Fotografi thjeshtësisht e bukur me rreze dielli, e ngrohtë, përmes "Canon EOS 250D"

4. Shkrepni portrete me ndriçim të ulët

Drita e lehtë që bie kur dielli është më poshtë në horizont, sidomos gjatë agimit dhe muzgut, në 'orët e arta', është tepër e preferuar nga fotografët. Ky ndriçim delikat është pjesë e paletës personave fotografike të Hannah dhe krijon një paraqitje të ngrohtë, me vezullimin e diellit që i ndriçon më së bukuri tonalitetet e lëkurës.

"Më pëlqen më shumë drita e muzgut dhe preferoj të shkrep më shumë në ndriçim të ulët se sa në dritën e fortë të diellit – është më elegante," - pohon ajo. Por kalimi në ambiente të mbyllura apo shkrepja në perëndimin e diellit është më se e lehtë me Canon EOS 250D. "E kam provuar deri në ISO 3200 dhe fotot nuk dalin me zhurmë," - thotë Hannah. "Më pëlqen të luaj me ISO, nëse e rris më lejon të përdor shpejtësi më të lartë të diafragme dhe të shkrep lëvizje edhe në ndriçim të ulët. Kam dëgjuar që shumë vetë kanë frikë ta ngrenë nivelin e ISO, por Canon EOS 250D nxjerr rezultate fantastike edhe në ISO të larta."

Për më tej, vetëfokusimi i Canon EOS 250D punon në nivele të cilat sytë tuaj mund t'i konsiderojnë shumë të errëta (deri në -4EV në "Live View") – pra, kamera shikon më mirë natën se ju, ndaj mund t'i zini besë që do t'jua kapë subjektin siç duhet.

5. Shihni deri ku ju shpie modaliteti automatik

Teksa Hannah ka ecur në aftësitë e saj fotografike, ajo ka kaluar në shkrepje kryesisht të modalitetit manual. Por asaj ende i bëjnë punë konfigurimet automatike që të japin rezultate të cilësisë së lartë me prekjen e një butoni dhe që të ndihmojnë për më tej të mësosh gjëra rrugës. Ajo u hodhi një sy konfigurimeve automatike të Canon EOS 250D, duke përfshirë modalitetit e plotë automatik "Scene Intelligent Auto" i cili analizon skenën përpara syve tuaj dhe zgjedh vetiu konfigurimin optimal për ambientin rrethues.

"Kam përdorur si fillim konfigurimet e skenave për ta pasur më të lehtë të mësohem me modalitetin manual," - thotë ajo. "Ato janë ideale për dikë që s'e ka përdorur kamerën për kohë të gjatë ose që nuk ka pasur ndonjëherë model DSLR më parë. Kamera i zgjedh vetë konfigurimet, prej nga dhe mund të mësoni në vijim. Kur e mora kamerën për herë të parë, përdora modalitetin e skenave sportive për të fiksuar fokusin te fëmijët që lëviznin, si dhe konfigurimin për portretet."

Hannah ka dëshirë të nxjerrë detaje të vogla në fotot e saj dhe kamerën e kalon në modalitetin automatik kur i duhet të shkrepë të birin teksa lan duart në një kovë rozë me ujë. "Më pëlqen të nxjerr detaje dhe të krijoj një narrativë me foto," - thotë ajo. "Mund të jenë thjesht duar që kapin një sup, këmbët, syze në ndonjë tryezë, një kapelë në plazh – detaje të vogla nga një skenë më e madhe." Në këtë rast vlerat e konfigurimit automatik ishin me f/5.6, 1/500 sek dhe ISO 200. Shpejtësia e lartë e diafragmës prej 1/500 sek bën të mundur fiksimin e stërkalave të ujit që përplaset në duar.

6. Mos humbisni asnjë sekondë aksioni

"Gjëja më me vlerë që kam mësuar është që ta mbaj gjithnjë kamerën me vete," - thotë ajo. "Nëse e kam pranë, jam gjithnjë duke mësuar e duke u ambientuar me të, çka më jep dhe më shumë vetëbesim." Gjatë fotografimit të familjes së saj për këto prova, Hannah shpesh i ndiqte fëmijët kudo që këta shkonin dhe i linte të luanin të shpenguar. Në vend që t'u kërkojë të tjerëve të marrin poza, asaj i pëlqen t'i fotografojë teksa janë duke u argëtuar lirshëm. "Thjesht ndjek situatat dhe bëj gjërat që u pëlqejnë atyre, ndërsa e mbaj kamerën me vete gjatë gjithë kohës. Pozat më të mira të fëmijëve dalin kur nuk e kanë mendjen te kamera."

Për t'u siguruar që të mos humbasë asnjë çast, Hannah shkrepi dhe foto në grup në modalitetin e njëpasnjëshëm "Continuous Shooting", i cili shkrep pesë kuadro në sekondë (fps) në modelin Canon EOS 250D. "E kam gjithnjë aktiv modalitetin e shkrepjes në grup që të nxjerr shumë foto në sekondë," - thotë Hannah. "Ke më shumë gjasa të nxjerrësh foto të bukura nëse ke një seri kuadrosh – p.sh. më pëlqen kjo poza (poshtë), me stërkalat anash – duket shumë energjike."

7. Përdorni lidhjet e kamerës me pajisjet e tjera

Kur shkrepni në lëvizje gjatë rrugëve ditore, është tejet praktike të keni mundësinë t'i ndani fotot me shoqërinë e familjen. Canon EOS 250D mund të lidhet fare lehtë me celularin apo tabletën tuaj, me anë të të "Bluetooth" ose të "Wi-Fi" dhe aplikacionit "Canon Camera Connect", duke ju mundësuar transferimin e fotove dhe ngarkimin në rrjetet sociale, ose dërgimin tek të dashurit tuaj.

"Shpesh dua t'i nxjerr në 'Instagram' fotot që shkrep, kështu që është fantastike mundësia që kam për t'i transferuar direkt në celular, për t'i nxjerrë pastaj në internet," - thotë Hannah. "Këtë funksion e përdor me Canon EOS 250D dhe mendoj se është shumë i shtruar dhe i lehtë – dhe nuk jam as shumë e zhdërvjellët me këto gjërat teknike! Një manual brenda aplikacionit "Canon Camera Connect" ju jep gjithashtu udhëzime se si ta lidhni kamerën."

Për të mësuar më tej se si t'i shfrytëzoni më së miri funksionet e kamerës suaj, aplikacioni "Canon Photo Companion" vjen me këshilla se si të jeni të suksesshëm në çfarëdo zhanri të fotografisë, duke ofruar këshilla nga ekspertët, udhëzime e sugjerime që përkojnë me modelin tuaj të kamerës.

Shkruar nga Lucy Fulford

* EOS 250D (e zezë/argjendtë) është modeli më peshëlehtë në botë mes kamerave elektronike njëobjektivëshe me pasqyrim, me sensor përmasash APS-C dhe monitor LCD me nyjëtim tërësor. Përfshin baterinë dhe kartën e memories sipas direktivave të CIPA. Nga 9 prilli 2019 (sipas kërkimeve të "Canon").