Një sfidë e lenteve për fotografinë e rrugës

Në fotografinë e rrugës mund të ndodhë gjithçka. Momente të pabesueshme fotografike mund të shfaqen nga hiçi e të zhduken po aq shpejt. Kjo është sfida më e madhe për një fotograf. Duhet të jesh gati për çdo gjë dhe të kesh një komplet që të sjell rezultate.

Andres McNeill, me bazë në Gllasgou, në Mbretërinë e Bashkuar, ka arritur një numër mbresëlënës ndjekësish në rrjetet sociale për stilin e tij unik të fotografisë së rrugës, i cili ka si pikënisje arkitekturën historike e të pasur në ornamente të qytetit të tij. "Gjithmonë më ka pëlqyer të vëzhgoj njerëzit", - shprehet ai, kështu që kur filloi të merrej seriozisht me fotografinë në vitin 2020, ai u orientua natyrshëm drejt stilit të fotografisë së rrugës.

Andres ecën përgjatë trotuareve derisa të gjejë një kuadër të mirë dhe pret derisa të shfaqet personi i duhur – një element i fundit, por thelbësor për plotësimin e kompozimit.

Ashtu si shumë fotografë bashkëkohorë të rrugës, Andres nuk është i fiksuar pas gjatësisë fokale fikse klasike prej 35 mm që preferohej në kohën kur zhanri sapo kishte nisur të lëvrohej, por ai eksperimenton me çdo gjë që funksionon për subjektin e tij. Zakonisht ai del me Canon EOS R5 e tij ose EOS R6, si dhe me një Canon Mount Adapter EF-EOS R për lentet e tij EF.

Për të parë nëse është e mundur të rikrijohet stili i tij unik me një konfigurim minimal, ai bashkoi EOS R8 me kuadër të plotë pa pasqyrë të Canon me vetëm një lente fikse me kënd të gjerë – Canon RF 28 mm F2.8 STMsuper kompakt. Këtu ne zbulojmë nëse kompleti ishte gati për të përballuar sfidën.

Lentet më të mira për fotografinë e rrugës janë ato që të lejojnë të jesh i shpejtë në mënyrë që të reagosh menjëherë për të ndjekur aksionin në lëvizje të shpejtë dhe një nga veçoritë kryesore të Canon RF 28 mm F2.8 STM është dizajni i tij i hollë dhe petashuq.

Me një peshë prej vetëm 120 g, RF 28 mm F2.8 STM është e lehtë krahasuar me lentet fikse zmadhuese apo ato më të shpejta, çka e bën atë ideale kur jeni me nxitim në një qytet si Gllasgou. "Është jashtëzakonisht e vogël", - thotë Andres. "Së bashku me Canon EOS R8, ka një madhësi të pabesueshme. Të jepte një ndjesi sikur ishe gati i padukshëm."

Për Andres që është më shumë se 6 ft i gjatë, të mund të bëhesh një me mjedisin që të rrethon përbën një përfitim të madh. "Mund të jesh shumë pranë aksionit dhe përsëri të kapësh momente autentike – dhe po të kisha pasur me vete kompletin tim të zakonshëm do të bija më shumë në sy."

Andres qëndroi në qendrën e qytetit të Gllasgout për fotot, pasi sipas tij “aty ndodhin të gjitha”. "Është vendi më i mirë për foto pasi aty shikon lloje nga më të ndryshmet të njerëzve."

Gjatësia fokale 28 mm me kënd të gjerë ishte risi për Andres, i cili e përqafoi mundësinë për të shfaqur më shumë arkitekturë brenda kuadrit. "Pata mundësinë të isha shumë pranë njerëzve pasi përmasat e kamerës dhe kompletit të lenteve janë të vogla, por pata mundësinë gjithashtu të fotografoja gjerësinë e ndërtesave", - shpjegon ai.

Andres fotografoi një sërë imazhesh, ku shfaqeshin njerëz që kalojnë përmes perlave arkitekturore, brenda zonave të ndriçuara e duke lëshuar hije të gjata. "Shkrepa dhe disa ekspozime më të gjata me makinat që kalonin dhe linin gjurmë", - shton ai.

Skocia nuk njihet për klimë me diell, prandaj për Andres është shumë e rëndësishme të ketë një lente që mund t’i përballojë mirë rastet kur moti është i plogët dhe i vrenjtur.

"Koha ime e preferuar për të fotografuar është “ora blu”, pak pas perëndimit të diellit, por mjaftueshëm vonë për tu dukur si natë", - thotë ai. "Apertura f/2.8 është e përkryer në këto situata. Nuk pata nevojë ta rrisja shumë ISO-n për të arritur një imazh me ekspozimin e duhur. Shpejtësia pak më e ulët e obturatorit në aperturën f/2.8 të ndihmon të kapësh një foto shumë të qartë."

Për të arritur pamjen vizuale që kërkon, Andres merr frymëzim nga kinemaja, duke iu referuar toneve të dallueshme blu-vjollcë-e bruztë të pranishme në kinematografinë e filmit "Moonlight" të vitit 2016, si një shembull i llojit të paletës së ngjyrave që ai pëlqen në fotot e tij.

Kur fotografon gjatë natës, Andres përdor dritën nga dritaret e zyrave dhe tabelat e fast food-eve për të përmirësuar fotot e tij. Pasi ra errësira, ai u impresionua veçanërisht me efektin "Bokeh" të gjeneruar nga Canon RF 28mm F2.8 STM.

"Sa më i madh numri i fletëve të aperturës, aq më i butë efekti "Bokeh" dhe aq më i përkryer dhe i rrumbullakët duket", - thotë ai. "Kjo ishte e rëndësishme pasi në sfond kisha drita rruge dhe fenerë makine kudo. Efekti "Bokeh", që është kaq i këndshëm për syrin, e përmirësoi vërtet foton."

Përveçse fotograf , Andres është gjithashtu edhe videograf. RF 28 mm F2.8 STM është një lente ideale për krijuesit e përmbajtjeve që punojnë me lëvizje dhe për të krijuar video, pasi korrigjimi i ndryshimit të këndit të shikimit gjatë fokusit sjell inkuadrim konsistent kur kalohet nga njëra pikë fokale në tjetrën.

Kjo ishte hera e parë që Andres përdorte Canon EOS R8 dhe ai mendon se ajo është një kamerë e shkëlqyer për fotografi rruge. Ai vlerësoi në veçanti vetëfokusimininteligjent, i cili mundësonte që subjektet e tij të mbeteshin në fokus të mprehtë. "Ndonjëherë më dukej sikur po bëja pak me hile. Më dukej sikur po i thoja me mendje se çfarë duhet të bënte dhe ajo thjesht e bënte"

Një foto rruge e arrirë tregon një histori brenda një kuadri. Andres sjell në kujtesë një shembull të veçantë tepër domethënës – një burrë i ulur në një pellg drite duke pushuar (lart djathtas). Falë kompletit të tij jo të dukshëm , Andres arriti të bënte shkrepjen ndërsa burri vazhdoi i pashqetësuar të shijonte momentin e tij të qetësisë. Për subjektin e tij ajo ishte ndoshta thjesht një ditë e zakonshme, por parë nga lentet e Andres u shndërrua në diçka magjike.

"Këshilla ime e vetme për fotografët e rrugës është që thjesht të dalin e të përpiqen më shumë", - inkurajon Andres. "Unë mund t’ju listoj një sërë teknikash, por në të vërtetë duhet të trajnoni shikimin për të kapur momentet që po kërkoni. Kjo do t’ju bëjë një fotograf më të mirë rruge."