Krijoni albumin tuaj të çmuar të dasmës

Një album i arrirë dasme tregon historinë e një dite të veçantë të lidhjes së jetës së bashku të një çifti, duke ruajtur dhe shfaqur kujtime të çmuara për brezat që do të vijnë. Megjithatë, porositja e një albumi dasme të krijuar nga një profesionist mund t'jua rëndojë buxhetin e ndarë për këtë okazion dhe kështu rrezikon dhe ta shkëpusë çiftin nga çastet që duhet të jenë të paharrueshme për ditën e tyre të veçantë. Pra, pse të mos bëni vetë?

Hannah Millard, e njohur si Camera Hannah, ka qenë një fotografe dasmash me kohë të plotë, që prej vitit 2010 dhe ka pasion shkrepjen e emocioneve të momenteve magjike siç këto shpalosen. Me emër në të gjithë botën, ajo ka fituar një sërë çmimesh për punën e saj, çka e ka shpënë nga shtëpia e saj në Derbyshire, Angli, nëpër vende ekzotike në mbarë botën. Ajo është gjithashtu mësuese e fotografisë, që jep seminare të përditshme dhe seanca mentorimi në internet dhe në person, si dhe një entuziaste punëdoreje dhe "massive geek" e vetëshpallur. Këtu, Hannah ndan këshillat e saj për çiftet që kërkojnë të krijojnë albumin e tyre vërtet unik të dasmës.

Pika e qartë nga t'ia nisni është duke mbledhur të gjitha pamjet që keni të ditës suaj të veçantë së bashku - si ato profesionale, të nxjerra nga fotografi juaj i zgjedhur profesionist, ashtu edhe ato jozyrtare, të nxjerra nga familja dhe shoqëria juaj.

"Shumica e fotografëve të dasmës jua japin me dëshirë pamjet digjitale me rezolucion të lartë si pjesë e punës së tyre", - thotë Hannah. "Këto janë ideale për krijimin e fotoprintimeve tuaja dhe duhet të jenë me cilësi shumë të lartë. Unë përdor një Canon EOS R6 dhe objektivat e mi për dasma janë Canon EF 24mm f/1.4L II USM, Canon EF 50mm f/1.2L USM dhe Canon EF 100 f/2.8L Macro IS USM, nëpërmjet Canon Mount Adapter EF-EOS R, kështu që e di se cilësia e imazhit do të jetë e mrekullueshme.

"Unë jam gjithashtu gati për të blerë një Canon RF 15-35mm F2.8L IS USM. Diapazoni i tij i zmadhimit këndgjerë dhe apertura e shndritshme krijon fleksibilitet të lartë për poza në grup dhe fotografinë e dasmës në ambiente të brendshme".

Duke qenë se shumica e pamjeve tuaja, nëse jo të gjitha, do të jenë në format digjital, mund ta krijoni albumin e dasmës duke përdorur një shërbim fotoalbumi në internet, ku ngarkoni pozat e preferuara dhe kompania ju realizon printimin dhe paketimin. Ky është një opsion i mirë për ata që do të donin më shumë liri zgjedhjeje, por që nuk kanë shumë kohë në dispozicion. Përndryshe, me pak a shumë të njëjtat shpenzime mund ta bëni vetë printimin dhe krijimin e albumit.

"Unë mendoj se është me të vërtetë e rëndësishme për një çift që t'i kalojnë në dorë së bashku fotot e dasmës", - thotë Hannah. "Është si një ditë takimi romantik, kur mund të ndani kohë të vyer me njëri-tjetrin duke ripërjetuar dasmën. Rishikimi i fotove mund të jetë gjithashtu një rast i mirë forcimi të lidhjes, teksa ndani kujtimet tuaja të ditës. E ndërsa flisni për to, do të kuptoni jo vetëm se cilat janë pozat tuaja të preferuara, por dhe se cilat foto kanë më shumë domethënie për partnerin dhe përse. Puna nuk është vetëm te fotot, por dhe tek emocionet që qëndrojnë pas tyre."

Mund të jetë më e vështirë të vendosni se çfarë të lini jashtë kur jeni duke krijuar një album dasme.

"Provoni duke filluar me pozat 'e domosdoshme'," - këshillon Hannah. "Çdo martesë është një histori që ka momente kyçe gjatë gjithë ditës, si shkëmbimi i unazave, puthja e parë dhe firmosja në regjistër. Më vonë gjatë ceremonisë është hedhja e buqetës dhe kërcimi i parë. Këto janë të gjitha momente emblematike që do të donit t'i përfshinit si pjesë të rrëfimit fotografik. Po aq të rëndësishme janë fotot që me të vërtetë ju flasin dhe ju shpien sërish në një moment të veçantë, për çfarëdoqoftë arsyeje".

"Nga pozat e domosdoshme është mirë të zgjidhni tri a katër superimazhe," - këshillon Hannah. "Këto do të jenë të preferuarat tuaja absolute, dhe ideja është që t'u jepni hapësirë në album. Një gabim i zakonshëm është kur i bëni faqet të duken të ngarkuara nga ana vizuale me shumë pamje që luftojnë për vëmendje. Kushtimi i faqeve të tëra për superpozat krijon një ndërthurje më të mirë dhe jep një ndjesi balance. Superpozat e arrira do të kenë ndikim të fortë vizual, kompozim të arrirë dhe shpesh kapin një moment kur gjithçka bëhet bashkë në mënyrë të përkryer.

"Aspekti tjetër është se disa imazhe funksionojnë më mirë me fotografi të tjera më të vogla rreth tyre," - vazhdon Hannah, - "si poza çasti të të ftuarve gjatë ceremonisë dhe ku njerëzit tregojnë lëvizjet e tyre në pistën e kërcimit".

"Unë shkrep shumë video në dasma dhe rregulla të ngjashme vlejnë dhe për krijimin e një albumi me foto", - thotë Hannah. "Filloni me disa 'poza themelore' për të dhënë kontekst. Fotografitë që tregojnë vendndodhjen e ceremonisë do të përcaktojnë ambientin dhe e njëjta vlen më tej për ceremoninë, nëse është në një vend tjetër. Ato mund të mos jenë pozat tuaja të preferuara, por nëse nuk i vendosni, rrezikoni të humbisni atmosferën e okazionit. Është gjithashtu mirë t'i shpalosni gjërat duke shtuar detaje. Poza p.sh. të luleve, orendive dhe dekorimeve të tryezave funksionojnë mirë dhe japin një rrjedhshmëri vizuale nëse kaloni nga njëri ambient në tjetrin. "

Edhe nëse vendosni ta krijoni profesionalisht albumin, mund të jetë ndihmesë më vete të keni gati një bocë si doni të duket dhe se çfarë fotosh të përdorni paraprakisht duke ndjekur të gjithë hapat e mësipërm. Një tjetër pikë kyçe për të kuptuar se si do të duket albumi, pavarësisht se kush e krijon produktin përfundimtar, është ta shikoni një një paraqitje fizike.

"Shikimi i fotove në telefon ose ekran kompjuteri nuk ju jep pamjen dhe ndjesinë që do të ketë albumi fizik i dasmës. Qoftë nëse do ta printoni albumin profesionalisht apo nëse do ta bëni vetë, është më mirë të bëni printime fizike të fotove me të cilat të bëni provat," - sugjeron Hannah. "Unë kam përdorur një printer Canon PIXMA TS7450 Series dhe jam mahnitur vërtet se si procesi është kaq i shpejtë dhe i lehtë, dhe cilësia e printimeve të fotografive kaq e mirë. Keni mundësinë e krijimit të printimeve me ose pa bordura, ku të dyja rastet funksionojnë veçanërisht mirë. Zakonisht vërej se pa bordura funksionon më mirë nëse i vendos printimet në faqe të bardha, por për fletët me reliev apo me ngjyra një bordurë e bardhë rreth fotos i jep paraqitjen e një kornize tërheqëse".

Kur printoni imazhe për albumin tuaj, Hannah sugjeron të provoni me fotoletra të ndryshme për të parë cilat preferoni.

"Më pëlqen mënyra si mund të provoj letra të ndryshme fotografike kur bëj printimet e mia", - thotë ajo. "Fotoletrat me shkëlqim, gjysmë shkëlqim, lustër dhe pa shkëlqim ofrohen të gjitha në një larmi të gjerë përmasash me të cilat mund të eksperimentoni dhe të gjeni sipërfaqen që ju pëlqen më shumë. Gjysmë shkëlqimi është preferenca ime, që ju jep rezultate me të vërtetë të bukura, profesionale, pa shumë shkëlqim. Fotoletra me shkëlqim funksionon gjithashtu mirë, sidomos për faqet që janë të ngarkuara me shumë imazhe të ndryshme, pasi kontrasti dhe fortësia e ngjyrave dalin më së miri në pah. Letra pa shkëlqim jep një pamje më të lehtë e të patheksuar.

"Bukuria e të bërit vetë të printimeve është se mund të ndërthurni letrat që u përshtaten imazheve ose faqeve individuale".

"Për t'i dhënë ritëm albumit tuaj të dasmës dhe për t'u siguruar që të tregojë të gjithë historinë, është mirë të krijoni një lloj tabele regjisori", - shpjegon Hannah. "Filloni me superpozat dhe ato të domosdoshme, pastaj shtoni pozat themelore dhe vendosini të gjitha printimet në një vijë kohore. Kjo ju jep një referencë të thjeshtë vizuale kundrejt historisë së plotë, dhe e bën më të qartë nëse ka ndonjë mangësi që duhet të plotësohet në rrëfimin fotografik Do t'ju tregojë edhe nëse ka mungesë ekuilibri, për shembull shumë poza nga fjalimet, ose shumë pak poza çasti nga të ftuarit".

"Mua më pëlqen vërtet Canon Easy-PhotoPrint Editor," - pohon Hannah. "Kur jam duke planifikuar faqet, e përdor për printimin e imazheve të shumta në, fjala vjen, një faqe të vetme 10x8 inçë ose fotoletër A4, të cilën mund ta ngjis drejtpërdrejt në faqen e një albumi. Kjo me të vërtetë ndihmon kur jeni duke punuar në paraqitjen e faqeve individuale dhe se si funksionojnë këto me faqet përballë njëra-tjetrës.

"Printimi i imazheve të shumta më të vogla në një faqe të vetme gjithashtu kursen kohën dhe përpjekjet për t'i drejtuar me saktësi gjatë vendosjes në album", - vazhdon ajo. "Programi dhe paketa Canon Easy-PhotoPrint Editor ka një larmi shabllonesh të gatshme nga ku mund të zgjidhni. Në vijim mund të vijoni për të riprodhuar strukturat në mjetet e dizajnit të një kompanie printimi në internet, për të krijuar albumin tuaj të dasmës. Dhe fotot që printoni kurrë nuk do të shkojnë kot. Mund të dëshironi t'i mbani vetë ose t'ua jepni familjes dhe shoqërisë si dhurata, mbase duke i vendosur në korniza për më mirë".

"Unë mendoj se ka shumë për të thënë për hartimin e albumit tuaj të dasmës me printime të bëra në shtëpi," - përfundon Hannah. "Funksionon më së miri nëse blini një libër punëdoreje formati të madh, për shembull me faqe 12x12 inçë, që ju jep fleksibilitet për të përdorur një ndërthurje të imazheve të mëdha dhe të vogla. Një qasje e të bërit vetë të gjërave është brilante për t'i shtuar elemente të ndryshme albumit të dasmës, si p.sh. letrat e ftesave, mesazhet e veçanta dhe shënimet me shkrim dore, radhën e shërbimit, lule të shtypura dhe kujtime të tjera.

"Fundja mund të krijoni vetë një album dasme të punuar me dorë dhe me printime me cilësi të lartë që do të zgjasin mjaft kohë për t'ua përcjellë brezave që vijnë. Është diçka vërtet argëtuese dhe tejet e lirë në shpenzime, krahasuar me çdo gjë tjetër nga dasma".

Shkruar nga Matthew Richards