Pamje nga sipër: gjashtë këshilla për shkrepjen e fotove të goditura nga sipër

Fotografia nga sipër është një mënyrë krijuese për të ekspozuar subjekte dhe produkte nga më të ndryshmet – nga makijazhi dhe bizhuteritë, deri tek ushqimi dhe njoftimet për lindje. Bloguesit dhe krijuesit e përmbajtjeve në rrjetet sociale ofrojnë një burim të pasur frymëzimi për këto lloj fotosh, por nga t'ia nisni kur vjen puna te projektimi dhe stilizimi i pozave tuaja nga sipër dhe si të siguroheni që pamjet tuaja të dallojnë në buletinet e rrjeteve sociale?

Mbajini gjërat të thjeshta, sugjeron fotografi i produkteve komerciale dhe i stilit të jetesës, Chris Priestley, i cili ka si profesion shkrepjen e pozave nga sipër dhe numëron 54,000 ndjekës në Instagram dhe mbi 1 milionë ndjekës në TikTok. "Kur nxjerr më pak, vlen më shumë kur vjen puna te rekuizitat në fotot nga sipër, si dhe sfondet shpërqendruese mund ta prishin pozën."

E mira është se fotografia nga sipër është e hapur për këdo. Nuk ju duhen pajisje të specializuara – një objektiv standard kompleti apo edhe kamerë kompakte mjafton për ta provuar këtë teknikë mahnitëse. Në fakt gjithçka fillon me një laps e letër, siç shpjegon Chris-i në këshillën e tij të parë nga gjashtë të tillat më poshtë.

Chris-i fillon duke skicuar skema në një letër për ta ndihmuar me kompozimin, pasi, siç thotë ai, mund të jetë shumë e vështirë të fillosh nga fillimi pasi ke pozicionuar kamerën.

"Kur skicoj pozën nga sipër, synoj të sigurohem që objekti kryesor të jetë në një pozicion që e bën të dalë në pah," - shpjegon ai. "Sfondi dhe rekuizitat e tjera shoqëruese duhet të plotësojnë subjektin, qoftë estetikisht, për nga funksioni apo përmes stilit të jetesës së audiencës së synuar."

Të kuptuarit nëse imazhi nga sipër po ngarkohet dhe bëhet shpërqendrues vjen përmes provës dhe gabimit, shton Chris-i. Ai sugjeron të poziciononi gjithçka rreth objektit kryesor dhe sfondit që keni zgjedhur. "Më pëlqen të përdor rregullin e të tretave dhe ta ndaj pamjen në nëntë kuadrate. Pastaj sigurohem që secila rekuizitë apo element dizajni të ketë kuadratin e vet."

Chris-i këshillon të mos i hidhni kurrë rekuizitat që blini për pozat nga sipër. "Nuk e dini se kur mund t'ju duhen prapë," - thotë ai. "Tani p.sh. kam një kuti të madhe rekuizitash nga mund të marr gjëra. Ia vlen të kesh gjëra atypari, thjesht për të mbushur hapësirat që nuk funksionojnë në poza."

Në vend që të mbani sfonde të panumërta e të sikletshme, ama, Chris-i sugjeron të përdorni sfonde të lehta fotografike që qarkullojnë në treg. "Mund të blini tablo fotografike madhësie A1 që vijnë me stile të ndryshme, me efekte druri, mermeri dhe rrasash." Këto ka përdorur dhe ai për sfondin e mermerit në pozat e orëve nga sipër si më lart.

Rekuizitat në pozat nga sipër ndihmojnë për të rrëfyer historinë dhe për t'i dhënë kontekst subjektit tuaj, duke ekspozuar se kujt duhet t'i përkasë produkti.

Cilatdo rekuizita që të zgjidhni për foton nga sipër, Chris-i rekomandon që të siguroheni gjithnjë që të jenë plotësisht të pastra. "Një gjë që kam mësuar nga puna me klientët e mëdhenj është se nëse ke ndonjë njollë apo pluhur apo të tilla, fotoja në thelb s'bën më. Pavarësisht sa e mirë është fotoja, syri i shikuesit tërhiqet natyrshëm drejt imperfeksioneve.

"Nëse ka gërvishtje dhe shenja, provoni t'i fshihni me rekuizita të tjera dhe sigurohuni që gjithçka të jetë në optimum përpara se të shkrepni," - vijon Chris-i. "Vërtet që s'bën t'u ktheheni imazheve pas fotografimit për t'i pastruar të gjitha një nga një se do të ishte tmerr."

Nuk ju duhen komplete specialisti për të shkrepur foto të arrira nga sipër, por stativi jua mban kamerën në pozicion kur rregulloni rekuizitat.

Chris-i përdor një Canon EOS R5 dhe thotë se pesha kishte avantazhin e vet gjatë shkrepjes së pozave nga sipër në këtë artikull. "Bëri që të mos kisha probleme me animin mbi tryezën. Me kamerat më të rënda, do të më duhet t'i shtoja peshë stativit që të mos rrëzohej. Ekrani rrotullues i nyjëtuar më ndihmoi të lëvizja në pozicion ku mund dhe ta shikoja imazhin."

Kur vjen puna te zgjedhja e objektivave për poza nga sipër, Chris-i rekomandon një 50mm standard si p.sh. Canon RF 50mm F1.2L USM. "Arsyeja përse do të zgjidhja 50mm përkundër një objektivi më të gjerë është se nuk sjell deformim nga objektivi në distancat nga ku do të shkrepni. Nëse shkrepni pozë nga sipër me objektiv 16mm, për shembull, atëherë keni deformim perspektive rreth skajeve, gjë që nuk duket bukur në pozat e produkteve."

Një kamerë si Canon EOS RP është gjithashtu një zgjedhje e mirë për këtë lloj imazhi, së bashku me një objektiv kompleti si p.sh. Canon RF 24-105mm F4-7.1 IS STM – kjo do të mbulonte edhe rrezen 50mm, edhe aperturat që rekomandon Chris-i këtu. Mund të përdorni edhe një kamerë kompakte, si p.sh. Canon PowerShot G7 X Mark III sidomos nëse jeni me buxhet më të ulët. Ajo peshon vetëm 304g (së bashku me baterinë dhe kartën e memories), por do të shkrepë detaje të bollshme me sensorin mahnitës 20.1MP.

Ndonëse aperturat e vogla, si f/16 dhe f/22 sjellin më shumë pjesë të pozës në fokus të mprehtë, Chris-i rëndom përdor cilësime f-stop midis f/5.6 dhe f/8. "Nuk më pëlqen të shkoj më lart, përndryshe një pjesë e mirë e imazhit do të ishte e detajuar," - thotë ai. "Dua të krijoj pak më shumë thellësi, që ndërsa ke ende mundësi të dallosh qartë se cili është sfondi, është gjithsesi pak jashtë fokusit – çka tërheq natyrshëm syrin te subjekti kryesor."

Kur vjen puna te ndriçimi, Chris-i rekomandon t'i mbani gjërat bazike. "'Për shumë punë të miat, unë shkrep me një dritë të vetme të pozicionuar në kënd 45°, edhe horizontalisht edhe vertikalisht nga subjekti. Kjo krijon normalisht një dritë vërtet të këndshme në imazh.

"Ka shumë lloje të ndryshme ndriçimesh që mund të përdorni," - vijon ai. "Duke qenë se vetë punoj në nivel profesional, zakonisht përdor ndriçim studioje, pasi e kam të lehtë të përdor modifikim për t'i dhënë formë dhe për ta zbutur dritën. Ndriçimi i vazhduar është gjithashtu një opsion i mirë, pasi mund të shikosh ku bien hijet, çka e bënë shumë më të lehtë sistemimin e rekuizitave në pozën nga sipër."

Një Canon Speedlite, si Canon Speedlite EL-1, me shkrepje nga distanca përmes Canon Speedlite Transmitter ST-E3-RT V2, ju jep gjithashtu kontrollin krijues mbi ndriçimin e pozave nga sipër, sidomos kur përdoret me çadër apo kuti zbutëse për të shpërhapur dritën.

Përndryshe, thotë Chris-i, mund të përdorni edhe dritën natyrale. Shpesh është më mirë të shkrepësh në ditë me re se në diell të fortë, pasi retë veprojnë si shpërhapës natyralë, duke e zbutur dritën. "Nëse e sistemoni skenën me kënd 45° nga dritarja," - thotë Chris-i, "në thelb do të ishte i njëjti rezultat që do të arrinit me dritën artificiale."

"Një gjë që më pëlqen nga Canon EOS R5 është se ka numër të lartë megapikselësh dhe kam mundësi të bëj prerje pa humbur cilësinë e imazhit," - thotë Chris-i. Por ai pohon gjithashtu se kanalet e ndryshme të rrjeteve sociale kanë kërkesa të ndryshme për madhësitë dhe specifikimet. Në vend të shkrepjes së një poze nga sipër dhe thjesht prerjes së një sërë imazhesh alternative prej saj në një program editimi, Chris-i sugjeron t'i kushtoni kohë stilizimit të një poze për çdo lloj përdorimi në internet.

"Unë shkrep në format kuadri 3:2 pasi pozat nga sipër përdoren zakonisht për imazhe blogu ose faqesh interneti," - shpjegon ai. "Por një gjë që do të merrja parasysh është se nëse do të përshtatni imazhin për kanale të ndryshme sociale, si p.sh. 4:5 për Instagram ose edhe 9:16, atëherë do të duhet të ndryshoni se ku janë vendosur rekuizitat. Do të rekomandoja edhe heqjen e disa rekuizitave, pasi do të punoni me një hapësirë shumë më të vogël."

Nëse dëshironi vërtet t'i shtyni limitet kur vjen puna te pozat nga sipër, mund të provoni të eksperimentoni me lëvizjen, siç ka bërë Chris-i në pamjen më sipër. Për të arritur këtë efekt mahnitës, ai rekomandon t'i shkrepni elementet lëvizëse veçmas, në vend që të përpiqeni për të shkrepur gjithçka me një pozë. Hidhini një sy punimeve të tij të mëtejshme në TikTok.

"Një nga të mirat e krijimit të një kompoziti në Photoshop është se mund t'i vendos petalet në shtresa të ndryshme," - vijon Chris-i. "Unë kisha kështu mundësinë t'i vendosja këto shtresa në Adobe After Effects, ku shtova një kamerë virtuale. Në vijim e lëviza kamerën përmes këtyre shtresave drejt orës, për të marrë efektin 3D që shikoni këtu."

Nëse dëshironi t'i mbani gjërat të thjeshta, atëherë mund të provoni të shkrepni elemente lëvizëse në pozicionin e djathtë në një foto të vetme. Kjo do të ketë pak provë e gabim, ndaj caktojeni kamerën në modalitet shkrepjeje të vazhduar teksa shtoni lëvizje. Për t'i sjellë imazhet në jetë, provoni t'i kombinoni në GIF të animuar duke përdorur Adobe Photoshop ose editorin tuaj të preferuar të imazheve.

Ndiheni të frymëzuar? Provoni një pozë nga sipër dhe ndani rezultatet me etiketën #FreeYourStory, duke përmendur @canonemea.



* Adobe, After Effects, Lightroom dhe Photoshop janë marka të regjistruara tregtare ose marka tregtare të Adobe në SHBA dhe/ose shtete të tjera.



Shkruar nga Marcus Hawkins