Dallimi që bën objektivi për portrete

Shumica e kamerave EOS vijnë me një grupi objektivi përdorimi të përgjithshëm që funksionon me shumicën e llojeve të fotografisë. Por, për ta shpënë fotografinë në nivel tjetër, ia vlen të investoni në një gamë objektivash që janë të dobishëm për zhanrin që keni zgjedhur, si p.sh. fotografia e portreteve. Nga gjatësia fokale dhe apertura maksimale deri te pesha dhe madhësia, objektivi që zgjidhni mund të bëjë dallim të madh në fotot tuaja.

Ajo që e dallon kryesisht objektivin për portrete është gjatësia fokale dhe apertura maksimale, por ka dhe të tjera që duhen marrë parasysh kur përcaktoni objektivin më të mirë për portrete nga Canon për nevojat tuaja.

Përputhshmëria e lentes

Së pari, ia vlen të merrni parasysh kamerën që keni dhe objektivat që janë të pajtueshëm me të. Me përdorimin e një kamere Canon EOS R System keni lirinë e zgjedhjes kur vjen puna tek objektivat; falë adaptorëve të montimit të objektivave RF mund të shkrepni dhe me objektiva RF, edhe me EF.

Mbërthyesja RF e Canon është një pikënisje fantastike kur jeni në kërkim të një objektivi për fotografi portretesh. Objektivat RF, që vijnë në kamerat pa pasqyrë të Canon, si p.sh. Canon EOS R6 dhe EOS RP, kanë një lidhje 12-kunjëshe mes objektivit dhe kamerës për shpejtësi tejet të lartë vetëfokusimi dhe qëndrueshmëri. Mundësitë krijuese të ofruara nga teknologjia pa pasqyra e bëjnë mbërthyesen RF investim të dobishëm kur mendoni për modelet e ardhshme gjatë rrugëtimit tuaj të mëtejshëm fotografik.

Stabilizim imazhi

Në vijim, mos harroni se mund të mos doni apo keni gjithnjë mundësinë të përdorni stativ kur shkrepni portrete të arrira. Këtu hyn në punë dhe fotostabilizimi. Objektivat si Canon RF 35mm F1.8 MACRO IS STM, RF 85mm F2 MACRO IS STM dhe RF 24-105mm F4-7.1 IS STM vijnë të gjithë me fotostabilizim, që garanton që imazhet tuaja të jenë super të mprehta kur shkrepni dorazi. Stabilizimi i shtuar ju mundëson të ngadalësoni shpejtësinë e shkrehësit për të marrë çdo dritë sado të vogël në imazhet tuaja, duke ju dhënë fleksibilitetin të shkrepni në të gjitha llojet e skenarëve të ndriçimit. Efekti shumëfishohet kur lidhet objektivi me kamerë që ka fotostabilizim të integruar (IBIS), si p.sh. Canon EOS R6, ku mundësohen deri në 8 nivele stabilizimi.

Madhësia dhe pesha

Duhet marrë parasysh edhe madhësia, pesha dhe fleksibiliteti. Për fotografët e portreteve që kërkojnë të mbeten të zhdërvjellët, ose t'i përdorin objektivat për zhanre të ndryshme, objektivi i vogël dhe peshëlehtë është një zgjedhje optimale. Canon RF 50mm F1.8 STM dhe RF 35mm F1.8 MACRO IS STM janë të dy objektiva tejet kompaktë, çka i bën shtojca ideale dhe ekonomike për fotografët e portreteve urbane. Kjo vjen pa ndonjë sakrificë në potencialin e tyre për portrete klasike, falë aperturave të gjera maksimale prej f/1.8 për turbullim të bukur të sfondit dhe fleksibilitet me rreze qartësie. Për fleksibilitet maksimal ama mos kërkoni përtej Canon RF 24-105mm F4-7.1 IS STM. Me rrezen e gjatë fokale, ky objektiv është modeli ideal i përdorimit të përgjithshëm ditor, ideal për thuajse të gjitha zhanret e fotografisë nga pozat arkitektonike ultra të gjera 24mm deri te portretet e studios 85mm dhe pozat e busteve telefoto 105mm.

Hapja maksimale e diafragmës

Një faktor tjetër kyç në përzgjedhjen e një objektivi të posaçëm për shkrepje portretesh është dhe apertura e tij maksimale. Apertura i referohet madhësisë së hapjes së objektivit që lejon hyrjen e dritës në sensorin e kamerës.

Çdo objektiv merr një klasifikim aperture si p.sh. f/2.8 ose f/4. Disa objektiva zmadhues kanë klasifikim aperture në varësi të gjatësisë së zgjedhur fokale; këto do të shfaqin një diapazon aperture si p.sh. f/4-7.1. Objektivat e tjerë zmadhues, duke përfshirë Canon RF 24-105mm F4L IS USM dhe RF 24-70mm F2.8L IS USM, ofrojnë sakaq një aperturë fikse maksimale për një ekspozim konsistent në të gjithë rrezen e zmadhimit. Këta objektiva, me aperturat e tyre konstante maksimale dhe cilësi konstrukti të L-Series me izolim ndaj kushteve atmosferike janë idealë për fotografët që kërkojnë të përditësohen nga modeli RF 24-105mm F4-7.1 IS STM ose për ata që thjesht kërkojnë një objektiv niveli profesional.

Sa më i ulët numri i aperturës, aq më e madhe hapja maksimale dhe ka avantazhe për shkrepjen e portreteve në objektiva me apertura më të mëdha maksimale.

Një aperturë më e madhe merr më shumë dritë përmes objektivit në kamerë ndaj objektivat me aperturë të madhe, si p.sh. Canon RF 50mm F1.8 STM dhe RF 85mm F2 MACRO IS STM janë idealë për shkrepjen në ndriçim të ulët (portrete të brendshme p.sh.) dhe për rastet kur ju duhet fleksibilitet për të luajtur me dritën si në bardhezi ose portrete abstrakte. Një e mirë tjetër është se shkrepja me aperturë të caktuar në vlerën e vet maksimale, që shpesh quhet dhe si "hapje e gjerë", realizon më shumë turbullim të sfondit që preferohet shpesh nga fotografët e portreteve.

U hedhim një sy disa shembujve të shkrepjes së fotografive portret në apertura të ndryshme.

Kjo nuk do të thotë ama se një objektiv me aperturë disi më të ngushtë maksimale, si p.sh. apertura f/4 e Canon RF 24-105mm F4L IS USM, s'mund të krijojë dot turbullim të bukur, sidomos në gjatësi fokale telefoto. Kjo ndodh për shkak të ngjeshjes së figurës - më e madhe në gjatësitë më të mëdha fokale - ku objektivi tkurr distancën, duke i sjellë faktikisht më pranë subjektit sfondet jashtë fokusi për të krijuar efektin e një turbullimi të arrirë pas tyre.

Gjatësia fokale është distanca mes objektivit dhe sensorit të kamerës kur subjekti është në fokus dhe përcaktohet në mm. Objektivat zmadhues kanë diapazon fokal që përcaktohet si minimum-maksimum, p.sh. 24–105mm. Rëndom, objektivat e portreteve janë ato me gjatësi fokale mbi 85mm, si p.sh. Canon RF 85mm F2 MACRO IS STM, që ka konstruksion peshëlehtë dhe 5 nivele fotostabilizimi për portret të shkrepur dorazi me cilësi të përsosur figure.

Në këtë kompozim klasik busti, një objektiv për portrete 85mm ofron gjatësi më të madhe fokale, çka jep një pamje të natyrshme dhe e veçon modelin nga sfondi. Në një kamerë me sensor APS-C, një objektiv 50mm do të krijojë pak a shumë të njëjtën fushëpamje si objektivi 85mm i një kamere kuadërplotë.

Për krahasim, përdorimi i një gjatësie më të vogël fokale, si p.sh. 24 mm, do ta deformonte fytyrën e subjektit duke i ndryshuar përpjesëtimin e përmasave. Gjithashtu sfondet janë zakonisht më të dallueshme në gjatësitë më të vogla fokale.

Objektivat në mes të diapazonit fokal, si p.sh. Canon RF 35mm F1.8 MACRO IS STM dhe RF 50mm F1.8 STM, mund të jenë gjithsesi fantastikë për portrete. Këto gjatësi fokale i deformojnë imazhet më pak se objektivat këndgjerë për pamje që ndihen më natyrale, duke i bërë fantastikë si objektiva portreti në gjithë trupin – sidomos të dobishëm për fotografët e modës.

Përdorimi i një objektivi zmadhues fleksibël, si p.sh. Canon RF 24-105mm F4-7.1 IS STM, do t'ju japë më të mirën e të dyjave, së gjeri dhe me gjatësi fokale telefoto, si dhe çfarëdo tjetër midis.në mes. Në maksimumin e gjerësisë 24mm, fushëpamja e këtij objektivi është e përshtatshme dhe për portretet më të mëdha në grupe, si dhe mund të përfshijë një masë të madhe konteksti në portretet urbane situacionale, ndërsa gama e sipërme është ideale për portrete klasike dhe poza busti nga afër.

Këndet e gjera mund të përdoren në shkallë të gjerë në portretet situacionale kur ambienti rrethues i subjektit luan një rol kyç në rrëfimin e historisë dhe në portretet në grup, ku në kuadër duhet të përfshihen shumë subjekte.

Nëse doni të shkrepni portrete në grup, ideali është objektivi Canon RF 16mm F2.8 STM. Dhe nëse ndodh të fotografoni një grup në një zonë relativisht të vogël, mund të realizoni një pozë të mirë me një objektiv ultrakëndgjerë.

Ndërsa makroobjektivat mund t'i lidhni me planet e afërta të insekteve interesante ose me ushqime të shijshme, detajet e pabesueshme që arrijnë të kapin janë ideale dhe për portretet. Në fakt makroobjektivat përdoren së tepërmi në portretet e modës dhe të bukurisë për të theksuar tiparet e fytyrës dhe për të theksuar produkte të caktuara kozmetike.

Canon RF 85mm F2 MACRO IS STM vjen me distancë minimale fokusimi prej 35cm, ndërsa RF 35mm F1.8 MACRO IS STM mund të fokusohet deri në 17cm. Duke përdorur një makroobjektiv dhe duke iu afruar subjektit, mund të nxirrni në pah detaje të arrira, duke ekspozuar dhe lartësuar bukurinë individuale të subjekteve tuaja.

Shkruar nga Peter Wolinski