Këshilla dhe teknika thelbësore të makrofotografisë.

Fotografitë nga afër të gjithçkaje, nga kandrrat deri te lulet, ushqimi dhe orenditë e shtëpisë mund të zbulojnë nivele mahnitëse detajesh. Mund të mendoni se ju duhen pajisje komplekse dhe aftësi profesionale për makrofotografi të arrirë, por me vetëm pak këshilla e teknika mund të nxirrni poza mahnitëse nga afër, edhe me kamera e objektivë ekonomikë. Lexoni udhëzuesin tonë për makrofotografinë për të gjitha pajisjet që ju nevojiten.

Për t'i pasur gjërat të lehta, shumica e kamerave të nivelit fillestar nga Canon kanë një modalitet shkrepjeje Macro, që ofrohet te rrotulla e modaliteteve ose përmes sistemit të menysë. Ky optimizon të gjitha cilësimet përkatëse për fotografinë nga afër. Makrofotografia e plotë shkon edhe më tej, rëndom duke përfshirë një objektiv që arrin zmadhim të plotë 1.0x. Kjo do të thotë se sendet e vogla riprodhohen në përmasa reale në sensorin grafik të kamerës, duke mundësuar zmadhim ekstrem kur i shikoni fotot rezultuese në ekran apo në printim.

Ky udhëzues për makrofotografinë ka për synim t'u përgjigjet të gjitha pyetjeve më të zakonshme në lidhje me makrofotografinë dhe fotografimin nga afër, duke përfshirë:

1. Zgjedhjen e kompletit: çfarëdo kompleti të keni, mund të realizoni fotografi të arrirë nga afër, por një kamerë e fuqishme dhe një makroobjektiv i dedikuar mund t'ju ndihmojë ta rrisni më tej nivelin.
2. Njohjen e cilësimeve tuaja: modalitetet automatike për makro janë fantastike për pozat e rastit nga afër, por kalimi në modalitetin Aperture priority (Av) ose Manual (M) ju mundëson ta çlironi plotësisht krijimtarinë tuaj.
3. Ruajtjen e fokusit: sistemet e qëndrueshme të vetëfokusimit të Canon janë fantastike për fotot e përgjithshme, por për makropoza optimale provoni funksione si p.sh. kulminimi dhe fragmentimi i fokusit.
4. Editimin e fotove: makrofotografia shpesh përfiton nga editimi, por nuk është e thënë të jeni profesionist. Thjesht prerja e fotove ndihmon që të nxirren në pah detajet e imëta, ndërsa rregullimi zonal mund të ndihmojë me rafinimin e produktit përfundimtar.

Nuk keni nevojë për kamera dhe objektiva të shtrenjtë për shkrepjen e pamjeve nga afër. Kamera më e mirë për makrofotografi është ajo që keni në dorë. Shumë kamera përdorimi të shpejtë të nivelit fillestar kanë një modalitet shkrepjeje Macro që mundëson distanca fokusimi deri në 1cm. Kamera kompakte Canon PowerShot G7 X Mark III ka një modalitet më të fuqishëm Macro, duke shtuar përfitimin e kulminimit të fokusit për fokusim të përpiktë manual, të cilit do t'i kthehemi më vonë.

Kamerat EOS që pranojnë objektiva të këmbyeshëm ju japin më shumë fleksibilitet për shkrepjet nga afër, pasi mund të vendosni objektivat idealë për rastin. Ato kanë gjithashtu ekrane rrotulluese me prekje që ju mundësojnë të shkrepni nga çfarëdo këndi dhe ofrojnë opsione fragmentimi dhe kulminimi të fokusit.

Kamera pa pasqyrë Canon EOS M50 Mark II është një opsion fantastik dhe ekonomik, sidomos kur kombinohet me një objektiv EF-M 28mm f/3.5 Macro IS STM. Kjo ofron zmadhim më të madh maksimal në 1.2x dhe ka qarkulluar si objektivi i parë në botë me vetëfokusim që vjen me LED Macro Lite të integruar për ndriçimin e subjektit.

Cilët janë objektivat më të mirë për makrofotografi?

• Canon RF 100mm F2.8L MACRO IS USM
• Canon RF 85mm F2 MACRO IS STM
• Canon RF 35mm F1.8 MACRO IS STM
• Canon EF 100mm f/2.8L Macro IS USM
• Canon EF-S 35mm f/2.8 Macro IS STM
• Canon EF-M 28mm f/3.5 Macro IS STM

Për entuziastët që kërkojnë ta çojnë makrofotografinë e tyre krijuese një shkallë më tej, ideale janë makroobjektivat e dedikuar dhe gama e kamerave kuadërplota nga Canon. Sensorët kuadërplotë në Canon EOS RP dhe EOS R6 ruajnë cilësi të jashtëzakonshme figure në kushte ndriçimi të ulët, për poza të qarta edhe në vlera të larta ISO. Të dyja vijnë me modalitet fragmentimi të fokusit që është veçanërisht i dobishëm në makrofotografi, të cilin do ta shpjegojmë pak më vonë. Mes objektivave të jashtëzakonshëm shoqërues janë Canon RF 35mm F1.8 MACRO IS STM dhe RF 85mm F2 MACRO IS STM. Këto arrijnë zmadhim maksimal deri në 0.5x dhe vijnë të kompletuar me fotostabilizues hibridë për t'i pasur pa turbullim fotot e shkrepura dorazi.

E njëjta vlen për Canon EF 100mm f/2.8L Macro IS USM të nivelit profesional për DSLR. Për zmadhim me supermadhësi, modeli i specifikimeve maksimale Canon RF 100mm F2.8L MACRO IS USM arrin zmadhim maksimal 1.4x.

Modaliteti i shkrepjes Macro në shumë kamera të Canon punon më së miri, por për poza edhe më krijuese nga afër me kamerat e nivelit amator është më mirë ta merrni vetë në dorë kontrollin. Përdorimi i modaliteteve gjysmautomatike dhe manuale mund t'ju sjellë rezultate shumë më të larta.

Një sfidë e veçantë është se rrezja e qartësisë (distanca mes pikës më të afërt dhe të largët në një skenë që paraqitet me qartësi) bëhet shumë e vogël në fotografinë nga afër dhe absolutisht minimale në shkrepjen e plotë në makro. Për të maksimizuar rrezen e qartësisë, mund të kaloni në modalitet shkrepjeje Av (Aperture priority) dhe të vendosni një aperturë të ngushtë prej rreth f/16 deri në f/22. Përveç nëse ndriçimi është shumë i shndritshëm ama, kjo mund të kërkojë shpejtësi të ulëta shkrehjeje për të arritur ekspozimin e nevojshëm. Kjo nuk përbën problem në përgjithësi nëse përdorni stativ për makrofotografinë e luleve, planeve nga afër të ushqimit dhe objekteve të tjera të natyrës së qetë, por ndriçimi i zbehtë mund të rezultojë në foto jodomethënëse. Për poza në ambiente të mbyllura, mund të shtoni dritë me një abazhur tryeze ose dhe të përdorni dritën natyrore nga dritarja. Llambat fotografike LED janë gjithashtu opsion i mirë, ashtu si edhe LED Macro Lite në disa objektiva Canon, të përmendur më lart.

Makrofotografia e kandrrave kërkon një shpejtësi më të lartë shkrehjeje për fiksimin e lëvizjes. Kjo vlen dhe nëse ka subjekte të tjera të gjalla, për shembull në makrofotografinë e syrit. Një mënyrë për t'ia arritur kësaj kur përdoret një aperturë e ngushtë është të rrisni cilësimin ISO të kamerës. Por kalimi në ISO më të lartë mund të sjellë humbje të detajeve të imëta dhe rritje të zhurmës në figurë – ku luajnë rol dhe kapacitetet e kamerave kuadërplota si EOS RP ose EOS R6 në zhurmën e ulët.

Një zgjidhje më e avancuar është përdorimi i blicit të gjatë ose i Speedlite. Përveç shtimit të ndriçimit, kohëzgjatja e shkurtër e blicit e fikson me efikasitet aksionin. Për kontroll optimal të planeve të afërta dhe një efekt pa hijezim në makrofotografi, modeli Canon Macro Ring Lite MR-14EX II është i pajtueshëm me shumicën e makroobjektivave Canon.

Fokusimi mund të jetë i vështirë në shkrepjen nga afër dhe kërkon saktësi ekstreme, për shkak të rrezes tipike të ulët të qartësisë. Programi Canon Photo Companion përmban një funksion të dobishëm që llogarit pikat më të afërta dhe të largëta të fokusit, rrezen e qartësisë dhe distancën hiperfokale në varësi të kamerës suaj dhe cilësimeve përkatëse.

Për fotot e natyrës së qetë, si p.sh. makrofotografia e ushqimeve, është më e mirë ta montoni kamerën në stativ apo në ndonjë mbështetëse tjetër, që të jetë e fiksuar në vend dhe të mos ketë lëvizje apo turbullim. Për të garantuar moslëvizje të plotë, përdorni kronometrin dysekondësh të kamerës ose ndonjë telekomandë, që të mos ju duhet të prekni kamerën kur shkrepni.

Edhe kur përdorni stativ mund të shkaktohet dridhje nga prekja e kamerës menjëherë përpara ekspozimit dhe te DSLR-të nga lëvizja e pasqyrës së refleksit që kthehet lart. Një kombinim i mirë i cilësimeve të disponueshme në shumicën e modeleve DSLR të Canon është të përdorni kronometrin me vonesë dysekondëshe së bashku me modalitetin Mirror lockup. Pasqyra në vijim kthehet lart dy sekonda përpara shkrepjes së pozës, duke lejuar kohë të mjaftueshme për qetësimin nga dridhjet. Programi Canon Camera Connect është gjithashtu i dobishëm në këto raste, duke ju mundësuar komandimin e kamerës nga telefoni.

Me kamerën e siguruar në vend, vetëfokusimi mund të punojë mirë nëse përdorni Af njëpikësh dhe e drejtoni me precizion pikën me pjesën e subjektit që dëshironi të jetë më e mprehta. Fokusimi manual mund të punojë edhe më mirë, siç tregon videoja më lart. Kamerat e fundit pa pasqyrë të Canon, si EOS M dhe të gjitha nga EOS R System vijnë me opsion kulminimi të fokusit (duhet ta keni objektivin në modalitetin MF). Aktivizojeni këto dhe zonat brenda kuadrit të figurës do të tregohen në inkuadrues ose në ekranin e pasmë teksa hyjnë në fokus, duke ju lejuar ta akordoni me imtësi pozën. Përndryshe përdorni një pamje të zmadhuar paraprake të zonës së dëshiruar për të siguruar fokusim optimal manual. Mund të përdorni të njëjtën teknikë në ekranin e pasmë të modeleve Canon DSLR duke kaluar në modalitetin Live View.

Edhe me fokusimin më të përpiktë dhe aperturë të ngushtë ndonjëherë do të vini re se sërish nuk mund të arrini qartësi të mjaftueshme para-mbrapa. Edhe një herë, kjo ndodh për shkak të rrezes së ulët të qartësisë kur shkrepni plane nga afër. Disa kamera Canon, mes të cilave edhe Canon EOS RP, dhe EOS R6, vijnë me një modalitet Focus Bracketing. Kjo është fantastike për shkrepjet në makro, pasi nxjerr një varg pozash duke kaluar automatikisht në një diapazon distancash fokusimi nga njëri kuadër në tjetrin. Vargu mund të bashkohet në vijim në një foto të vetme në stadin e editimit, duke rezultuar në plan më të gjerë fokal.

Shumica dërrmuese e fotove nga afër dhe makro përfitojnë së shumti nga një editim i lehtë. Nëse distanca minimale e fokusimit e objektivit tuaj ju kufizon në afrimin e mëtejshëm ndaj subjektit, mos u mërzisni. Prerja krijuese në stadin e editimit ju mundëson heqjen e periferisë së padëshiruar nga imazhi duke ruajtur vetëm zonën që dëshironi të ruani.

Asgjë nuk është gjithnjë perfekte. Kur shkrepni makrofotografi apo plane të afërta, niveli i tepërt i detajeve të imëta që do të shkrepni do t'ju theksojë edhe grimcat e pluhurit, njollat dhe cene të tjera. Funksioni i furçës korrigjuese apo klonuese në programin fotoeditimit mund t'i maskojë më së miri këto, duke kopjuar të dhënat e ndriçimit, ngjyrës dhe relievit nga pikselët fqinjë.

Versionet e fundit të Canon Digital Photo Professional (DPP) vijnë dhe me një funksion Depth Compositing. Ky automatizon procesin e konvertimit të një grupi fotosh të shkrepura me modalitetin Focus Bracketing të kamerave të EOS R System, duke i bashkuar në një figurë të vetme. Është ideal për zgjerimin e rrezes së qartësisë në makrofotografi dhe planet e afërta.


Shpresojmë që këto këshilla e teknika të kenë treguar sa e lehtë është të hidhni hapat e parë në makrofotografi dhe t'ju ketë frymëzuar të nisni nga puna me detajet duke shkrepur planet tuaja të afërta.



Shkruar nga Matthew Richards