Dekodimi i teknologjisë së kamerës: Cilësimet e ngjyrave të videos

Nga nuancat e zbehta "vintage" që ngjallin nostalgji tek tonet e ftohta blu që krijojnë një atmosferë të qetë, ngjyra është një mjet i fuqishëm i rrëfimit në video. Pavarësisht nëse po filmoni një video për rrjetet sociale, një video familjare ose një video epike për YouTube, ju mund t’i përdorni ngjyrat për të përcjellë vizualisht emocionet, për të ndikuar në mënyrën se si ndihet audienca juaj dhe për të tërhequr vëmendjen e saj te detajet e rëndësishme.

Regjisorja e videove të udhëtimeve Giulia Gartner përdor dritën dhe ngjyrat për të përcjellë tonin emocional të filmave të saj. Dokumentari i saj i shkurtër për një sportist të disiplinës “parkour” në Portugali, i filmuar me një kamerë Canon EOS R6 V, e dëshmon këtë shumë mirë. Lëvizjet dinamike të subjektit të saj e çojnë historinë përpara, por është përdorimi i qëllimshëm i ngjyrës së “orës së kaltër” ai që nxjerr në pah anën reflektuese të historisë së jetës së Luís.

“Tonet e thella të blusë shprehin kaq shumë emocion dhe mua më pëlqen të luaj me to”, - thotë Giulia. “Veçanërisht kur pjesë të historisë ndihen më personale. Mund t’i përdorësh këto tone më të errëta për të krijuar atmosferë, si dhe për të shtuar kontrast ngjyrash, si për shembull për kalimin nga një skenë e errët gjatë “orës së kaltër” në një lindje dielli.”

Kamerat Canon ofrojnë një sërë mënyrash për të menaxhuar ngjyrat dhe për t’u dhënë filmimeve tuaja një pamje dhe ndjesi të veçantë – nga cilësimet e paracaktuara të Picture Styles te skedarët Custom Picture, që ju lejojnë të vendosni për pamjen përfundimtare më vonë, gjatë editimit të filmit.

Kamerat EOS R6 V dhe EOS R50 V janë projektuar duke pasur parasysh filmimin e videove dhe të dyja kanë një buton shkurtore që të çon direkt te modaliteti i ngjyrave. Kjo ju mundëson të aksesoni të gjitha mjetet kryesore të ngjyrave në një vend: Picture Style, Custom Picture dhe opsionin Colour Filter, i cili ofron një sërë efektesh shprehëse.

Ju mund të jeni të familjarizuar me Picture Styles, të cilët mund të aplikohen si në imazhe, ashtu edhe në videoklipe. Ato janë cilësime të paracaktuara që ofrojnë kombinime të ndryshme karakteristikash të personalizueshme, si ngjyra, kontrasti dhe qartësia. Për shembull, Portrait Picture Style ka qartësi të reduktuar për tonalitete më të buta të lëkurës, ndërsa Landscape Picture Style është më e qartë, me nuanca blu dhe të gjelbra më të ndezura për t’iu përshtatur skenave të jashtme.

Ju mund të rregulloni çdo parametër për të krijuar një pamje dhe ndjesi të veçantë, ose të krijoni Picture Styles nga fillimi. Përveç nëse jeni duke regjistruar një video RAW, Picture Style aplikohet në filmimin tuaj sapo të filloni regjistrimin, njësoj si balancimi i së bardhës dhe ekspozimi. Kjo do të thotë se është e rëndësishme të zgjidhni cilësimin e duhur përpara se të filloni filmimin.

Skedarët Custom Picture aplikojnë një kombinim cilësimesh, si spektri i ngjyrave, matrica e ngjyrave dhe skedarët e pamjes (do të flasim më shumë për këto më vonë). Ndryshe nga cilësimet Picture Style dhe Colour Filter, të cilat aplikojnë një pamje specifike në filmimin tuaj, klipet e regjistruara me një skedar Custom Picture zakonisht kërkojnë përpunim pas regjistrimit për të prodhuar një video të finalizuar. Disa skedarë Custom Picture prodhojnë filmime të gatshme për shikim, drejtpërdrejt nga kamera. Për shembull, Canon 709 nuk kërkon përpunim pas filmimit, ndryshe nga Canon Log 2 dhe Canon Log 3. Megjithatë, Canon Log ju jep më shumë kontroll mbi pamjen përfundimtare gjatë editimit.

Canon Log regjistron pamje me kontrast të ulët dhe me ngjyra të zbehta në mënyrë që të ruajë më shumë detaje në pjesët shumë të ndritshme dhe hijet e errëta sesa cilësimet standarde të videove.

Mos u shqetësoni nëse videoja juaj e regjistruar me Canon Log duket e zbehtë dhe pa jetë kur e shikoni, pasi kështu duhet të duket. Kjo jo vetëm që e bën më të lehtë përdorimin e korrigjimit të ngjyrave për të hequr ngjyrimet e padëshiruara dhe për t’i dhënë filmimit tuaj një pamje natyrale, por gjithashtu ju lejon të bëheni kreativë me gradimin e ngjyrave.

Një tjetër veçori që e bën Canon Log kaq të dobishëm është konsistenca që ofron gjatë kombinimit të klipeve të regjistruara me kamera të ndryshme. Ajo ju lejon të nisni nga një bazë e ngjashme dhe ta gradoni filmimin në të njëjtën mënyrë, gjë që është veçanërisht e dobishme për krijuesit e përmbajtjeve që punojnë me disa kamera, qoftë kur regjistrojnë një video për YouTube, përmbajtje për rrjetet sociale ose një projekt më të madh.

Disa regjisorë profesionistë preferojnë Canon Log 2 pasi ai kap një gamë më të gjerë dinamike dhe më shumë detaje në hije sesa Canon Log 3, megjithëse përpunimi i pamjeve për të arritur rezultatet më të mira mund të kërkojë më shumë kohë. Canon Log 3 është më i shpejtë dhe më i lehtë për t’u graduar, çka e bën atë një zgjedhje të shkëlqyer për filmimet e përditshme, kur dëshironi fleksibilitet gjatë editimit.

Canon Log 3 disponohet në një gamë të gjerë kamerash EOS R System, duke përfshirë EOS R7, EOS R8 dhe EOS R50 V, ndërsa EOS R6 V dhe kamera të tjera të përzgjedhura ofrojnë gjithashtu Canon Log 2.

Filmimi i regjistruar me Canon Log do të duket i zbehtë dhe me kontrast të ulët gjatë regjistrimit. Aktivizimi i View Assist, i disponueshëm në kamerat e përputhshme, ju jep një pamje paraprake më natyrale të filmimit tuaj, ndërsa e lë të paprekur filmimin origjinal të regjistruar me Log. Ai ju ofron avantazhet e të dyja opsioneve: një pamje më të dobishme në kamerë, që ju ndihmon të vlerësoni ekspozimin, ngjyrat dhe kompozimin, ndërsa ju lejon të përfitoni në maksimum nga detajet shtesë në hije dhe fleksibiliteti i një skedari Log gjatë përpunimit të filmimit tuaj.

Korrigjimi i ngjyrave ka të bëjë me balancimin e filmimit dhe bërjen e tij teknikisht korrekt, duke ofruar një pikënisje për çdo rregullim kreativ. Për shembull, mund të hiqni një ngjyrim blu ose portokalli, t’i bëni tonalitetet e lëkurës të duken natyrale dhe të korrigjoni problemet me ekspozimin ose kontrastin. Përgjithësisht, një video me ngjyra të korrigjuara supozohet të duket “normale”.

Gradimi i ngjyrave është faza gjatë së cilës mund të bëheni krijues dhe t’i shtoni karakter videos. Bëhet fjalë për t’i dhënë videos një pamje ose stil të veçantë, qoftë të ngrohtë, nostalgjik, të vrazhdë ose me kontrast të lartë. Është e ngjashme me modifikimin e një fotografie, ku ngjyrat, kontrasti dhe tonet ndryshojnë në pasproduksion për të krijuar një atmosferë të caktuar. Për shembull, mund të dëshironi të aplikoni një gradim kinematografik në nuanca blu-jeshile dhe portokalli, duke i zhvendosur hijet drejt nuancave blu-jeshile dhe duke i bërë pjesët e ndritshme dhe tonalitetet e lëkurës më të ngrohta, ose ta desaturoni videon për një efekt dramatik. Ju mund t’i gradoni ngjyrat manualisht ose të aplikoni një LUT për të shtuar shpejt një pamje ose atmosferë të veçantë (do të flasim më shumë për LUT më poshtë).

Nëse do të gradoni ngjyrat e videos suaj, është më mirë të filloni me një video RAW ose me një filmim të zbehtë të regjistruar me Log, pasi të dyja ruajnë më shumë të dhëna të imazhit për rregullime të mëvonshme. Regjistrimi i videos RAW ofron fleksibilitetin më të madh, pasi ju lejon të rregulloni temperaturën e ngjyrave, ekspozimin dhe shumë parametra të tjerë, siç do t’i ndryshonit në kamerë. Nga ana tjetër, një video RAW mund t’i mbushë shpejt kartat e memories dhe kërkon më shumë fuqi përpunuese për t’i shndërruar të dhënat e papërpunuara të sensorit në një skedar video të shikueshëm.

Kamera Canon EOS R6 V dhe disa kamera të tjera EOS janë gjithashtu të pajtueshme me skedarët LUT (tabelë pamjeje), të cilët mund të ngarkohen në kamerë dhe të regjistrohen si skedarë pamjeje në menynë Custom Picture. Këta skedarë janë në thelb gradime ngjyrash të paracaktuara, që thjeshtojnë krijimin e një pamjeje të caktuar, pa qenë nevoja të rregulloni individualisht cilësimet e ngjyrave dhe të kontrastit. Skedarët LUT mund të aplikohen gjithashtu në softuerë të avancuar editimi, në mënyrë që pamja paraprake në kamerë dhe videoja përfundimtare të përputhen sa më shumë.

Nëse dëshironi t’i jepni përmbajtjes suaj një pamje finale konsistente, provoni të përdorni të njëjtin LUT në një seri videosh. Kjo është një mënyrë e thjeshtë për të zhvilluar një stil vizual të dallueshëm, ndërsa përshpejtoni procesin e editimit.

Eksploroni Canon LUT library për të mësuar më shumë rreth LUT dhe shkarkoni një sërë pamjesh kreative, duke përfshirë Bleach Bypass, High Key dhe Faded Sepia.

Edhe nëse nuk filmoni në RAW ose Canon Log, teknologjia e ngjyrave e Canon e bën më të lehtë përputhjen e filmimeve të regjistruara me kamera të ndryshme EOS. Objektivët, sensorët e imazhit të kamerave dhe procesorët DIGIC X nga Canon punojnë në harmoni për të prodhuar ngjyra konsistente, të pasura dhe natyrale, me tonalitete lëkure të ngrohta dhe të këndshme, në mënyrë që filmimi juaj të duket i shkëlqyeshëm që në momentin e regjistrimit në kamerë.

“Më pëlqen ta shpreh veten nëpërmjet ngjyrave”, - thotë Giulia Gartner, e cila regjistron shumicën e projekteve të saj në Canon Log 2. “Është një nga arsyet kryesore pse më pëlqen të përdor Canon, pasi teknologjia e ngjyrave përputhet me stilin tim të filmimit. Ngjyrat janë një pjesë shumë e rëndësishme e ekspresivitetit tim krijues”.

Pavarësisht nëse preferoni ngjyra reale apo më të stilizuara, duke ditur se kur duhet të përdorni mjete krijuese si Picture Styles, Canon Log dhe LUT, do të keni më shumë kontroll mbi pamjen përfundimtare të videove tuaja. Megjithatë, nuk bëhet fjalë për ndryshimin e pamjes së filmimit tuaj pa arsye. Bëhet fjalë për tregimin e historisë suaj në mënyrën që dëshironi.

• Kohë e shpejtë dorëzimi: Picture Style ose Colour Filter
• Editim minimal: Custom Picture ose Canon Log 3
• Gradim i avancuar: Canon Log 2 ose RAW
• Pamje vizuale konsistente: Përdorni të njëjtin LUT në një seri videosh

Shkruar nga Marcus Hawkins