Si të fotografoni natyrën dhe të frymëzoni ruajtjen e natyrës: këshilla dhe njohuri për fotografinë e faunës së egër

Fotografët austriakë të ruajtjes së natyrës Christine Sonvilla dhe Marc Graf kanë fotografuar faunën e egër në të gjithë planetin, që nga rrëqebulli alpin austriak deri te tigri i pakapshëm bengal. Dyshja u njohën në Universitetin e Vjenës, ku studionin që të dy për ruajtjen e natyrës. Ata zbuluan interesin e tyre të përbashkët te fotografia dhe kuptuan se kjo ishte një mënyrë për t'i dhënë zërin e saj natyrës.

Marc-u jep një shembull se si diçka e tillë mund të nxisë zhvillime: "Nga fundi i 2016 ne botuam foton e parë me rezolucion të lartë të një rrëqebulli alpin të shkrepur në malet austriake, çka ishte vërtet emocionuese për ne pasi ka vetëm 10 deri 15 të tillë në të gjithë Austrinë, dhe ka pasur dhe dy raste gjuetie pa leje mbi rrëqebujt asokohe. Ne u përpoqëm të përçojmë mesazhin për mbrojtjen e rrëqebullit anembanë Austrisë nëpërmjet formave të ndryshme mediatike."

Christine vazhdon me historinë: "Llogarisim që rreth 2,2 milionë njerëz patën kontakt me këtë temë të veçantë, që i bie afërsisht një e pesta e popullsisë së Austrisë. Gjithashtu, po kryejmë dhe shumë prezantime të drejtpërdrejta me anë të fotografisë dhe të filmit. Puna jonë në të vërtetë është për zvogëlimin e hendekut mes publikut dhe organizatave pro natyrës, OJF-ve, shkencëtarëve e të gjithë atyre njerëzve që veprojnë në terren."

Këtu, Christine dhe Marc ndajnë njohuritë dhe këshillat e tyre për të përdorur fotografinë e natyrës si një mjet për ruajtjen e saj, të ndjekur nga 10 këshillat tona më të mira për të shkrepur imazhe të jashtëzakonshme të faunës së egër.

Nuk keni pse udhëtoni në ndonjë destinacion të largët për të gjetur një histori mbi qëndrueshmërinë e natyrës. Në fakt, një projekt më pranë shtëpisë do t'ju ndihmojë të thelloni njohuritë për subjektin dhe të shkrepni më lehtë në kushte të ndryshme.

“Ne jemi përqendruar në Evropën Qendrore vitet e fundit dhe kemi parë se si ekosistemet dhe fauna e egër mund të rikuperohen dhe të rimëkëmben kur u jepen kohë dhe hapësirë,” thotë Christine. “Për shembull, në Parkun Kombëtar të Pyllit Bavarez larmia e specieve është rritur jashtëzakonisht sepse autoritetet lanë sasi të mëdha pemësh të rrëzuara nga një stuhi e fuqishme si dru i tharë. Normalisht ato do të ishin hequr për të ulur rrezikun nga insektet dhe sëmundjet. Por, është shumë e dukshme se çfarë ndikimi ka pasur kjo për biodiversitetin.”

As ideja juaj nuk ka pse të jetë e përmasave epike. Filmi i shkurtër i Christine dhe Marc “Flowing: My Dream of More Freedom” rrëfen se si jeta në një lumë mund të lulëzojë kur hiqen digat, pritat dhe pengesa të tjera, rrëfyer nga perspektiva e vetë lumit. Shikoni filmin më poshtë.

“Ishte një prodhim mjaft i thjeshtë,” thotë Marc “dhe tregon se ideja nuk ka pse të jetë gjithmonë komplekse apo të kërkojë vite të tëra për t'u realizuar. E xhiruam të gjithin për 6-7 javë në vende të ndryshme nëpër Evropën Qendrore.” Christine dhe Marc përdorën kryesisht Canon EOS R5 (tani e pasuar nga Canon EOS R5 Mark II), në kombinim me RF 100-500mm F4.5-7.1 L IS USM dhe një gamë objektivësh Canon me kënd të gjerë.

Christine shton se pavarësisht se filmi zgjat katër minuta, ka qenë një sukses i madh për sa i përket ndikimit. Ai ka fituar çmime në festivale ndërkombëtare filmi dhe është shfaqur madje edhe në Parlamentin Evropian gjatë një dite diskutimesh për financimin e restaurimit të lumenjve.

Si fillim, mund të ketë një projekt lokal për ripërtëritjen ose ruajtjen e natyrës pranë jush, ndoshta diçka ku jeni tashmë të përfshirë. Përtej kësaj, mund të kontaktoni shkencëtarë dhe specialistë në komunitetin e ruajtjes së natyrës që punojnë me subjekte që ju interesojnë. Duke ndërtuar një rrjet kontakti, jo vetëm që do të gjeni histori që ia vlejnë të tregohen, por edhe mund të zbuloni mënyra të reja për t’i rrëfyer ato.

Një nga projektet e Christine dhe Marc, që kapte rimëkëmbjen e natyrës në vende krejt të pazakonta, u bë i mundur vetëm falë kontakteve të tyre në botën shkencore. Ata ishin ende në kontakt me një mik të vjetër nga universiteti, i cili po studionte shqiponjat me kurorë në zonën metropolitane të Durbanit në Afrikën e Jugut.

“Kush do e mendonte se një nga grabitqarët më të mëdhenj të Afrikës përshtatet mjaft mirë në një qytet me një popullsi prej 4 milionë njerëzish?” thotë Christine.

“Për shkak të shpyllëzimit në pjesën jugore të Afrikës, këto shqiponja po luftojnë për mbijetesë dhe po detyrohen të përshtaten me zonat urbane,” shton Marc. “Por njerëzit po mbjellin pemë në kopshtet e tyre dhe kënaqen kur shohin shqiponjat duke bërë fole në to.”

Christine shpjegon: “Një çift kishte një fole shqiponje me kurorë jashtë dritares së dhomës së tyre të ndenjes. Gjëja e parë që bënte zonja çdo mëngjes ishte të kontrollonte nëse zogjtë ishin mirë. Ne i dokumentuam të gjitha këto aspekte të ndryshme.”

Nëse po fotografoni kafshë të egra, mund të keni vetëm vështrime kalimtare të subjektit tuaj. Familjarizimi me komandat e kamerës do t'ju ndihmojë të përfitoni më shumë nga momentet spontane.

“Së pari, do të rekomandoja të ushtroheshit me kamerën dhe të mësoni si të rregulloni aperturën dhe të tjera, në mënyrë instinktive sikur të ishit duke drejtuar një makinë,” thotë Christine.

“Më pas, gjithçka varet nga këmbëngulja dhe qëndrueshmëria për të mos u dorëzuar lehtë. Ndonjëherë mund të kaloni ditë pa e shtypur fare butonin e obturatorit sepse nuk ka pasur asnjë ndodhi. Por duhet të vazhdoni.

“Është gjithashtu shumë e rëndësishme të jeni të hapur ndaj gjithçkaje që ndodhet në fotografi. Mos u përqendroni vetëm te subjekti, por edhe te detajet e vogla në sfond. Edhe nëse është pak i turbullt, sfondi mund të bëjë që fotografia juaj të dallojë nga të tjerat me të njëjtin subjekt.”

Mënyra se si e përdorni objektivin mund t'ju ndihmojë gjithashtu të shprehni detajet e subjektit në një mënyrë tërheqëse. Objektivi telefoto jo vetëm që i afron subjektet e largëta, për shembull, por bën që detajet e sfondit të duken më të mëdha dhe më afër subjektit sesa kur fotografoni me një objektiv me kënd të gjerë. Mund ta përdorni këtë efekt për të bërë që një bimë apo kafshë të shfaqet si “në rrezik” nga mjedisi i saj.

Ndarja e imazheve të faunës së egër në rrjetet sociale mund të jetë një mënyrë e dobishme për të rritur ndërgjegjësimin dhe për të frymëzuar njerëzit që të zbulojnë më shumë. Mund të përdorni poza që kapin qëndrueshmërinë e natyrës ose imazhe që tregojnë kërcënimet dhe presionin mbi botën natyrore.

“Ne mendojmë gjithmonë për historinë që duam të tregojmë dhe imazhet kryesore që duam të arrijmë,” shpjegon Marc. Qëllimi është të kapni një imazh që tregon gjithë historinë, thotë ai: “Ky është thelbi i gjithë punës. Prandaj, është e rëndësishme të keni një plan dhe më pas mund të rregulloni të gjitha aspektet teknike, si p.sh. aperturën, gjatësinë fokale, këndin e kamerës, mënyrën si kompozoni sfondin etj.

“Ne gjithmonë i drejtohemi aspektit pozitiv të narracionit kur bëhet fjalë për rrjetet sociale. Rrallë herë ndajmë imazhe që tregojnë anën negative të një historie. Nëse kjo ndodh, atëherë tregojmë se si ishte dhe si u shndërrua, kështu që fokusi është pozitiv.”

Kafshët e paparashikueshme që lëvizin shpejt dhe çrregullt mund të jenë nga subjektet më të vështira për t'u fotografuar.

Por fotografimi i faunës së egër është shumë i ngjashëm me fotografitë e sporteve. Elementët kyç përfshijnë përgatitjen në mënyrë efikase, gjetjen e pozicionit të duhur, njohjen e kompletit që ju duhet (dhe mënyrën se si ta përdorni) dhe përgatitjen për të papriturat.

Këtu janë 10 këshillat tona kryesore për shkrepjen e imazheve fantastike të kafshëve të egra.

Njohja e habitatit dhe e sjelljes së kafshës që jeni duke fotografuar është thelbësisht e rëndësishme dhe do t'ju kursejë me orë të tëra në terren. Të diturit e kohës kur është aktive një specie gjatë vitit do t'ju ndihmojë me planifikimin. Imazhet e arrira të kafshëve të egra rrallë nxirren pa njohuri dhe organizim.

Kombinimi i kamerës dhe objektivit që është relativisht me peshë të lehtë do të jetë më i përshtatshëm për t'u mbajtur, sidomos nëse ju duhet të udhëtoni në vende të largëta. Vetëfokusimi i besueshëm dhe një shpejtësi e lartë e shkrepjeve të vazhdueshme (numër i lartë i kuadrove për sekondë) do t'ju lejojë të bëni shkrepje me shpejtësi, duke ju ndihmuar të kapni seri të sjelljes së kafshëve. Një kamerë me ekran LCD me kënd të ndryshueshëm do ta bëjë më të lehtë fotografimin nga kënde kreative, si p.sh. nga poshtë për fotografi sy më sy me kafshët.

Objektivët telefoto ju lejojnë të fotografoni faunën e egër nga distanca, por ia vlen të merrni parasysh edhe lloje të tjera objektivësh për fotografinë e natyrës. Objektivët me kënd të gjerë ju lejojnë të kapni kafshët dhe bimët në një sfond me peizazh më të gjerë natyror ose urban, ndërsa makroobjektivët ju ndihmojnë të krijoni fotografi mbresëlënëse nga afër të insekteve dhe objekteve të tjera të vogla.

Objektivi Canon RF 100-400mm F5.6-8 IS USM ka një gamë të gjerë zmadhimi që mundëson fleksibilitet të madh. Për rreze edhe më të madhe supertelefoto në kamera me kuadër të plotë pa pasqyrë si Canon EOS R8, ofrohen objektivat fiksë Canon RF 600mm F11 IS STM dhe RF 800mm F11 IS STM.

Nëse keni kamerë formati APS-C si EOS R7 dhe dëshironi të filloni nga hapat e vegjël për sa i përket konstruktit dhe buxhetit, merrni parasysh objektivin Canon RF-S 18-150mm F3.5-6.3 IS STM.

Duke qenë se sensori në një kamerë APS-C është më i vogël se ai i një kamere me kuadër të plotë, subjekti juaj do të duket më i madh në kuadër, pra në thelb, një kamerë APS-C zmadhon rreth 1,6 herë më shumë. Çiftoni objektivin RF 100-400mm F5.6-8 IS USM me EOS R7, për shembull dhe përfitoni nga një “gjatësi efektive fokale" prej 160-640 mm. Zbuloni më shumë në udhëzuesin tonë të përgjithshëm për të kuptuar gjatësinë fokale.

Zbuloni më shumë për zgjedhjen e objektivëve më të mirë për fotografimin e faunës së egër.

Në fotografinë e faunës së egër, është e rëndësishme që subjekti juaj të jetë i qartë. Gama e kamerave pa pasqyrë EOS R System të Canon ka një sistem shumë efektiv vetëfokusimi që përdor teknologjinë Dual Pixel AF nga Canon. Në këtë sistem, çdo pikë e ndjeshme ndaj dritës në sensor është e aftë të bëjë vetëfokusim si dhe të kapë imazhin, që do të thotë se, ndër përfitimet e tjera, subjektet mund të kapen dhe gjurmohen në çdo pjesë të kuadrit të imazhit.

Disa kamera, përfshirë Canon EOS R7 dhe EOS R6 Mark II kanë një modalitet vetëfokusimi për zbulimin e syve të kafshëve, që automatikisht kërkon sytë në skenë dhe i fikson në vend. Modaliteti i vetëfokusimit AI Servo gjurmon vazhdimisht kafshët e egra në lëvizje, edhe nëse këto lëvizin shumë shpejtë, për të siguruar poza të mprehta. Provoni të shkrepni një seri pozash në modalitetin më të shpejtë në seri të kamerës suaj, për të ndihmuar kapjen e çastit vendimtar.

Dridhja e kamerës është armiku i pamjes së qartë kur përdorni objektiva telefoto.

Shumica dërrmuese e objektivave telefoto Canon vijnë me fotostabilizim tejet efikas optik për ta luftuar këtë efekt, rëndom duke barazuar me 3 deri në 5 nivele në vlerë ekspozimi. Kjo mund të bëjë dallim shumë të madh në fotografimin e kafshëve të egra, ku shpejtësitë e larta të shkrehësit mund të jenë jopraktike në të gjitha skenat që nuk kanë dritë të drejtpërdrejtë të diellit. Fotostabilizuesi me 5 nivele në Canon RF 600mm F11 IS STM duhet të mundësojë poza me qartësi konsistente në 1/20 e sekondës në vend të 1/640.

Përdoreni fotostabilizimin për fotografinë me telefoto dhe makro, sidomos kur punoni dorazi me kamerën. Megjithatë, nëse kamerën e keni në stativ, atëherë është më mirë ta çaktivizoni fotostabilizuesin.

Hapi logjik i radhës kur shkrepni aksion me lëvizje të shpejtë është të rrisni shpejtësinë e obturatorit. Në fotografinë e mësipërme, një shpejtësi obturatori prej 1/3200 e sekondës ka ngrirë lëvizjen e një çafke dhe gjithashtu pikat e ujit në ajër. Një vlerë prej 1/2000 e sekondës ose më e shpejtë është një pikënisje e mirë. Por mund të doni të fusni dhe pak turbullim në shpejtësitë më të ulëta të shkrehësit, te majat e krahëve të një shpendi p.sh., për të dhënë ndjesinë e lëvizjes. Me shpendë më të vegjël dhe më të shpejtë, ka gjasa që majat e krahëve të dalin të turbullta edhe me një shpejtësi prej 1/1000 e sekondës.

Teksa aftësoheni më shumë, mund ta ulni edhe më tej shpejtësinë e obturatorit, madje deri në 1/10 e sekondës, si dhe të përdorni një teknikë panoramimi për ta shtuar edhe më tej ndjesinë e lëvizjes.

Rregulli bazë është se ju duhet një shpejtësi shkrehësi që është të paktën në një nivel me gjatësinë përkatëse fokale kuadërplotë. Pra, nëse përdorni një objektiv 600mm si Canon RF 600mm F11 IS STM, ju duhet një shpejtësi shkrehësi prej të paktën 1/600 e sekondës me fotostabilizim joaktiv – në shumicën e kamerave ky do të jetë 1/640.

Në fotografinë e përditshme është e zakonshme të përdorni modalitetin e shkrepjes “Aperture Priority” (AV në rrotullën e kamerës). Për makroobjektivët, për shkak të distancave të afërta të punës, zakonisht apertura mbyllet deri në f/16, f/22 ose më shumë për të maksimizuar rrezen e qartësisë dhe për t'u siguruar që e gjithë skena të jetë në fokus.

Fotografia e faunës së egër shpesh mund të përmirësohet duke përfituar nga turbullimi i pjesëve jashtë fokusit të imazhit, i njohur si bokeh, duke e bërë subjektin tuaj të dalë në pah. Por, mund të dëshironi ta evitoni turbullimin e sfondit nëse doni t'i shkrepni kafshët e egra në ambientin e tyre natyror.

Një gjatësi më e madhe fokale mund të rezultojë në turbullira më të forta të sfondit. Kjo është arsyeja pse zmadhuesit telefoto mund të përdoren për të izoluar një subjekt dhe për ta shndërruar sfondin në një turbullim pa detaje. Nëse doni të përmirësoni efektin Bokeh, bëni disa hapa prapa dhe zmadhoni në një gjatësi më të madhe fokale.

Mund t'i përmirësoni fotot tuaja duke zgjedhur kushtet e duhura të ndriçimit për të fotografuar subjektet tuaja. Duke marrë parasysh modelet e sjelljes së kafshëve, përpiquni të përdorni diellin e mëngjesit herët apo të pasdites së vonë për një dritë të ngrohtë diellore që jep ngjyra të pasura dhe hije të thella.

Përdorni rregullin e të tretave për të krijuar një kompozim dinamik. Aktivizimi i ekranit me rrjetë 3x3 në inkuadruesin elektronik të një kamere Canon EOS R System mund t'ju ndihmojë. Lini më shumë hapësirë përpara subjektit sesa pas tij, në mënyrë që kafsha të duket sikur po shikon apo lëviz drejt fotografisë dhe jo jashtë saj.

Ç’është më e rëndësishmja, kontrolloni gjithmonë sfondin për shpërqendrime. Një objekt i ndritshëm në distancë ose një degë peme që duket sikur del nga koka e një kafshe do të largojë vëmendjen e shikuesit nga subjekti kryesor.

Për të fotografuar kafshët duke u sjellë natyrshëm, bëni sa më pak zhurmë dhe afrohuni duke ndjekur një trajektore në formë zig-zagu dhe jo të shkoni drejtpërdrejt te ata. Ndërsa afroheni, sigurohuni që era t'ju vijë përballë, në mënyrë që aroma juaj të largohet prej tyre. Përdorni pemë, shkëmbinj ose elementë të tjerë të peizazhit si strehim dhe shmangni daljen mbi horizont.

Sigurohuni që kamera të jetë ndezur dhe e konfiguruar para se të afroheni. Kamerat EOS R System bëjnë më pak zhurmë gjatë përdorimit sesa DSLR-të, pasi nuk kanë pasqyrë që ngrihet dhe ulet në trupin e aparatit pas çdo shkrepjeje. Kamerat Canon EOS R7, EOS R10 dhe disa kamera të tjera nga kjo gamë ju lejojnë të zgjidhni “Silent Shutter Function” kur fotografoni në një nga modalitetet “Creative Zone”. Kjo çaktivizon veçori të ndryshme të kamerës që përndryshe mund të tërhiqnin vëmendjen e një kafshe dhe ta sinjalizonin për praninë tuaj, si tingulli i shkrepjes, ndezja e blicit dhe rrezja ndihmëse AF.

Shumë kamera EOS R System ju lejojnë të vendosni modalitetin “Shutter” në opsionin “Electronic”, në mënyrë të pavarur nga “Silent Shutter Function”. Gjithashtu mund t’i çaktivizoni tingujt sinjalizues të kamerës nga menyja kryesore.