Këshillat kryesore për fotografimin e peizazheve

Mund të ndodhë të rastisni në lloj-lloj vendesh interesante dhe skenash mahnitëse kur endeni rrotull. Por duhet përkushtim për të kërkuar pika të denja për foto. Ndaj kur të gjeni një pikë të mirë, shfrytëzojeni më së miri. Në këtë artikull, do të shohim disa nga gabimet më të zakonshme të fotografisë së peizazhit dhe si t'i rregullojmë ato.

Mendoni si ta plotësoni pamjen e largët me detaje më të afërta. Shpesh quajtur dhe si interes i planit të parë, këto detaje më të afërta mund të ndihmojnë së tepërmi në kompozimin tuaj duke drejtuar shikimin përgjatë një skene. Për kontrast, një plan i parë i zakonshëm dhe i zbrazët thjesht harxhon një pjesë të madhe të kornizës.

Kur kërkoni interes të planit të parë, provoni të përdorni Live View dhe të eksperimentoni me pozicionet e kamerës për të gjetur ekuilibrin më të mirë midis planit të parë dhe sfondit. Një kamerë me ekran këndndryshueshëm si Canon EOS RP është i përshtatshëm për t'u ulur në tokë, gjë që del shpesh e nevojshme kur inkuadroni shkëmbinj ose bimë. Duke përfshirë objekte si ky në pjesën e përparme të skenës suaj, mund të krijoni një kompozim të ekuilibruar. Por mbani gjithashtu parasysh se jo çdo foto peizazhi ka doemos nevojë për interes të planit të parë. Ai është thjesht një mjet i dobishëm kompozimi për ta përdorur kur t'ju nevojitet.

Objektivat këndgjerë ju lejojnë të kapni të gjithë gjerësinë e një skene të bukur, por jo çdo pozë ka nevojë për fushë të gjerë shikimi. Ndonjëherë zmadhimi në detaje të largëta mund të sjellë foto më interesante të peizazhit. Një objektiv standard zmadhues si Canon RF 24-105mm f/4-7.1 IS STM i përdorur këtu ka një gamë të dobishme fokale për fillestarët e peizazhit. Dy fotografitë tona të theksuara janë shkrepur në të dy skajet e diapazonit 24-105mm, kështu që nëse sapo keni filluar me fotografinë e peizazhit, atëherë ky objektiv është ideal. Kur të vijë koha për modernizim, objektivat e serisë L si Canon RF 24-70mm F2.8L IS USM ofrojnë një hap përpara në mbrojtjen nga moti dhe aperturë më të shpejtë maksimale. Por për fillestarët, një zmadhim standard do t'ju lejojë të kapni skena të hollësishme mahnitëse.

Drita në të cilën shkrepni është një zgjedhje krijuese, shton atmosferën dhe kjo mund t'i shpjerë fotot e peizazhit në nivel tjetër. Një gabim tipik është fotografimi i skenave nën dritën e fortë të diellit. Ndërsa kjo mund të jetë e mirë për të nxjerrë në pah ngjyra më të forta, rëndom sjell skena me shumë kontrast. Shikoni ndryshimin në këto dy imazhe. I pari është nxjerrë nën rrezet e drejtpërdrejta të diellit. Ai e kap skenën, por i mungon atmosfera. Detajet në pemë të heqin vëmendjen, ka një brez të pahijshëm përgjatë fundit të kuadrit dhe madje edhe një hije të pakujdesshme në formën e fotografit. Duke iu kthyer së njëjtës skenë më vonë gjatë ditës, kur pema është në hije, skena rezulton me një pemë me më pak detaje, por me më shumë atmosferë. Tani ka ngjyrë në qiell, pema krijon një siluetë të fortë dhe pamja e mjegullt në distancë duket më dramatike.

Ka disa mënyra për të siguruar një horizont të niveluar gjatë shkrepjes. Përdorni Live View dhe rrjetin e të tretave për të niveluar horizontin. Nëse përdorni stativ, ky mund dhe të ketë një nivelues të dobishëm te koka. Por edhe me këto ndihmese mund t'ju duhet ndonjëherë të korrigjoni një imazh të paniveluar. Kjo është mjaft e lehtë me Canon Digital Photo Professional. Thjesht përdorni niveluesin me kënd brenda cilësimeve të funksionit Crop për të korrigjuar animin.

Shpesh me fotografinë e peizazhit, qëllimi është ta kapni skenën plotësisht të qartë nga fillimi në fund, për të shfaqur sasinë maksimale të detajeve. Kjo quhet thellësia maksimale e qartësisë. Për ta arritur këtë, duhet të vendosni një aperturë të ngushtë (numër i lartë f). Shembujt e mësipërm tregojnë ndryshimin midis shkrepjes së një peizazhi me aperturë të gjerë përkundër të ngushtës.

Në imazhin e parë këtu, u përdor një aperturë prej f/4. Pema në plan të parë është e qartë, por skena përtej është e zbutur. Në kuadrin e dytë, një aperturë më e ngushtë prej f/16 regjistron më qartë si në plan të parë ashtu edhe në sfond. Nëse qëllimi është të veçojmë një tipar kryesor të peizazhit, një aperturë e gjerë mund të jetë shumë e dobishme, por shumicën e kohës preferohet një aperturë e ngushtë dhe një thellësi maksimale qartësie. Një mënyrë e thjeshtë për të caktuar aperturën tuaj për peizazhet është përdorimi i modalitetit AV, pastaj konfigurimi i një aperture të ngushtë si p.sh. f/16. Shikoni shpejtësinë e shkrehësit - nëse bie shumë poshtë mund t'ju duhet të përdorni stativin ose të rrisni ISO për të shmangur turbullimin e imazheve.

Për peizazhe më të qarta, duhet të synoni gjithashtu drejt "pikës optimale" të objektivit tuaj. Një rregull i përgjithshëm është se objektivi është më i mprehtë dy ndalesa f nga apertura juaj më e gjerë. Pra nëse përdorni objektiv me gjerësi maksimale f/2.8, pika optimale në atë këndvështrim do të jetë rreth f/5.6.

Një problem i zakonshëm për fotografët e peizazhit është se mund të përqendroheni në diçka në plan të parë, por rrezikoni që gjithçka nga pas saj të dalë e zbutur. Anasjelltas, nëse përqendroheni në elemente të sfondit, plani i parë ju del i paqartë. Fokusimi në distancë hiperfokale ju ndihmon të nxirrni me qartësi më shumë pjesë të kuadrit duke gjetur pikën më të afërt në të cilën mund të përqendroheni duke e mbajtur sfondin në nivel të pranueshëm qartësie. Kjo teknikë nuk është aq e komplikuar sa duket dhe llogaritësi i thellësisë së qartësisë (DOF), si dhe largësia hiperfokale në aplikacionin Photo Companion bën gjithë punën e vështirë për ju.

Është e zakonshme të shkrepni në nivelin e syve, por kjo mund të mos japë gjithnjë pozën më interesante. Provoni ta lëvizni kamerën lart ose poshtë për të eksperimentuar me lartësi të ndryshme - mund të gjeni kënde më interesante. Reflektimet, për shembull, shpesh do të duken më mirë nëse kamera mbahet ulët në ujë. Ndihmon nëse përdorni një kamerë me ekran këndndryshueshëm, si Canon EOS RP, pasi kjo ju lejon të kompozoni nga lartësi komode ndërsa e mbani kamerën poshtë në tokë ose mbi kokë.


Shkruar nga James Paterson