FOTOGRAFI PEIZAZHI

Përmirësoni bukurinë unike të çdo stine

Fotografi i udhëtimeve, Benjamin Hegyi, shpjegon se si të shkrepni dhe redaktoni imazhet tuaja për të ekspozuar madhështinë e plotë të dimrit, pranverës, verës dhe vjeshtës.
Një pamje mbi Danub drejt Gellérthegy në Budapest, Hungari, shkrepur nga një pozicion i ngritur, me një ngjyrim të ngrohtë në të kuqe-portokalli.

Çdo stinë ofron shpërblime të pasura për fotografët, ku çdo kohë e vitit ofron një koleksion unik ngjyrash, tonalitetesh dhe atmosferash. Fotografi tetëmbëdhjetëvjeçar hungarez, Benjamin Hegyi, është bërë një autoritet frymëzues për krijimin e përmbajtjeve sezonale për rrjetet sociale, duke ndarë imazhet e tij të redaktuara dhe përzgjedhura të udhëtimeve, qyteteve dhe peizazheve me 40,000 ndjekësit e tij të zjarrtë në Instagram.

Këtu janë këshillat e tij kryesore për përforcimin e atmosferës së çdo stine të vitit.

1. Kini parasysh rezultatin tuaj përfundimtar

Lago di Braes në Tirolin e Jugut, Itali, duke kërkuar drejt Dolomiteve në sfond. Shkallë prej druri dhe varkat e shumta të vogla mund të shihen në plan të parë.

Për imazhet e verës, Benjamin-it i pëlqejnë peizazhet nën ndriçimin e fortë të diellit në mes të ditës, në vend që të zgjedhë për "orën e artë" që favorizohet shpesh menjëherë pas lindjes ose para perëndimit të diellit. Dielli i lartë në këtë imazh, nxjerrë në Lago Di Braes në Tirolin e Jugut, Itali, prodhon ngjyra të pasura dhe të ndezura në të gjithë skenën, nga varkat e planit të parë deri te Dolomitet në sfond. Shkrepur në Canon EOS 700D (tani tejkaluar nga Canon EOS 850D) me objektiv Canon EF-S 10-18mm f/4.5-5.6 IS STM në 10mm, 1/80 sek, f/4,5 dhe ISO100. © Benjamin Hegyi

Varka të vogla në Lago di Braes në Tirolin e Jugut, Itali. Imazhi është redaktuar për të rritur intensitetin e ngjyrave.

Kur redaktoi këtë imazh për ta përdorur në rrjetet sociale, Benjamin-i bëri ndryshime minimale, sepse ndjeu se kompozimi funksionoi më së miri, me shkallët në planin e parë që drejtojnë syrin te varkat, inkuadruar nga vargu i maleve në sfond. Megjithatë, shpjegon ai: "Unë thjesht desha të nxjerr elemente të ndryshme – anije, ujë, shkallë, male - "tak", kështu që intensifikova ngjyrat dhe rrita kontrastin e dritës". © Benjamin Hegyi

"Kur shkrep fotografi të stinëve," - thotë Benjamin-i, "mendoj gjithmonë si do t'i redaktoj ato më pas, dhe jo vetëm si të shkrep". Krijimi i një pamjeje dhe ndjesie të veçantë ka për mua, po aq lidhje me redaktimin sa dhe me shkrepjen e pozës. Të dy fazat plotësojnë njëra-tjetrën."

Benjamin-i i planifikon imazhet për të pasqyruar ndjesinë që ka ai në kohën e shkrepjes. "Mos mendoni se është e nevojshme të shkrepni realitetin, por ta krijoni skenën siç dëshironi ta shikoni në mendjen tuaj," - thotë ai. "Imazhi bëhet një hibrid i fotografisë dhe i pikturës. Është e rëndësishme të mos e teproni me gjërat ama, përndryshe rezultati përfundimtar do të duket i rremë dhe nuk i shkon për shtat natyrës.

"Unë do të këshilloja gjithmonë të shkrepni në modalitet cilësie RAW, sepse ju jep lirinë më të madhe për t'i manipuluar imazhet më pas," - shton ai. "Shkrepja në RAW ju jep mundësinë të rregulloni atributet si bilanci i së bardhës, pjesët e ndriçuara, pjesët më të errëta dhe paraqitjen e ngjyrave. Është e gjitha pjesë e theksimit të atmosferës së stinës".

Benjamin-i përdor kamerën që ka marrë dhuratë kur mbushi 13 vjeç, një Canon EOS 700D (tejkaluar tani nga Canon EOS 850D), me dy objektiva zmadhimi: Canon EF-S 10-18mm f/4.5-5.6 IS STM një objektiv ultrakëndgjerë ideal për peizazhe të gjera, dhe Canon EF-S 18-135mm f/3.5-5.6 IS STM, që është jashtëzakonisht fleksibël falë diapazonit të gjerë të zmadhimit. Ai thotë se e konsideron këtë komplet ideal, pasi madhësia dhe pesha janë të rëndësishme për një fotograf udhëtimi.

Një komplet po aq kompakt dhe efikas në kosto ofrohet nga EOS R System kuadërplotë dhe pa pasqyra i gjeneratës së re të Canon, duke përfshirë Canon EOS RP, objektivin Canon RF 24-105mm F4-7.1 IS STM dhe objektivin Canon RF 50mm F1.8 STM. Mund të përdorni gjithashtu gamën e objektivave EF-S në kamerat e sistemit EOS R nëpërmjet një adaptori montimi EF-EOS R.

2. Mendoni për kompozimin dhe ndriçimin

Lago di Carrezza në Tirolin e Jugut, Itali, në një ditë të shndritshme vere, me malet Dolomite në sfond të reflektuar në ujin e ndenjur të liqenit.

Kjo skenë u shkrep në Lago di Carrezza në Tirolin e Jugut, Itali, në një ditë të shndritshme vere. Kompozimi ishte ideal, por qielli dhe malet e zbehta në sfond ishin shumë më të shndritshme se reflektimet e tyre të errëta në liqen. Në kushte të tilla, Benjamin-i shpesh balancon ekspozimin duke përdorur funksionin e shkrepjes në HDR të kamerës së tij ose me ekspozim fragmentesh - duke shkrepur veçmas pjesë të ndryshme të skenës të mirekspozuar - dhe duke i bashkuar imazhet më pas. Shkrepur në Canon EOS 700D me një objektiv Canon EF-S 10-18mm f/4.5-5.6 IS STM në 10mm, 1/200 sek, f/5,6 dhe ISO100. © Benjamin Hegyi

Një fushë me livandë me re të vogla në qiellin e kaltër lart në dukje me harkim drejt diellit duke u ngritur pas një vije pemësh në kreshtën e një kodre.

Një skenë pranvere në rurale hungareze. Benjamin-i thotë se ishte thjesht çështje fati që forma e reve krijoi një vijë të lehtë përfshirëse që e çon syrin te dielli në ngjitje, por përsëri kompozimi është i përsosur. Fusha me livandë ishte në hije dhe relativisht e errët, por imazhi kishte diapazon të mjaftueshëm dinamik për të ndriçuar planin e parë dhe forcuar ngjyrat për të rritur dritën e qartë të pranverës. Shkrepur në Canon EOS 700D me një objektiv Canon EF-S 10-18mm f/4.5-5.6 IS STM në 10mm, 1/200 sek, f/4,5 dhe ISO100. © Benjamin Hegyi

Redaktimi është një pjesë e madhe e procesit të Benjamin-it, por ai mendon se është e rëndësishme të kompozohen skena që pasqyrojnë stinën. "Një pemë e mbuluar me borë ose ngricë e thekson atmosferën e dimrit", - thotë ai. "Në pranverë lulet shumëngjyrëshe dalin në pah. Në vjeshtë mund të përqendroheni në shkëlqimin e pasur e të artë të vyshkjes së gjetheve. Kompozimi i kujdesshëm mund të përmirësojë atmosferën natyrore të çdo sezoni.

"Kohë të ndryshme gjatë ditës janë optimale për të shkrepur në pjesë të ndryshme të vitit," - shton Benjamin-i, duke theksuar se cilësia e dritës ndryshon shumë nga stina në stinë. "Gjatë dimrit, është mirë të shkrepësh përpara lindjes së diellit ose menjëherë pas perëndimit të tij. Kështu nxirrni një ngjyrim të ftohtë, atmosferik në blu në atë stad të muzgut, të quajtur shpesh "ora blu". Megjithatë, nëse është skenë me dëborë, shkrepni ditën për një pamje vërtet të freskët dhe të shndritshme festive.

"Për poza verore, shumë fotografë peizazhi preferojnë fillimin ose fundin e ditës, por unë preferoj që dielli të jetë më lart në qiell", - vazhdon ai. "Kjo ndihmon për të nxjerrë në pah ngjyrat e gjalla të fushave të gjelbra dhe ngrohtësinë verore të peizazhit.

"Pranvera është një kohë e lavdishme për jetën e re dhe, për mua vlen po e njëjta gjë. Menjëherë pas lindjes së diellit është kohë e mirë për të shkrepur lulet që çelin dhe pemët që lulëzojnë, por rrezet e diellit të fortë gjatë ditës funksionojnë po aq mirë dhe nganjëherë edhe më mirë.

"Në vjeshtë është më mirë të shkrepet gjatë 'orës së artë' ose menjëherë pas lindjes apo perëndimit të diellit", - thotë Benjamin-i. "Dielli është me të vërtetë ulët në qiell dhe jep ato ngjyrat e lavdishme e të ngrohta të vjeshtës".

3. Kapni sa më shumë detaje të jetë e mundur

Një pamje mbi Danub drejt Gellérthegy në Budapest, Hungari, shkrepur nga një pozicion i ngritur.

Benjamin-i e fotografoi këtë pamje mbi Danub në Budapest, Hungari, në perëndim të diellit në fund të pranverës. Përdorimi i një ekspozimi të gjatë bëri të mundur kapjen e hollësive të pasura nga pemët e planit të parë deri te ndërtesat e qytetit në meslargësi, të cilat i intensifikon pamja në HDR, Ai gjithashtu rriti ngjyrat portokalli për të shtuar atmosferën e stinës për imazhin e përfunduar në krye të kësaj faqeje. Shkrepur në Canon EOS 700D me objektiv Canon EF-S 18-135mm f/3.5-5.6 IS STM në 18mm, 2 sek, f/9 dhe ISO100. © Benjamin Hegyi

Një mjellmë e bardhë duke notuar në një liqen blu në dimër. Në brigjet e liqenit, duke u ngritur drejt maleve, është një fshat piktoresk i mbuluar me borë.

Një skenë dimërore në Hallstatt, Austri. Pavarësisht nga ndriçimi i ulët dhe zonat me mjegull, Benjamin-i ishte në gjendje të kapte shumë detaje në ndërtesat në kodër, të cilat më pas i nxori në pah duke rritur kontrastin. Ai përforcoi dhe blunë në imazh për të theksuar atmosferën e dimrit. Shkrepur në Canon EOS 700D me një objektiv Canon EF-S 18-135mm f/3.5-5.6 IS STM në 18mm, 1/200 sek, f/5,6 dhe ISO100. © Benjamin Hegyi

Shumë kamera të Canon përmbajnë një modalitet skene peizazhi, por Benjamin-i preferon të jetë në kontroll të plotë të cilësimeve të kamerës. "Unë gjithmonë përdor modalitetin manual të shkrepjes, që t'i rregulloj vetë aperturën dhe shpejtësinë e shkrehjes, për të arritur ekspozimin që dua." Nëse shkrepni me kamerë EOS R System, Exposure Simulation bën të mundur të shikosh paraprakisht se si ndryshimet në cilësimet e ekspozimit ndikojnë mbi figurën, edhe tek inkuadruesi, edhe në ekranin e pasmë. Me DSLR ky opsion funksionon kur jeni duke përdorur ekranin e pasmë në modalitetin Live View.

Shumë kamera të Canon kanë modalitete shkrepjeje HDR (High Dynamic Range), të cilat janë fantastike për ruajtjen e detajeve në pjesët e ndriçuara dhe forcimin e hijeve. Kjo ju jep një ekspozim më të balancuar për skenat me kontrast të lartë.

"Kamera ime ka një modalitet skene HDR Backlight Control," - thotë Benjamin-i. - "Për çdo shkrepje që bëni, kamera regjistron tre imazhe të veçanta, të ekspozuara më vete, pastaj i bashkon këto në një foto HDR." Nëse aparati juaj nuk ka modalitet HDR, mund gjithsesi të nxirrni një numër pozash në ekspozime disi ndryshe dhe t'i bashkoni në fund gjatë redaktimit. Softueri falas Digital Photo Professional (DPP) nga Canon ka një program të integruar HDR që e bën këtë të thjeshtë. Përdorni një stativ për t'u siguruar që nuk ka lëvizje të kamerës midis ekspozimeve të njëpasnjëshme.

Kur shkrepni natën apo në ndriçim të ulët, Benjamin-i rekomandon përdorimin e ekspozimeve të gjata për të kapur sa më shumë detaje të jetë e mundur, "edhe atë që unë nuk mund ta shoh me sy". Konfigurimi i cilësimit Bulb të kamerës mundëson ekspozime më të gjata se 30 sekonda, por do të duhet të eksperimentoni për të vendosur se cili ekspozim nxjerr efektin që dëshironi. Shqyrtoni rezultatet në ekranin e pasmë LCD dhe rishkrepeni pozën nëse është e nevojshme. Përdorni një stativ për të shmangur turbullimin e imazhit.

4. Redaktoni për të forcuar atmosferën e stinës

Kodrat pranë liqenit Bled në Slloveni fshehur në mjegull në agim. Gjethet e mëdha të planit të parë varen në skenë.

Ky imazh vjeshte është plot me atmosferë etereale, me gjethe të murrme përkundër një mjegulle që ngrihet nga liqeni Bled në Slloveni, në rrezet e para të lindjes së diellit. Benjamin-i thotë se gjethet e përparme që inkuadrojnë skenën i shtojnë thellësi dhe e bëjnë të duket më sezonale. Shkrepur në Canon EOS 700D me një objektiv Canon EF-S 18-135mm f/3.5-5.6 IS STM në 27mm, 1/125 sek, f/9 dhe ISO100. © Benjamin Hegyi

Kodrat pranë liqenit Bled në Slloveni fshehur në mjegull në agim. Gjethet e planit të parë dhe kodrat e largëta janë më të verdha, dhe uji i liqenit është më i kaltër.

Benjamin-i mendoi se kodrat dhe sidomos gjethet e planit të parë të dukeshin shumë të gjelbra, ndaj i bëri tonalitetet e gjelbra të dukeshin më në të verdhë-portokalli për të nxjerrë atmosferën e vjeshtës. "Unë gjithashtu i shtova blu ujit dhe ca dritë në mjegull për ta bërë të dalë në pah," - thotë ai. © Benjamin Hegyi

Edhe kur nuk ka shkrepur në HDR, stili personal i Benjamin-it është të shtojë ngjyrën vibrante dhe të rrisë kontrastin që lidhet me atë pamje. Po aq e rëndësishme për imazhet e tij sezonale, ama është edhe rregullimi i balancës së të bardhës dhe ekspozimi i çdo poze për të nxjerrë në pah cilësinë e dritës së çdo stine më vete.

Këto rregullime fillestare mund të bëhen të gjitha duke përdorur softuerin falas Digital Photo Professional (DPP) të Canon, që është projektuar për procesimin dhe redaktimin e imazheve RAW nga kamerat e Canon. Ai vjen me një sërë Picture Styles për t'u dhënë me të shpejtë imazheve një pamje dhe ndjesi të caktuar, sikur t'i kishit përdorur këto në kamera. Këto përfshijnë Landscape, që rrit mprehtësinë dhe rrit tonalitetin e ngjyrave dhe fortësinë për të arritur blu dhe të gjelbra të thella e vibrante për qiejt dhe blerimin. Të gjitha rregullimet e zbatuara si Picture Style në një skedar RAW mund të qëmtohen, hiqen apo zëvendësohen më pas me një tjetër Picture Style. Stile të mëtejshme ofrohen për shkarkim falas duke përfshirë Nostalgia, Clear, Twilight, Emerald, dhe Autumn Hues, ideale për të injektuar shpejt një atmosferë të ndryshme sezonale në imazhe.

Funksionet e fuqishme Color Adjustment të DPP mundësojnë ndryshimin e ngjyrave, fortësisë dhe ndriçimin e diapazoneve specifike të ngjyrave, për të rritur blutë e një skene dimri ose tonet e ngrohta të një imazhi veror, për shembull. Benjamin-i përdor shpesh shtresa rregullimi në Adobe Photoshop për efekte të ngjashme. "Për pozat dimërore unë theksoj tonet blu duke shtuar një shtresë të zbrazët të caktuar në modalitet Overlay blending dhe pikturoj mbi zonat me një furçë të butë blu, duke përdorur tejdukshmëri të lartë", - shpjegon ai. "Për fotot e vjeshtës, mund të shtoni theksim dhe një atmosferë në një skenë duke pikturuar mbi zonat përkatëse me ngjyrime të verdha dhe portokalli.

"Për ndryshimin e kontrastit dhe të ndriçimit, unë gjithmonë përdor shtresa rregullimi," - shton ai, "sepse mund të përdorësh maska shtrese për të ndikuar vetëm në zona specifike brenda imazhit". Kjo është ideale kur ai është i kënaqur me rezultatin për pjesën më të madhe të imazhit, por mendon sakaq se disa aspekte kanë nevojë për një theksim të mëtejshëm për të përcjellë atmosferën.

5. Lërini fotot të flasin për ju në rrjetet sociale

Mjegulla mbush luginat mes maleve të mbuluara me pemë në agim.

Në udhëtimin e tij fotografik në Slloveni, Benjamin-i u ngrit në orën 4 të mëngjesit për t'u siguruar që të kapte agimin e vjeshtës mbi malet e mjegullta, por ndjeu se imazhi nuk e kapi ndjesinë e skenës ashtu siç e kishte përjetuar ai. Shkrepur në Canon EOS 700D me një objektiv Canon EF-S 18-135mm f/3.5-5.6 IS STM në 135mm, 1/500 sek, f/5,6 dhe ISO100. © Benjamin Hegyi

Mjegulla mbush luginat mes maleve të mbuluara me pemë. Kontrasti është rritur dhe është shtuar një ngjyrë e ngrohtë për të rritur ndjesinë e vjeshtës

Benjamin-i rriti kontrastin për të nxjerrë në pah detaje të tilla si shtëpitë në kodra në meslargësi, duke theksuar shkallën e skenës dhe duke rritur ngjyrën e vjeshtës për të intensifikuar atmosferën e stinës. Ndjekësit e tij në rrjetet sociale, thotë ai, e vlerësojnë këtë paraqitje të fortë dhe të drejtpërdrejtë të stinës. © Benjamin Hegyi

Kur ndani imazhet tuaja në rrjetet sociale, po konkurroni me miliona imazhe të tjera për vëmendje. Benjamin-i mendon se është e rëndësishme të zhvilloni stilin tuaj, që të mund të dalloheni nga turma.

"Unë fillova duke u përpjekur të imitoja stilin e fotografëve të tjerë, por më pëlqen të mendoj se kam zhvilluar tashmë stilin tim unik," - shpjegon ai. "E kam ngritur praninë time në Instagram mbi këtë themel. Njerëzve u pëlqen të shikojnë imazhe që reflektojnë atë që u pëlqen nga secila stinë dhe se si natyra rreth tyre ndryshon, duke ndjekur kohën. Duke postuar përmbajtje sezonale kam pasur më shumë sukses me njerëzit që kërkojnë imazhet e mia dhe i ndajnë ato me shumë të tjerë në mbarë botën.

"Unë jam tani në një pikë ku, së bashku me agjencitë e fotografisë së peizazhit dhe të udhëtimit që dëshirojnë të përdorin imazhet e mia, kam një shtrirje në 1 milion njerëz. Mendoj se thelbi është jo që të promovosh veten, por të lësh fotot të të promovojnë. "



Shkruar nga Matthew Richards



Adobe, Lightroom dhe Photoshop janë marka të regjistruara tregtare ose marka tregtare të Adobe në SHBA dhe/ose shtete të tjera.

Produktet e lidhura

Artikujt e lidhur