgjidhni kamerën tuaj EOS kur të kërkohet dhe një mori udhëzuesish me video, artikuj frymëzues dhe këshilla për tema të ndryshme, si p.sh. fotografimi i fëmijëve, janë të disponueshme në majë të gishtave, duke ju lejuar të përmirësoni vazhdimisht fotografinë tuaj dhe të mësoni në vazhdimësi.

Nëse keni një bebe në familjen tuaj, merrni kamerën dhe filloni të kapni të gjitha ato kujtime të çmuara dhe kini parasysh se në vend që t'i lini në kartën SD, ia vlen t'i printoni që të mund të jetojnë së bashku me ju dhe t'ju sjellin vazhdimisht pranë këtyre çasteve të veçanta në kohë.

Shkruar nga Jeff Meyer dhe Agi Wojcik

Produktet e lidhura

  • Kamerat pa pasqyra

    EOS R100

    Krijoni kujtime të përsosura vizuale në cilësi të jashtëzakonshme me këtë kamerë intuitive EOS R që është gjithnjë gati.
  • Kamerat pa pasqyra

    EOS R10

    Kryeni hapat tuaja të radhës në fotografi dhe video me një kamerë pa pasqyra EOS R System të krijuar rreth një sensori madhësie APS-C.
  • Objektivat RF

    RF 35mm F1.8 MACRO IS STM

    Një objektiv me aperturë të shpejtë 35mm f/1.8 për perspektivë këndgjerë, fokusim nga afër dhe Hybrid IS.
  • Objektiv standard

    RF 50mm F1.8 STM

    Një objektiv kompakt, i qetë dhe peshëlehtë 50mm RF fiks, me aperturë të gjerë f/1.8, ideal për shfrytëzimin e vizionit tuaj krijues.
  • Objektivat RF

    RF 85mm F2 MACRO IS STM

    RF 85mm F2 MACRO IS STM ofron fleksibilitet në plane të afërta me kompresion të lehtë telefoto dhe fotostabilizim 5-nivelësh në një trup kompakt e peshëlehtë.
  • Lentet RF-S

    RF-S 18-150mm F3.5-6.3 IS STM

    Një objektiv zmadhues EOS R-series APS-C i gjerë deri në telefoto që është ideal për udhëtime, faunën e egër, sportin dhe stilin e jetesës.
  • Artikujt e lidhur

  • Dy fëmijë me silueta përkundër një sfondi pyjor me diellin e ulët që çan mes pemëve.

    FOTOGRAFIA FAMILJARE

    11 këshilla për fotografinë e familjes

    Zbuloni këshilla e teknika për shkrepjen e portreteve mahnitëse të familjes me përfaqësuesen e nderit të Canon, Helen Bartlett.

  • PRINTIM KRIJUES

    Viti im i parë në printim

    Fotografja e portreteve, Jemella Ukaegbu, tregon këshillat e saj më të mira për të shkrepur dhe ruajtur vitin e parë të fëmijës suaj.

  • Një grua dhe tri fëmijët e saj duke u sjellë rrotull një tasi përzierjeje në një kuzhinë teksa përgatiten për të gatuar diçka. PowerShot PX qëndron përmbi një pirg librash kundrejt tyre.

    FOTOGRAFIA FAMILJARE

    Shkrepini momentet pa u lodhur

    Shkrepni momentet e ditës me lehtësi me anë të Canon PowerShot PX.

  • BAZAT

    Fotografime për printime

    Shtatë këshilla kryesore për fotografimin e kujtimeve që doni t’i ruani duke i printuar.