FOTOGRAFI SPORTIVE

Në shënjestrat tuaja: këshilla kryesore për shkrepjen e aksionit

Dëshironi të shkrepni çaste vendimtare sportive? Ja gjithçka që duhet të dini rreth shkrepjes së pozave spektakolare të aksionit me kamerën tuaj Canon.
Një atlete femër me një jelek vjollcë që kërcen mbi një pengesë.

Fotografia e aksionit sjell një kombinim unik sfidash për fotografët dhe kompletin e tyre: bota është plot lëvizje, por si ta shkrepni në një imazh të vetëm? Fotografia e suksesshme e aksionit kërkon që të kuptoni disa cilësime dhe veçori thelbësore të kamerës dhe ndikimin që ato kanë në fotot tuaja. Përvetësimi i tyre do t'ju mundësojë të regjistroni imazhe të turbulluara për të përcjellë lëvizje, ose 'fiksimin' e imazhit për të kapur një moment në kohë. Ka gjithashtu teknika aksioni që mund të provoni, si p.sh. panoramimi dhe këshilla të posaçme për këdo që kërkon të fotografojë sporte ujore ose video aksion.

Është gjithashtu shumë e dobishme nëse shkrepni me një komplet të shpejtë dhe të lehtë. Canon ka projektuar një gamë relativisht kompakte dhe ekonomike kamerash dhe objektivash shumë të aftë që mund të japin rezultate të shkëlqyera kur shkrepni aksion, duke përfshirë objektivat telefoto të nivelit fillestar që ju mundësojnë t'i afroheni sa më shumë skenës.

Këtu ne përshkruajmë cilësimet thelbësore dhe veçoritë e kamerës që ju nevojiten për shkrepjen e aksionit dhe ndajmë disa këshilla dhe teknika kryesore për t'ju ndihmuar të krijoni imazhe të jashtëzakonshme.

Filloni me modalitetin Sports

Nëse jeni i ri në fotografinë e aksionit, mund të filloni thjesht duke përdorur modalitetin Sports që vjen në shumicën e kamerave të nivelit fillestar dhe të rangut të mesëm të Canon. Kjo do ta konfigurojë kamerën me vetëfokusim Servo (konstant) për ndjekjen e aksionit dhe shpejtësi të larta të diafragmës për të fiksuar lëvizjen, si dhe do t'ju mundësojë të bëni një sekuencë shkrepjesh duke mbajtur të shtypur butonin e shkrehësit. Thjesht kthejeni rrotullën e modaliteteve të shkrepjes së kamerës në pozicionin Sports ose kërkojeni këtë në menynë Scene Modes.

Cilësimet e nevojshme të kamerës për fotografinë e aksionit

Ekrani i Canon EOS 90D që tregon cilësimet e Tv (Time Value).

Për të marrë kontrollin direkt të shpejtësisë së shkrehësit, caktojeni kamerën në modalitetin Shutter priority (Tv - shkurtimi për Time Value). Ndryshimi i shpejtësisë së shkrehësit rregullon ekspozimin e përgjithshëm, por gjithashtu ju mundëson të kontrolloni sasinë e turbullimit (ose mungesën e tij) në imazhet tuaja.

Një snoubordist kërcen në ajër, me diellin e turbulluar në qiell përkrah.

Nëse jeni duke shkrepur subjekte përkundër një qielli të ndritshëm, provoni të përdorni kompensimin pozitiv të ekspozimit. Kjo ndihmon për t'i dhënë subjektit kryesor nivelin e duhur të ndriçimit. Një aparat fotografik pa pasqyrë si Canon EOS R7 ju mundëson ta shikoni paraprakisht efektin në inkuadrues gjatë shkrepjes. Shkrepur në Canon EOS R7 me objektiv Canon RF 14-35mm F4L IS USM në 14mm, 1/2000 sek, f/8 dhe ISO200.

Ndonëse modaliteti Sports në kamerat Canon është një pikënisje fantastike për shkrepjen e aksionit, mund të jetë më e dobishme të bëheni më aventurier teksa mësoni aftësi të reja. Përdorimi krijues i cilësimeve të shpejtësisë së shkrehësit, ekspozimit dhe gjurmimit AF do t'ju sigurojë arritjen e rezultateve që dëshironi.

Shpejtësia e shkrehësit

Në modalitetin Shutter priority (Tv), mund të zgjidhni shpejtësinë e shkrehësit që dëshironi dhe kamera do të rregullojë automatikisht aperturën për të nxjerrë një ekspozim të saktë. Mund të jetë gjithashtu e dobishme të aktivizoni auto ISO, në mënyrë që ndjeshmëria e kamerës ndaj dritës të rritet automatikisht nëse apertura më e gjerë e objektivit nuk është mjaftueshëm "e shpejtë" për të shmangur nënekspozimin (imazhet e errëta) me shpejtësi shumë të larta të shkrehësit. Shpejtësitë e larta të shkrehësit mbi 1/1000 sek do t'ju mundësojnë fiksimin e veprimit, ndërsa shpejtësitë e ulëta prej 1/60 sek ose më pak mund të shtojnë turbullimin e lëvizjes gjatë panoramimit, gjë për të cilën do të flasim më pas.

Ekspozimi

Nëse drita është konstante, një ditë me diell pa re, për shembull, ose në ambiente të mbyllura nën ndriçim artificial, vendoseni kamerën në modalitetin Manual (M). Kjo do t'ju japë kontroll të plotë të shpejtësisë së shkrehësit dhe aperturës, dhe do t'ju mundësojë të arrini ekspozimin e duhur në subjektin tuaj. Nëse përdorni një nga modalitetet automatike kur shkrepni në qiell, kamera do të priret ta nënekspozojë subjektin tuaj duke rezultuar në silueta. Nëse kjo ndodh, përdorni çelësin e kompensimit të ekspozimit për të rritur ekspozimin.

Një ekran i kamerës Canon EOS R10 që tregon gjurmimin AF duke u fokusuar në syrin e një kërcimtari flamenkoje.

AF programatike në kamerat më të fundit të EOS R System të Canon mund të dallojë njerëzit, kafshët, shpendët dhe automjetet. Në modalitetin People, për shembull, sistemi mund të zgjedhë edhe formën njerëzore nga mbrapa. Njohja dhe gjurmimi fillon me trupin, pastaj kalon te koka nëse është e dukshme, pastaj te sytë. Kokat mund të zgjidhen edhe nëse sportistët mbajnë syze apo kokore.

Gjurmimi AF

Kamerat Canon kanë disa pika fokusi të shpërhapura nëpër kuadër dhe kamera rëndom fokusohet te subjekti që keni më pranë. Për t'u siguruar se ku do t'ju fokusohet kamera në kuadër, provoni të zgjidhni një grup më të vogël pikash fokusi dhe sigurohuni që t'i mbani mbi subjekt. Vetëpërmirësimi i thelluar programatik i integruar në sistemet AF të gjeneratës së re në kamerat më të fundit pa pasqyrë EOS R System, si EOS R7 dhe EOS R6, janë fantastike për fiksimin dhe gjurmimin e kafshëve, shpendëve, njerëzve dhe automjeteve. Ato jo vetëm që njohin automatikisht format përkatëse, por përqendrohen te fytyrat dhe madje edhe te sytë teksa dalin në pamje. Përdorni modalitetin AI Servo AF në mënyrë që vetëfokusimi të gjurmojë vazhdimisht subjektet në lëvizje.

Panoramimi perfekt

Një motoçikletë dhe një motoçiklist lëvizin përgjatë një piste, duke u përkulur fort anash.

Mund të jetë e vështirë të zgjidhni shpejtësinë e duhur të shkrehësit për pozat me panoramim. Kur shkrepni makina ose motoçikleta të shpejta garash me objektiv telefoto, filloni me rreth 1/60 e sekondës, shqyrtoni rezultatet dhe rregullojeni shpejtësinë sipas nevojës për të dhënë turbullim të mirë të lëvizjes në sfond duke e mbajtur subjektin kryesor të mprehtë. Shkrepur në Canon EOS R6 me objektiv Canon RF 100-500mm F4.5-7.1L IS USM në 400mm, 1/160 sek, f/9 dhe ISO100. © Richard Walch

Ndërkohë që shpejtësitë e larta të shkrehësit janë fantastike për fiksimin e lëvizjes, ato ndonjëherë mund të heqin emocionet nga pozat e aksionit. Për shembull, nëse shkrepni një makinë garash që po kalon me shpejtësi duke përdorur një shpejtësi shkrehësi prej 1/2000 sek, do të duket sikur po qëndron në vend. Ngadalësoni shpejtësinë e shkrehësit në rreth 1/60 e sekondës dhe panoramoni kamerën për të shtuar turbullimin e lëvizjes dhe për të përcjellë një ndjesi të vërtetë shpejtësie.

Panoramimi është lëvizja që i bëni objektivit të kamerës për të ndjekur një subjekt që lëviz paralel me ju. Shpesh kombinohet me shpejtësi më të ulëta të shkrehësit, që subjekti të jetë i mprehtë ndërsa plani i palëvizshëm dhe sfondi marrin turbullim. Për të praktikuar, përdorni inkuadruesin dhe rrotullohuni nga ijët për të ruajtur lëvizjen të qetë. Nëse objektivi juaj ka fotostabilizim (IS), kontrolloni anën e objektivit për një çelës IS Mode dhe caktojeni në IS Mode 2. Kjo e cakton objektivin që të mos e marrë parasysh lëvizjen e panoramimit dhe të kompensojë vetëm për lëvizjen që është pingul me drejtimin e panoramimit.

Përdorni AI Servo AF dhe modalitetin e shkrepjes Continuous, duke e mbajtur butonin e shkrehësit të shtypur plotësisht, për të nxjerrë një seri pozash. Një panoramim efikas mund të kërkojë praktikë dhe durim, por një këshillë e mirë do të ishte ta vazhdoni lëvizjen e panoramimit edhe pasi të keni mbaruar me pozën apo sekuencën e pozave. Kjo ju jep një mundësi më të mirë për ta ruajtur të mprehtë subjektin në lëvizje.

Si të shkrepni sportet ujore

Një lundërtar spërdridhet nëpër ujërat e bardha, me rremën të ngritur në ajër në njërën anë.

Gjithmonë ka pasur një element fati në kapjen e çastit vendimtar në fotografinë e aksionit. Kamerat si Canon EOS R6 dhe EOS R7 kanë ritme jashtëzakonisht të shpejta të shkrepjes së vazhdueshme, kështu që mund të nxirrni seri fotosh dhe të jeni të sigurt në kapjen e momenteve kyçe. Shkrepur në Canon EOS R6 me objektiv Canon EF 300mm f/2.8L IS II USM në 1/4000, f/3.2 dhe ISO200. © Samo Vidic

Sërfi, kajaku dhe sportet e tjera të ujit përbëjnë subjekte të goditura për fotografim. Emocionet, hedhjet, kthesat dhe shpejtësia bëjnë që arritja e rezultateve të goditura të kërkojë përpjekje dhe durim. E mira sakaq është se kur varkat me vela, lundrat, motorët e ujit dhe të ngjashme ndjekin një kurs të caktuar, mund ta parashikoni më mirë se çfarë do të ndodhë më pas dhe të jeni të përgatitur. Ashtu si me shumicën e fotografive të aksionit, në përgjithësi do t'ju duhet një objektiv telefoto ose supertelefoto në mënyrë që të mund të shkrepni nga njëfarë distance.

Cilësimet e kamerës për shkrepjen e sporteve ujore

Shkrepja e duhur e ujit është çelësi për arritjen e pozave optimale të aksionit në sportet ujore. Sportet ujore shpesh shkrepen me shpejtësi të lartë shkrehësi duke fiksuar bulat e ujit si skulptura akulli të ngjashme me kristalin. Caktojeni shpejtësinë e shkrehësit në 1/1000 sek dhe më shpejt për të fiksuar ujin.

Kur shkrepni mbi ujë, ka tendencë të ketë shumë dritë pasi ajo reflektohet nga sipërfaqja, kjo ju lejon të ruani shpejtësi shkrehësi të lartë dhe ISO të ulët, duke ju dhënë fleksibilitetin për të zgjedhur aperturën në varësi të madhësisë së subjektit në kuadër. Kërkoni pozicione ku garuesi është duke bërë një kthesë ose një kërcim. Të dyja këto veprime shkrepin pika uji nga sipërfaqja dhe i bëjnë të ditur shikuesit drejtimin, shpejtësinë dhe natyrën e lëvizjes, duke i dhënë jetë imazhit.

Aksesorët për të shkrepur sportet ujore

Për ta mbajtur kamerën tuaj të sigurt rreth ujit, përdorni një kasë të dedikuar ujëduruese. Këto kasa me koracim ju mundësojnë shkrepjen në thellësi prej 40 metrash, kështu që nuk do t'i keni problem stërkalat. Kasat kanë dhe butona të izoluara në to që të mund të përdorni sakaq të gjitha funksionet e kamerës.

Është mirë që të filloni me një bateri të karikuar plotësisht të kamerës, një kartë memorieje me hapësirë të lirë të bollshme që të mos ju duhet ta hapni kasën pasi të dilni për të shkrepur. Disa qeska të vogla xheli silikoni brenda çantës e mbajnë gjithashtu lagështinë në nivele të ulëta.

Nëse nuk planifikoni të zhyteni, përdorni qaforen e objektivit për të pakësuar vezullimin, si dhe një filtër mbrojtës për të evituar dëmtimin e objektivit. Kamerat e EOS R System Canon janë gjithashtu të izoluara nga moti për t'u mbrojtur nga spërkatjet dhe stërkalat.

Shikoni panoramën e plotë

Një pamje nga afër e këmbëve të një rremtari, veshur me këpucë të kuqe dhe çorape rozë, në fund të një varke.

Diçka e thjeshtë si një palë këpucë sportive, një shalë e konsumuar kali apo ndonjë top ndeshjeje mund të ndihmojë në rrëfimin e një historie. Kërkoni gjithçka që paraqet interes dhe shkrepni disa poza nga afër për t'i dhënë një dimension të mëtejshëm fotografisë suaj të aksionit. Shkrepur në Canon EOS R me objektiv Canon RF 24-70mm F2.8L IS USM në 59mm, 1/640 sek, f/2.8 dhe ISO250. © Matthew Joseph

Pozat e arrira sportive nuk kanë të bëjnë vetëm me fituesit. Janë detajet e vogla – topi i ndeshjes, arbitri, emocioni i një tifozi të vetëm në turmë – që i shtojnë pasuri dhe thellësi portretit tuaj të aktivitetit. Në këto raste, cilësimet tuaja standarde ose Auto duhet të jenë të mjaftueshme.

Shkrepni pamje më të gjera që tregojnë të gjithë atmosferën e sportit dhe të turmës. Nëse shikoni gazetat, vetëm disa pamje janë pamje të detajuara dhe nga afër të aksionit sportiv. Në vend të kësaj, shumë janë pamje më të gjera që e vendosin sportin në kontekst duke treguar vendndodhjen dhe turmat e tifozëve.

Kërkoni për diçka të pazakontë ose të jashtëzakonshme. Shpesh imazhet më të mira sportive janë ato që të bëjnë të shikosh dy herë dhe të pyesësh se si ka ndodhur diçka. Pjesa më e madhe e kësaj varet nga fati i të qenit në vendin e duhur në kohën e duhur, por aftësia qëndron te përgatitja për çdo gjë. Xhironi rreth aksionit – me këtë duam të themi dhe që të përqendroni vëmendjen larg aksionit kryesor. Garuesit që përgatisin pajisjet e tyre, spektatorët, mekanikët etj., përbëjnë gjithashtu subjekte interesante dhe tregojnë historinë e aktivitetit.

Këshilla për xhirimin e aksionit në video

Kamerat e Canon janë po aq të afta për të filmuar pamje video me cilësi të lartë 1080p, 4K apo edhe 8K, kështu që ia vlen ta përdorni mirë këtë.

Me të mbërritur herë të parë në vend, filmoni disa poza këndgjera për të kapur atmosferën. Kini parasysh të evitoni zmadhimet e shumta gjatë filmimit. Shpesh, bëni më mirë të pushoni, të ndryshoni kompozimin e skenës, plus inkuadrimin dhe zmadhimin dhe pastaj të rifilloni nga filmimi. Kur lëvizni me kamerën për të kapur vendndodhjen ose për të ndjekur veprimin, sigurohuni që të ndaloni panoramimin përpara se të ndaloni filmimin për të ndihmuar në montazhin e pamjeve.

Në vend që të rregulloni pozicionin për ta vënë kamerën në ndonjë stativ, përpiquni më mirë ta lëvizni kamerën duke ndjekur aksionin. Do të shihni se kjo arrihet më lehtë me pozat e gjera. Nëse keni disa garues njëri pas tjetrit, provoni dhe gjatësi të ndryshme fokale për secilin. Kini parasysh se një subjekt i largët mund të bëhet më i madh në kuadër teksa i afrohet kamerës, ndaj caktojeni zmadhimin në mënyrë të atillë që kur subjekti të afrohet shumë, të dalë sakaq ende brenda kuadrit.

Kamerat më të mira për fotografinë e aksionit

Një burrë me rroba banje qëndron ulur në një shkëmb në një plazh, duke mbajtur një dërrasë sërfi, shkrepur nga një kënd i ulët.

Shumë kamera Canon kanë një ekran të pasmë me kënd të rrotullueshëm ose me anim. Përdorni këtë në vend të inkuadruesit për kompozimin e fotove tuaja dhe mund ta mbani kamerën lart për të shkrepur mbi kokat e njerëzve në një turmë ose nga niveli i tokës për të marrë një këndvështrim më interesant. Shkrepur në Canon EOS RP me objektiv Canon RF 35mm F1.8 MACRO IS STM në 1/3200 sek, f/1.8 dhe ISO100.

Një burrë qëndron në buzë të një piste garash duke mbajtur një kamerë me një objektiv të madh supertelefoto në sy.

Fotostabilizimi i integruar (IBIS) në Canon EOS R6 dhe EOS R7 funksionon veçanërisht me efikasitet kur kombinohet me IS optik në objektivat supertelefoto RF, sepse të dy llojet e IS do të kundërveprojnë ndaj llojeve të ndryshme të dridhjeve të kamerës. Kjo mundëson shkrepje të vazhdueshme të mprehta dorazi pa pasur nevojë për këmbalecë apo stativë.

Çdokush me një kamerë Canon mund të nisë fotografinë e aksionit me kompletin që ka tashmë, por nëse po mendoni për një përmirësim, këtu janë disa nga blerjet më të mira për shkrepjen e aksionit.

EOS R7 nga Canon

EOS R7 pa pasqyrë ndan shumë nga të njëjtat risi teknike si EOS R3 e nivelit profesional të Canon, por është ndërtuar rreth një sensori imazhi të formatit APS-C, i cili rrit me efikasitet rrezen e objektivave telefoto me 1.6x. Ky mund të jetë një bonus i madh në fotografinë e aksionit, duke ju mundësuar të mbuloni distancën me një objektiv relativisht kompakt dhe peshëlehtë, si p.sh. Canon RF 800mm F11 IS STM. Përfitimet e tjera të kësaj kamere të vogël, të shpejtë dhe të fuqishme përfshijnë ekranin rrotullues me prekje dhe një sistem AF të teknologjisë së lartë që përfshin njohjen programatike për njerëzit, kafshët, shpendët dhe automjetet, ndërsa stabilizimi i trupit dhe i objektivit punojnë së bashku për të minimizuar dridhjet e kamerës. EOS R7 gjithashtu mund të shkrepë deri në 30 kuadro në sekondë (fps) për fotografi, si dhe të regjistrojë filma 4K deri në 60p.

Canon EOS R6

Ideale për fotografinë e avancuar të aksionit, EOS R6 i përmbledh të gjitha funksionet e gjurmimit të vetëfokusimit programatik dhe IBIS të EOS R7 në një trup kuadërplotë të specifikimeve profesionale. Me disa objektiva merrni një IS të pabesueshëm me 8 nivele dhe kamera mund të shkrepë deri në 20fps. Pikat kryesore të videos përfshijnë filmimin 4K, plus regjistrimin në HD me 120fps për filmime cilësore me lëvizje të ngadaltë. Përsëri, ka një ekran rrotullues me prekje për shkrepjen nga pozicione krijuese.

Canon ofron gjithashtu një gamë të gjerë objektivash zmadhimi dhe fiksë me performancë të lartë, por kompaktë dhe ekonomikë për kamerat EOS R System.

Canon PowerShot G7 X Mark III

PowerShot G7 X Mark III vjen me rendiment të lartë në një kamerë të vogël kompakte me peshë vetëm 304g, të kompletuar me objektivat e zmadhimit fiks dhe gamë të dobishme efektive prej 24-100mm. Specifikimi nominal i aperturës së shpejtë të objektivit prej f/1.8-2.8 mundëson shpejtësi të larta shkrehjeje për fiksimin e lëvizjes edhe në ndriçim të dobët apo ambientesh të brendshme, së bashku me një normë të shpejtë shkrepjeje prej 20fps (30fps seri RAW). Mund të shkrepë gjithashtu filma 4K dhe Full HD me 120fps dhe ka një ekran me prekje të anueshëm.

Canon PowerShot ZOOM

Duke vërtetuar se kompleti i kamerës së fotografisë për aksion nuk ka pse të jetë i madh dhe i rëndë, PowerShot ZOOM është një monokël në madhësi xhepi që mund të shkrepë foto dhe video në Full HD me prekjen e një butoni. Kjo e bën atë ideal për aktivitetet sportive me spektatorë dhe për filmime me takt në aksion. Zmadhimi me 3 nivele jep një gamë të gjerë gjatësish fokale, ekuivalente me 100mm, 400mm dhe 800mm në një kamerë kuadërplotë.


Shpresojmë t'ju kemi dhënë një grup të dobishëm këshillash dhe teknikash për fotografinë e aksionit. Kamerat Canon EOS R System dhe objektivat e tyre shoqërues janë mjetet ideale të punës, por mund të keni sukses të madh edhe me gamën e kamerave DSLR dhe kompakte të Canon, si dhe të argëtoheni shumë gjatë rrugës. Tani është koha për t'i vënë këto këshilla në veprim.


Shkruar nga Matthew Richards

Produktet e lidhura

Artikujt e lidhur

  • Zotëroni shpejtësinë e shkrehësit

    SHPEJTËSIA E SHKREHËSIT

    Zotëroni shpejtësinë e shkrehësit

    Këto 5 këshilla bazë do t'ju ndihmojnë të zotëroni shpejtësinë e shkrehësit për të kapur subjektet në lëvizje dhe për të përmirësuar fotografinë tuaj të aksionit.

  • Shtigje drite të pezulluara në lëvizje përkrah një autobusi në një rrugë të ngarkuar të Madridit, Spanjë.

    FOTOGRAFIA E LËVIZJES

    Shkrepja e lëvizjes në fotografi

    Zbuloni se si të shkrepni lëvizjen dhe shtoni një ndjesi lëvizjeje në fotot tuaja.

  • Një shkrepje njëditore me një profesionist të sporteve me aksion

    FOTOGRAFI SPORTIVE

    Një seancë fotografimi përplot me aksion me një profesionist

    Jean-baptiste Liautard prezanton artin e fotografisë sportive të aksionit.

  • FOTOGRAFI SPORTIVE

    Fotografia sportive me shkrepje çasti

    Fotografja profesioniste, Molly Darlington, eksploron se si mund të shkrepni momentet e mëdha sportive me një kamerë xhepi.